Eldrerådet

Eldrerådet (ER) er eit av tre lovpålagte kommunale medverknadsorgan, og skal vege opp for at eldre ofte er underrepresenterte i folkevalde organ. Formålet er å sikre at synspunkt frå eldre vert ivareteke i kommunale avgjersler.

Eldrerådet sitt ansvarsområde

Eldrerådet har ikkje vedtaksmynde, men er eit rådgjevande organ for kommunen i alle saker som vedkjem menneske med nedsett funksjonsevne. Det vil seia at rådet har rett til å uttala seg, både på eige initiativ og i saker dei får tildelt, og desse uttalane skal følgja saksdokumenta til det kommunale organet som fattar vedtak i dei einskilde sakene.

Saker som vedkjem eldre famnar bredt, og kan til dømes vere (men er ikkje avgrensa til) saker som omhandlar budsjett, plan, samferdsel, helse og omsorg, og kultur og friluftsliv.

Eldrerådet - samansetjing

Eldrerådet har 9 medlemmer der 6 er frå organisasjonar som representerer eldre, medan 3 er politiske representantar.

Har du innspel til eldrerådet?

Eldrerådet skal representere alle eldre i kommunen og ønskjer å bidra til at det er stor openheit om, og lett tilgang til eldrerådet sine møte.

Organisasjonar og innbyggjarar som har innspel, tips eller ynskje om saker til eldrerådet, kan anten sjølv møta opp i eldrerådet for å legga fram sine innspel, eller senda desse skriftleg til kommunen. Det er fint å få innspel i forkant, slik at rådet kan vera førebudd.

Politisk sekretariat kan kontaktast for dei som har innspel til møta på e-post eller telefon:

E-post: politisksekretariat@oygarden.kommune.no
Telefon: 56 16 16 48 / 969 42 241

Reglement for eldrerådet

Reglementet for Eldrerådet i Øygarden kommune er fastsett 22. februar 2024.

1. Val og samansetning

Kommunestyret avgjer val og samansetning av eldrerådet. Organisasjonar som representerer eldre har rett til å fremje forslag om medlemmar.

Verkeperioden er fire år og følgjer kommunestyreperioden.

Eldrerådet skal vere sett saman av 9 medlemmar og varamedlemmar. Seks av medlemmane skal veljast etter forslag frå organisasjonar som representerer eldre, og av dei tre øvrige medlemmane skal vera politiske representantar.

Eldrerådet vel sjølv sin leiar og nestleiar blant medlemmane.

Fleirtalet av medlemmane skal ha fylt 60 år på valtidspunktet.

Kvart kjønn skal vere representert med minst 40%, så langt det lar seg gjere.

2. Verkeområde

Eldrerådet er eit rådgjevande organ for kommunen.

Medlemmane skal representere interessene til eldre i kommunen, og ikkje andre grupperingar dei ev. er medlem av. Eldrerådet har rett til å uttale seg i saker som vedkjem eldre i kommunen, men ikkje saker som vedkjem einskildmenneske. Rådet har også rett til å ta opp slike saker på eige intiativ.

Eldrerådet har rett til å uttale seg før kommunestyret set ned eit sekretariat, fastset saksbehandlingsreglar, og vedtek budsjett for rådet.

Rådet skal få forelagt sakene på eit tidspunkt som sikrar at uttalane har reell muligheit til å påverke utfallet av sakene. Uttalane skal følgje vidare saksgang, som hovudregel før behandling i andre organ, og som eit minimum til det organet som gjer endeleg vedtak i saka. I relevante saker kan administrasjonen dessutan hente inn innspel frå rådet før ordinær politisk behandling.

Eldrerådet kan ta del i anna medverknadsarbeid i regi av kommunen, innanfor saker som vedkjem eldre. Dette kan eksempelvis vere arbeidsverkstadar og medverknadsarrangement retta mot innbyggjarane.

Eldrerådet kan sende eigne pressemeldingar, brev, uttalar og høyringssvar.

Eldrerådet kan tildelast forvaltningsansvar over budsjettpostar som gjeld eldre.

Rådet har slik møte- og talerett i politiske organ i kommunen: Leiar eller nestleiar for rådet kan få ordet, for å presentera fleirtalsvedtak frå organet, når det skal gjerast endeleg vedtak eller innstillast i saker som rådet har uttalt seg om. Møteleiar avgrensar tida.»

Eldrerådet skal årleg legge fram årsmelding for kommunestyret.

3. Administrativ støtte

Politisk sekretariat syter for sekretariatstenester til rådet. Dette omfattar blant anna klargjering og utsending av sakspapir og møteinnkalling, samt protokollskriving.

Ein representant for kommunedirektøren er administrativt ansvarleg for møta, og har møte- og talerett i møta. Denne rolla er i hovudsak lagt til rådgjevar innan helse, omsorg og velferd.

Omfanget og innhaldet av den administrative bistanden, inkludert opplæringa, skal gjere rådet
kapabelt til å utføre oppgåvene sine på ein god måte.

4. Saksbehandling

Eldrerådet skal følge kommunelova sine bestemmelsar om saksbehandling i kapittel 11, samt kommunen sitt reglement for folkevalde organ (først vedteke av kommunesyret 29.11.23).

Opplistinga i dette kapittelet gjer eit oversyn over dei av desse mest relevante reglane for eldrerådet.

4.1 Møte og innkalling

All saksbehandling skal gjerast i møte. Eldrerådet kan likevel opprette arbeidsutval blant eigne medlemmar for å greie ut definerte oppgåver.

Møta er offentlege og opne for almenta, med mindre det er grunnlag for å lukke, jf kommunelova § 11-5.

Møter vert halde etter oppsett plan, samordna med øvrige politiske møte i kommunen. I ekstraordinære tilfelle kan det kallast inn til ekstraordinært møte, jf kommunelova § 11-2.

Leiar av eldrerådet sett opp saksliste, med bistand fra sekretariatet. Ei sak skal settast på sakslista dersom minst 1/3 av rådet sine medlemmar krev det.

Innkallinga vert som hovudregel publisert sju dagar før møtet.

Innkallingar og protokollar publiserast på Øygarden kommune sine nettsider. Medlemmar og varamedlemmar vert varsla om innkalling på e-post ved publisering.

4.2 Møteplikt

Medlemmar i eldrerådet har plikt til å møte, med mindre ein har gyldig forfall. Reglane for gyldig forfall er strenge.

Medlem og innkalla varamedlem som er forhindra frå å møte må snarast mogleg melde dette til sekretariatet og opplyse om forfallsgrunnen.

Dersom ein må forlate eit møte, må medlemmen søke møteleiaren om permisjon under møtet. Dette kan gjerast munnleg, men det er krav om gyldig forfall.

4.3 I møte

For å vere vedtaksføre må minst halvparten av medlemmane vere møtte og stemme. Vedtak vert som hovudregel gjort med fleirtalet av dei avgjette stemmene, jf kommuneloven § 11-9.

Møtte medlemmar har plikt til å stemme.

Forslag skal som hovudregel vere skriftlege og leverast elektronisk gjennom kommunen sitt politikarportalsystem.

Det er mulig å ta opp saker i møtet, men saker som ikkje er nemnd i innkallinga kan ikkje takast opp til realitetsbehandling dersom møteleiaren eller 1/3 av dei møtande representantane motset seg dette, jf kommunelova § 11-3. Dette gjeld følgjeleg også dersom ein ynskjer å gjere vedtak i referatsaker.

Faste medlemmar og møtande varamedlemmar kan komme med spørsmål til møteleiar og/eller kommunedirektøren sin representant. Spørsmåla skal sendast inn i møteportalen og må gjelde kommunale tilhøve som vedkjem eldre, og vere av interesse for fleire. Spørsmåla bør vere korte og klare.

Ordførar, eller den kommunestyremedlemmen ordførar peikar ut, har møte-, tale- og forslagsrett i eldrerådsmøta, jf kommunelova § 6-1 tredje ledd.

4.4 Teieplikt og habilitet

Eldrerådet er omfatta av kommunelova og forvaltningslova sine regler om teieplikt og ugildskap.
Dersom ein medlem meiner han kan vere ugild i ei sak, pliktar han å melde dette skriftleg på e-post til politisk service i god tid før møtet.

5. Øvrige rettar og pliktar

Eldrerådet er i kommunelova § 5-2 definert som «annet kommunalt organ» og skal følgje dei same bestemmelsane som for folkevalde organ etter § 5-1.

Eldrerådet er omfatta av kapittel 8 i kommunelova, og har rett til fri frå arbeid, arbeidsgodtgjersle, og ev. økonomisk kompensasjon. Eldrerådet er i så måte inkludert i kommunen sitt reglement for godtgjersle, og administrasjonen tek seg av føring av godtgjersle for eldrerådet.

6. Heimel

Reglementet for Øygarden eldreråd er fastsett 22. februar 2024 av Øygarden kommunestyre med heimel i i kommunelova §§ 5-13, 5-2 og 5-12 og forskrift om medvirkningsordninger, samt rettleiaren for eldreråd utarbeida av Kommunal- og moderniseringsdepartementet.