Viktig å vita før du søkjer
Hovudopptak
Barn med lovfesta rett til plass er garantert eit tilbod ved hovudopptaket, og denne retten er innfridd når du får eit tilbod om barnehageplass i ein barnehage i bustadskommunen. Dette er barn som oppfyller følgjande kriterium:
- Søkjer innan fristen 1. mars
- Fyller 1 år innan utgongen av november det året det vert søkt om plass frå
- Er busett i Øygarden kommune når nytt barnehageår tek til i august
- Ønskjer oppstart hausten inneværande år
- Har ikkje barnehageplass i Øygarden pr. 1. mars
Barn som fyller 1 år innan august har rett på eit tilbod frå august. Barn som fyller 1 år i løpet av september, oktober og november, har rett på eit tilbod frå den månaden barnet fyller 1 år.
Barn utan lovfesta rett vil få tilbod om barnehageplass dersom det er ledig plass når hovudopptaket er avslutta. Hovudopptaket vert avslutta når alle med lovfesta rett til plass har fått eit tilbod.
Lovfesta rett til barnehageplass er oppfylt når du får eit tilbod om plass i Øygarden kommune, uavhengig av om du får tilbod om plass i ønska barnehage eller annan barnehage.
Søk om barnehageplass
Det er same søknadsprosess for kommunale og private barnehagar. Når du søkjer må du logge deg inn med BankID. Du må ha personnummer til deg sjølv og barnet, e-postadresse og mobilnummer. Dersom du venter på personnummer, må du ta kontakt med barnehagemynde på telefon 56 16 16 26 eller 56 16 16 45.
Det er berre den/dei som har foreldreansvar som kan søkja, endra og seia opp barnehageplass. Personopplysningane vert henta frå Folkeregisteret og Kontakt- og reservasjonsregisteret, og foreldra må sørgja for at informasjonen er riktig. Foreldreansvar endrar du inn i Folkeregisteret og kontaktinformasjon oppdaterer du inn i Kontakt- og reservasjonsregisteret.
Foreldre som skal søkja barnehageplass til barn som ikkje har plass frå før, må bruka eiga lenke:
Søk ny barnehageplass
Når plass er tildelt, kan du gjera endringar via Vigilo foreldreportal:
Søk om overføring/endra plasstype i Vigilo foreldreportal
Her finn du:
- Finn aktuelle barnehagar:
- Du kan berre ha ein aktiv søknad registrert
- Du kan ha inntil 5 barnehagar i søknad
- Du kan søkja både kommunale og private barnehagar i heile kommunen.
- Nokre barnehagar har tilbod om deltidsplass, men du kan få tilbod om heiltidsplass sjølv om du har søkt om deltidsplass.
- Registrer søknad i søknadsportalen
- Oppgje ønska startdato. Ved hovudopptaket må ønska oppstart vera i henhald til krav for hovudopptak, og ikkje seinare enn månaden barnet fyller 1 år.
- Kryss av for ønska prioritering dersom du er i prioritert gruppe, og legg ved evnt. dokumentasjon ved krav om dette. Ved hovudopptak må dokumentasjon ligga føre innan 1. mars - dersom ikkje vert søknad behandla utan prioritering.
Logg på Vigilo foreldreportal eller bruk Vigilo mobilapp.
Barn med nedsett funksjonsevne eller vedtak frå barneverntenesta
Krav til dokumentasjon: Skriftleg attest frå lege/psykolog, PPR og/eller medisinske institusjonar som stadfestar nedsett funksjonsevne - Vedtak frå barneverntenesta.
Barn i ein vanskeleg livssituasjon grunna sjukdom, sosiale vanskar, eller som av andre grunnar har særlege behov
Krav til dokumentasjon: Skriftleg vurdering frå lege eller andre sakkunnige instansar.
Opptakskrets for kommunale barnehagar er heile Øygarden kommune. Barnet må vera busett i Øygarden kommune for å ha rett på tilbod om barnehageplass.
Vedtekter for kommunale barnehagar finn du her.
Private barnehagar følgjer reglar for samordna opptak (hovudopptak), men kan ha eigen opptakskrets og kriterium som avgjer korleis plassar vert tildelt. Desse er regulert i den einskilde barnehage sine vedtekter. Du finn vedtekter på dei private barnehagane sine eigne nettsider.
Svar på tilbod om barnehageplass
Svar på tilbod om barnehageplass vert sendt elektronisk til e-post registrert i kontakt- og reservasjonsregisteret. Du må svara på tilbodet i søknadsportalen. Dersom ikkje svar vert registrert innan fristen, kan du mista tilbodet om plass, og må evnt. registrera ny søknad.
Første opptaksrunde tek til i mars, og held fram til alle som har rett på eit tilbod om barnehageplass har fått eit tilbod, seinast innan mai.
Ved ledig kapasitet utanom hovudopptaket, vert tilbod om plass sendt ut fortløpande. Det er ikkje mogleg å seia noko om kor lang tid det vil ta før du får eit tilbod, då dette avheng av at det er ledig plass i omsøkte barnehagar.
Lovfesta rett til barnehageplass ved hovudopptaket er oppfylt når du får eit tilbod om plass i Øygarden kommune, uavhengig av om du har fått plass i ønska barnehage. Har du fått tilbod om barnehageplass, men ikkje i barnehagen du ønskte, kan du halda fram med å stå på venteliste til barnehagen du har som ønskje nr 1.
Dersom du har barnehageplass og får tilbod om plass i annan barnehage, må du seia opp plassen du har takka ja til i søknadsportalen.
Takker du nei til tilbod om plass i barnehage du har som 2, 3, 4 eller 5 valet ditt, kan du likevel halda fram med å stå på venteliste hos omsøkte barnehagar med høgare prioritet. Du må då kryssa av for at du ønskjer å halda fram på venteliste.
Takkar du nei til plass hos barnehagen du har som nr 1, vert søknad sletta og du må søkja på nytt dersom det seinare er ønskje om plass.
Takkar du nei til tilbod om plass ved hovudopptaket, kan du risikera å måtta venta til neste hovudopptak for å få eit nytt tilbod.
Dersom du allereie har ein barnehageplass og takkar nei til tilbod om plass frå annan barnehage, mister du ikkje plassen din i barnehagen der barnet allereie har plass.
Foreldre/føresette kan klaga på tildeling av barnehageplass. Klageretten gjeld for dei som har rett på eit tilbod om barnehageplass ved hovudopptaket - dersom ein ikkje har fått innvilga sitt 1. eller 2. val, eller meiner det er feil i saksbehandling ved tildeling av plass. Klage skal sendast Øygarden kommune. Dersom du får medhald i klage av barnehagemynde, skal barnet tildelast første ledige plass i aktuell barnehage etter at barn med lovfesta rett til prioritering har fått tilbod om plass. Dersom du ikkje får medhald, vert saka sendt vidare til klagenemda i kommunen.
Forskrift om saksbehandlingsreglar ved opptak i barnehage skildrar klageretten og saksgangen til foreldra.
Oppseing, permisjon og endre plass
Oppseiing av plass gjer du i søknadsportalen Vigilo dersom du:
- Har fått tilbod om, og takka ja til plass i annan barnehage i kommunen
- Ikkje ønskjer vidare barnehageplass
For kommunale barnehagar er det 1 månad oppseiing, rekna frå den 15. påfølgande månad. Reglar for oppseiing er gjeldande frå foreldre/føresette har takka ja til plass. Private barnehagar kan ha lengre oppseiingstid, sjå barnehagen sine vedtekter.
Nokre private barnehagar krev at det i tillegg vert sendt skriftleg oppseiing til barnehagen. Sjå barnehagen sine vedtekter.
Vanlege reglar for oppseiing og betaling er gjeldande sjølv om plass ikkje er teken i bruk.
Du seier opp barnehageplass i Vigilo. For å logga deg på foreldreportalen, gå inn via Vigilo, Øygarden kommune. Her loggar du deg inn med ID-porten. Du vil då få opp fana «Foreldreportal». Under menyval for «søknader» vil du få val om «ny søknad». Du vil då få val om å registrera søknad om oppseiing av barnehageplass. Det same gjeld dersom du skal søkja om endring av opphaldstid eller endra på søknad.
I kommunale barnehagar er det høve til å søkja om permisjon eller utsett oppstart av barnehageplass for minimum 3 månadar og maksimum 12 månadar. Kriteria for betalingsfri permisjon er at barnehagen har søkjarar som kan nytta plassen i permisjonstida. Frist for å søkja permisjon er den same som ved oppseiing av plass. Oppstart når permisjonen er over kan skje når det er ledig plass i barnehagen. Ved permisjonar som avvik frå barnehageåret, kan det bety at det ikkje er ledig plass når permisjonstida er over. I desse tilfella kan det skje at ein får tilbod om plass ein periode før eller etter at permisjonstida er over, eller eventuelt i ein annan barnehage.
Ved alvorleg sjukdom hos barn, der barn ikkje kan nytta barnehageplassen over ein lengre periode, kan ein søkja om betalingsfri permisjon etter samtale med styrar. Fråværet må dokumenterast.
Private barnehagar kan ha eigne kriterium for permisjon, sjå barnehagen sine vedtekter.