Michael Sangolt (H) presenterte forslaget om justert punkt 3 i innstillinga frå kommunedirektøren i saka om direkte anskaffing av omsorgsbustader. Til venstre utvalsleiar Børge Haugetun (Sotralista-TVØ).

Plan- og miljøutvalet var samla til møte torsdag denne veka og drøfta denne og fleire andre saker. 
Bakgrunnen for saka er at Øygarden kommune har fått tilbod om å kjøpa 41 nøkkelferdige omsorgsbustader sentralt på Ågotnes. Målgruppa for bygget er eldre med vedtak om heildøgns helse- og sosialtenester. Bygget skal utformast slik at det løyser ut investeringstilskot frå Husbanken.

Utvalet vil altså ikkje gå til direkte anskaffing og følgjer kommunedirektøren om å førebu kunngjering av ein konkurranse for bygging av omsorgsbustadar for personar med heildøgns omsorgsteneste. 

Kommunedirektøren hadde vidare innstilt på at prosjektet skal fylla vilkår for investeringstilskot og verta realisert i 2029/2030. Utvalet tilrår at prosjektet vert realisert «så raskt som mogleg». Vidare skal det fremjast ei sak juni 2025 som skildrar korleis ei slik anskaffing kan gjennomførast.

Kommunestyret ber kommunedirektøren ta kontakt med Husbanken for å spela inn behovet for å raskt få på plass investeringstilskot til tryggleiksbustadar.

Saka går til endeleg behandling i kommunestyret. 

Fleire innspel om ny ferjekontrakt Klokkarvik – Hjellestad

Øygarden kommune har fleire merknader og innspel når Skyss no skal lysa ut nye ferjekontrakt for strekninga Hjellestad-Lerøyna-Bjelkarøyna-Klokkarvik.

Utvalet vedtok å slutta seg til momenta som kommunedirektøren har peika på i uttalen. Dette er :

• For fastbuande er det viktig med ein god frekvens og føreseielegheit når det gjeld driftsstabilitet. Nytt anbod etter 2030 må ta omsyn til dette. Eit minimum må vera at ferja etter 2030 opprettheld tilbodet på dagens nivå 
• På Hjellestad er det utfordringar med oppstilling og det er uføreseieleg for øybuarane om dei kjem med ferja. Det må leggjast til rette for betre oppstilling på Hjellestadsida. Dette treng ikkje venta til 2030. 
• Gratis ferje har ført til auka bruk som igjen gjev øybuarar utan alternativ utfordringar  når det gjeld plass på ferja. Fylket må uavhengig av nytt anbod sjå på betre og meir føreseielege løysingar for dei frå øyane som er avhengig av bil. 
• Opning av Sotrasambandet i 2027 kan gje endra reisestraumar og betre forhold for 
  bil/kollektiv. Det er usikkert korleis forbetra vegsystem saman med bompengar vil påverka 
  etterspørselen av ferjetilbodet. Dette vil og hengja saman med om ordning med gratis ferje vert vidareført. For kommunen er det viktig å oppretthalda ein alternativ reiseveg mellom Klokkarvik, Lerøyna, Bjelkarøyna og Hjellestad/Bergen.
   

På møtet vart det fremja tre tilleggsforslag som alle vart vedtekne slik:

Administrasjonen vert beden om å sjekka med Vestland fylkeskommune om at ein ved innhenting av anbod ber om at det vert sett av eigen plass på ferjedekk til HC-bil med tilkomst til toalett på dekk. Toalettet må vera tilgjengeleg med eventuelt rampe. Storleiken på plassen bør vera lagt til rette slik at det er plass for utfall av køyrelem (føreslått av Frp).

Ferjesambandet må inngå i eit større og meir samla kollektivtilbod med behov for utbetring av parkeringsplassar og oppstillingsareal på begge sider, få auka kapasitet med fleire avgangar og ei mogleg løysing med minibussruter på fastlandssida opp mot knutepunkt som til dømes Birkelandsskiftet (føreslått av Høgre, KrF, Sotralista-TVØ og Frp).

For å sikre at fastbuande blir prioriterte,  bør det vurderast at fastbuande får prioritert plass på ferja.
Det er viktig å oppretthalda sommaravgangane, inkludert kveldsferja klokka 21.00 i helgane, gjennom heile året. Denne avgangen er viktig for både fastbuande og hytteeigarar som er avhengige av fleksibilitet i helgene. Det bør greiast ut fleire avgangar i periodar med høg trafikk, slik at både fastbuande og andre reisande får eit påliteleg samband (fremja av Ap).

Oppstart av arbeidet med strategiplan for klima og energi

Plan- og miljøutvalet vedtok å starta opp arbeidet med strategiplan for klima og energi 2026-2030. Arbeidet skal organiserast slik det går fram av saka, med brei intern og ekstern medverknad. Framdriftsplanen med endeleg vedtak av strategiplanen hausten 2026 skal leggjast til grunn for arbeidet. 

Ved tematisk avgrensing av strategiplanen har kommunedirektøren lagt vekt på at klima og energi er tema som heng tett saman, og at kommunen derfor bør etablera strategiar som ser desse i samanheng.

Utvalet slutta seg samrøystes til ei tilleggsformulering fremja av MDG der det heiter at prinsippa i saksframlegget skal leggjast til grunn for det pågåande arbeidet med rullering av arealdelen til kommuneplanen. 

Utvalet vedtok også eit framlegg frå Høgre der det vert bedt om at  administrasjonen held seg innanfor ei økonomisk ramme på maksimalt 800 tusen kroner for 2025 og 2026 for utarbeiding av planen.  Dersom dei økonomiske rammene ikkje kan haldast, skal formannskapet orienterast.

Offentleg ettersyn av framlegg til trafikktryggleiksplan 

Plan- og miljøutvalet vedtok å leggja framlegg til trafikktryggleiksplan 2025 - 2029 på offentleg ettersyn. Frist for å koma med høyringssvar vert sett til 30.april.

Framlegg til trafikktryggleiksplan skisserer seks innsatsområde som det er knytt tiltak til: 

• Mjuke trafikantar og trygg skuleveg 
• Haldningsskapande tiltak 
• Hindra møte- og utforkøyringsulykker 
• Areal- og transportplanlegging 
• Trafikksikkert regionsenter, kommunedelsenter og lokalsenter 
• Tryggleik på sjø

Endring nr. 5 av reguleringsplan for bustader på Straume sør, Straume

Utvalet godkjente endring av reguleringsplan for bustader på Straume sør. Gbnr. 35/5, 58 m.fl., Straume.

Formålet med endringa er å sikra gjennomføring av utbygging i dette området, noko som ikkje har late seg realisera med dei føresetnadene som ligg føre i gjeldande plan. Bakgrunnen for dette er at tidlegare planlagt utbygging ikkje er økonomisk gjennomførbar. Endringane vil føra til auke i tal bustadeiningar, justering av føremåls- og byggegrenser, og auka storleik på parkeringsareal. Maks byggjehøgde vert endra og det er planlagt ei ny løysing for renovasjon. Tal bustadeiningar vil gjennom endringa auka frå 24 til 38, der 24 av husværa vil vera under 65 kvadratmeter. 

Prinsippsak - detaljregulering for Bjelkarøy Hovedgård, Bjelkarøyna

PMU sluttar seg til innstillinga frå kommunedirektøren og vedtok å avslutta plansak for detaljregulering for Bjelkarøy Hovedgård, Bjelkarøyna. Tiltakshavar sender innspel til arealdelen når det vert opna for dette.

Formålet med planen var å regulera for fem bustadar i tilknyting til eit eksisterande bustadtun. Området er i kommuneplanen sett av til LNF-spreidd bustad, utan ledige kvotar, og er difor i strid med overordna plan.
Vedtok retningslinjer for påkopling til offentleg vatn og avlaup

Utvalet behandla ei sak om beløpsgrense for å innvilga fritak frå kravet til å kopla seg på vatn- og avlaupsanlegg. Det vart gjort følgjande vedtak om retningslinjer:

1. Dersom kostnaden til investering i privat anlegg for å nå fram til offentleg vassleidning er større enn 0,75G kan kommunen vurdera å godkjenne anna ordning. 
2. Dersom kostnaden til investering i privat anlegg for å nå fram til offentleg avlaupsleidning er større enn 2,5G kan kommunen vurdera å godkjenne anna ordning. 
3. Dersom kostanden til investering i privat anlegg for å nå fram til vass- og avlaupsleidning samla er større enn 2,5G kan kommunen vurdera å godkjenna anna ordning.  
4. Dersom det nyleg er gjort store investeringar i eksisterande private anlegg og desse anlegga fungerer tilfredsstillande, kan krav om offentleg tilknyting utsetjast med inntil 10 år. 
5. Summane i punkt 1, 2 og 3 er rettleiande og gjeld for bustader. 
6. Utgangspunktet for vurdering av kostnaden er huseigar sin del av nødvendige investeringar i private anlegg.
7. Det skal vurderast moglegheit for fellesløysingar. 
    

Vedtaket gjeld frå vedtaksdato i kommunestyret, og erstattar tidlegare vedtak 107/20, datert 18. juni.2020.  

I punkt 2 og 3 hadde kommunedirektøren føreslått kostnadsgrensa til 3,5G. Utvalet endra grensa til 2,5G. Arbeidarpartiet sitt medlem i utvalet støtta kommunedirektøren sitt framlegg om 3,5G.

Utsette avslutningssak om detaljregulering 

Plan- og miljøutvalet behandla ei sak om avslutning av detaljregulering for Nordre Helleren, Solsvika. Saka vert utsett med behov for vidare endeleg avklaring.  

Her kan du lesa innkalling med saksdokument.

Her er opptak av møtet på kommune-TV.

Tekst og foto: Vigleik Brekke