Kven bør vaksinera seg?

Sesonginfluensavaksine vert tilrådd personar som har auka risiko for alvorleg sjukdom og komplikasjonar ved influensasjukdom. Dette gjeld: 

• Bebuarar i omsorgsbustad og sjukeheimar
• Alle frå fylte 65 år
• Gravide etter 12. svangerskapsveke (2. og 3. trimester). Gravide i 1. trimester med annan tilleggsrisiko
• For tidleg fødde barn, særleg barn fødd før veke 32, frå 6 månader (kronologisk alder) til 5 år

Barn og vaksne med: 

• Kronisk lungesjukdom (inkludert astma) 
• Hjarte- og karsjukdom (anna enn velregulert høgt blodtrykk)
• Diabetes type 1 og 2
• Leversvikt eller nyresvikt
• Kronisk nevrologisk sjukdom eller skade, særskilt personar med redusert lungekapasitet og/eller hostekraft
• Redusert immunforsvar som følgje av sjukdom eller behandling av sjukdom (Til dømes organtransplanterte, kreft, HIV, revmatoid artritt eller andre sjukdomar) 
• Svært alvorleg fedme (KMI over 40)
• Annan alvorleg og/eller kronisk sjukdom der influensa utgjer ein alvorleg helserisiko, etter individuell vurdering av lege. 

I tillegg vert følgjande rådd til å ta vaksinen: 

• Helsepersonell og andre tilsette i helse- og omsorgstenesta som har nær kontakt med pasientar ved behandling eller pleie
• Personar som bur med (eller er tilsvarande nære) immunsupprimerte
• Svinerøktarar og andre som har regelmessig kontakt med levande gris
• Saneringspersonell og andre som arbeider med mistenkt eller bekrefta influensasjuk tamfugl. Du finn meir informasjon på nettsida til FHI

Les meir om kven som vert tilrådd å ta vaksiner på Folkehelseinstituttets nettsider

Kva tid kan du ta vaksinen? 

Vaksinen vert levert til kommunen 16.10.23 og er tilgjengeleg etter denne datoen.

Pris

• Personar i risiko- og målgruppa: 100 kr for sjølve vaksinen, i tillegg må ein betala for sjølve vaksineringa. Det er opp til den enkelte vaksinasjonsstaden å fastsetja pris. 
• Personar utanom risiko- og målgruppene må ta vaksine på apotek. Pris er fastsett på apoteket. 

Samvaksinering

Det er tilrådd samvaksinering med korona- og influensavaksinen for enkelte grupper. Du finn informasjon om oppfriskingsvaksine med koronavaksine her. Ein kan få begge vaksiner både hjå fastlegane i kommunen, på Røde kors-huset, og på utvalde apotek (alle apotek tilbyr influensavaksinen, fire tilbyr også koronavaksine) samt på vaksinasjonsdagane i Skogsskiftet.

Desse vaksinane kan takast samstundes; 

• Influensavaksine kan takast samtidig med pneumokokkvaksine (vaksine mot lungebetennelse) eller koronavaksine
• Unntaket er bebuarar på sjukeheim eller svært svekka pasientar. Desse bør venta minimum ei veke mellom to vaksiner. 
• Pneumokokkvaksine og koronavaksine kan ikkje takast samtidig. Her må det gå minst ei veke mellom kvar vaksine.