Her finn du kunnskapsgrunnlaget i arbeidet med arealdelen til kommuneplanen. Vi publiserer rapportar, analyser, kartforteljingar m.m. når dei er klare.
Vi har invitert til medverknad gjennom opne møte og innspel om verdiar vi bør ta vare på for framtida, og korleis vi utviklar gode lokalsamfunn i Øygarden. All denne kunnskapen er summert opp i kartforteljinga Verdiar i Øygarden, som du kan bla deg gjennom her.
Ønskjer du å vita meir om gjeldande arealbruk i kommunen, kan du nytta kommunekart. Her finn du til dømes informasjon om kva farge og arealbruk din eigedom har. Du kan også finna informasjon om blant anna kartlagde naturverdiar, friluftsliv, kulturminne og mykje meir.
I samband med kunngjering av planprogrammet for den nye arealdelen opna vi for arealinnspel i tida 23. januar - 8. mars. Her kan du lesa meir om innspela som kom inn, og kva som ligg til grunn for vurderingane av dei.
Til no har vi utarbeidd følgjande kunnskapsgrunnlag:
Landskapsanalysen bidreg med viktig kunnskap om samanhengar mellom landskapet, naturen og kulturhistoria vår. Kunnskapen vi har fått gjennom arbeidet vil til dømes kunna hjelpa oss til å vurdera grensa mellom utmark og byggeområde, eller å prioritera kva landbruks- og kulturlandskap vi skal ta vare på for framtida.
Dokument
Kart
Vi har fått utarbeidd ei kartlegging av verdifull og tilgjengeleg strandsone, i dei delane av kommunen der byggepresset er størst. Denne strandsonekartlegginga vil vera eit viktig grunnlag for å drøfta og fastsetta strategiar og prinsipp for framtidas arealbruk i Øygarden.
I tillegg har vi laga eit oversiktbilete om korleis vi har utvikla strandsona i Øygarden. Kor mykje bygger vi eigentleg ved sjøen, og utnyttar vi rammeverket som ligg til kommunen vår for å forvalta strandsona godt nok?
Det er også gjennomført ei spørjeundersøking om småbåthamner i kommunen. Føremålet med undersøkinga er å få meir kunnskap om areal til og status på tilbod og kapasitet i småbåtanlegga i Øygarden.
Dokument
Kart
I nesten heile Øygarden er det gjennomført kartlegging av naturen på land. Ganske mange område som vi har satt av til byggeformål i gjeldande arealdel, består i dag av nasjonal og lokal viktig natur. Dette er ny kunnskap som vi må nytta til å vurdera om vi skal prioritera viktig natur framfor utbygging i desse områda, eller om vi har gode argument for kvifor vi vel å bygga ned naturen.
Dokument
Kart
I Øygarden er det over tid gjennomført fleire kartleggingar og verdsetting av friluftsområde. Her viser vi ei oversikt over dei viktige friluftsområda vi har, og som vi må ta vare på for framtida.
Dokument
Kart
I samsvar med nasjonal jordvernstrategi skal vi i større grad verna om landbruksjorda, og ikkje ta den i bruk til byggeformål. Også i Øygarden kommune har vi satt av landbruksjord til framtidige byggeformål i gjeldande arealplanar. Samstundes har vi arealstrategiar som seier at vi skal «Prioritera landbruket framfor å bygga ned dyrka mark og viktige, både noverande og framtidige, beiteareal».
Vi har samanstilt lokal kunnskap om landbruksjorda og landbruket i Øygarden:
Dokument
Rapport - Landbruksjorda i Øygarden (PDF, 2 MB)
Kart
Vi har gjennomført arbeidsverkstader i alle sju lokalsentra og dei tre kommunedelsentera i Øygarden. Samstundes har vi invitert til å komma med innspel om kva må vi ta vare på for framtida, kva kan vi styrka, og kva bør vi endra i sentra. Korleis kan ditt nærmaste senter bidra til eit godt kvardagsliv?
Innspela som vart samla inn i dette arbeidet er no oppsummerte, systematiserte, analyserte og geografisk framstilt i tekst og kart. Kunnskapen vi har samla inn vil nyttast som kunnskapsgrunnlag for politiske drøftingar og vedtak av strategiar og prinsipp for arealbruk i lokalsentra.
Kart
Barnetråkk er eit digitalt medverknadsverktøy der barn og unge kan spela inn i kart korleis dei brukar og opplever nærmiljøet sitt, trafikktryggleik, skulevegen eller vegen til fritidsaktivitetar. Metoden gir barn og unge moglegheita til å delta i, og reelt påverka samfunnsutviklinga og staden dei bur.
Kunnskapen vi får inn frå registreringane til barna vil vera nyttig informasjon for arbeidet med arealdelen til kommuneplanen, men også for andre pågåande planarbeid og strategidokument. Som til dømes barnehage- og skulebruksplanen, trafikksikringsplanen, ein eigedomsstrategi for kommunale bygg, strategisk planprogram for Straume og områdeplanen for Stovevatnet.
Vi har laga eit statusbilete av korleis vi legg til rette for næringsutvikling gjennom gjeldande arealplanar i Øygarden. Her har vi gjennomført analysar av næringsareal, og sett på bruk og potensiale i desse areala. Vi har også invitert næringslivet til ein medverknadsdag, for at dei kan dela erfaringar og gi innsikt i korleis arealbruk påverkar kvardagen deira.
Dokument
Kart
Vi har samanstilt eksisterande kunnskap og sett på moglegheitene for framtidig planlegging av sjøområda våre. Kunnskapen er eit viktig grunnlag for arbeidet med arealdelen, men også som eit støtteverktøy i arbeidet med å oppnå ei berekraftig forvaltning av sjøområda, med eit særskild fokus på miljø og dyrevelferd.
Dokument
Kart
Vi har laga eit statusbilete av befolkninga som bur i Øygarden i dag, og korleis vi bur. Ved å analysera statistikk om framskrivingar av befolkninga, kan vi også få eit frampeik på kva som er vil vera bustadbehovet på kort og på lang sikt.
Kart
Kva er miljøstatus i Øygarden, og korleis vil klimaendringane påverka oss? Vi har laga eit statusbilete over viktige natur- og miljøførestander som vi må ha kunnskap om for å utvikla Øygarden. Det handlar om konsekvensane av klimaendringar, påverknad på økosystema og kjende miljøproblem. I tillegg viser vi korleis vass- og avløpsnettet er ein viktig føresetnad for utviklinga av kommunen vår.
Dokument
Kart
Arealrekneskap er eit verktøy som gir oversikt over areala våre, der vi samanstiller informasjon om blant anna arealbruk i planar, korleis vi faktisk nyttar areala våre, kor mykje natur vi tek vare på eller tek i bruk, karbonlagring og mykje meir.
Kunnskapen som vi får gjennom arealrekneskapen er nyttig for å sjå konsekvensar av om vi tek i bruk eller vernar om areala våre. Bruk av arealrekneskap gjennom arbeidet med arealdel til kommuneplanen er no ei nasjonale forventing, og ligg som ei retningslinje i regional plan for klima (2022 – 2035).
Kart
To arkitektteam arbeidde parallelt med å utvikla idear for Stovevatnet og regionsenteret Straume. Ideane deira kan vi nytta fritt når kommunen skal laga sine planar for utviklinga av Stovevatnet og vidareutviklinga av Straume.
Ein vurderingskomité, satt saman av representantar frå blant anna kommunen, fylkeskommunen, næringslivet og råda i kommunen har oppsummert parallelloppdraget i ein rapport. Rapporten inneheld ti råd om korleis kommunen bør arbeida vidare.
Dokument
Ved hjelpa av to konsulentfirma har vi kartlagd trafikk og parkeringssituasjonen på Straume. Ut i frå analyser viser forslaga korleis vi kan legga betre til rette for menneska og det urbane livet, ved å gi betre plass til mjuke trafikantar i sentrum. Kartlegginga viser også kva vi må arbeida vidare med for å finna gode løysingar.
Vi har også sett på kva delar av Straumemila som er realisert, og kva som ikkje er gjennomført. Det er i tillegg gjort ei kort og overordna evaluering av Straumemila.
Dokument
Rapporten inneheld informasjon om den blågrøne strukturen og rekreasjonsområda på Straume. Den viser til dagens situasjon, manglar, behov og moglegheiter.
Dokument
Resultatet frå rapportane og kunnskapsinnhentinga om Straume er oppsummerte og illustrerte i ei kartforteljing.
Kart
Sist endra 09.09.2026 10.29