Det var fleire pausar i møtet. Representantane nytta høve til å drøfta saker med andre parti. Frå venstre; Marianne Sandahl Bjorøy (Ap), Andreas Ormevik (MDG) og Sølvi Kobbeltvedt (Sp).

Bakgrunnen for saka er at ved bygging av nye heildøgnsplassar og Sotrasambandet vert det bortfall av parkeringsplassar på Straume.

Mindretalet på (Ap, SV, Sp og Raudt) røysta for innstillinga frå kommunedirektøren der det heiter at ved bortfall av parkeringskapasitet som følgje av bygging av nye sjukeheimsplassar og Sotrasambandet, skal kommunen ikkje byggja nye erstatningsplassar.

Vedtaket på torsdag inneber at det vert arbeidd vidare med å tilstreba med å optimalisera parkeringsareal innanfor eksisterande rådhustomt og i nærliggjande område. Administrasjonen skal koma tilbake med sak snarast mogleg med forslag til optimalisering og kostnadsestimat for alternativ løysing.

- Kommunestyret meiner det er nødvendig å sikra tilstrekkeleg tilkomst og parkering for tilsette, besøkande og pårørande både på kort og lang sikt. Soleis må arbeidet med ei kortsiktig løysing også i stor grad sjåast i samanheng med framtidig strategi- og planarbeid for Straume, heiter det i vedtaket. 

Forslaget som fekk fleirtal, vart fremja av Silvia Haugland (H) på vegner av Høgre, Frp, Sotralista-TVØ, KrF, Venstre og Pensjonistpartiet. Også MDG og Industri- og næringspartiet (INP) støtta dette forslaget.

Vil etablera robustbustader på fire tomter

Kommunestyret vedtok samrøystes å arbeida vidare for å etablera seks robustbustader på fire tomter i Øygarden. Dette er:

• Medarseta, gbnr. 238/620:                       Maks 1 bustad 
• Gamle Kårtveit skuletomt, gbnr. 21/5:       Inntil 2 bustadar, mellombels 
• Haggardsvatnet, gbnr. 27/142:                 Inntil 2 bustader 
• Krossleitet, gbnr. 56/35:                           Inntil 2 bustader 
   

Byggesaksbehandlinga vil avgjera kva for tomter som først kan nyttast til å etablera dei seks robustbustadane som allereie er kjøpt inn. Etablering av robustbustader legg til grunn kontinuerleg oppfølging og tilsyn.

Følgjande tomter kan vurderast dersom det ikkje er mogeleg med etablering på dei fire førstnemnde stadene:

• Klokkarvik, gbnr. 105/138:                      Maks 1 bustad 
• Rong ferjekai, gbnr. 238/170:                  Inntil 2 bustadar, mellombesls 
   

Kommunedirektøren skal koma tilbake med sak hausten 2025 som tek stilling til behovet for å skaffa ytterlegare fire robustbustader. Dersom det er eit slikt behov, skal det i same saka avklarast om det er fleire tomter i kommunen som kan vera aktuelle for desse. 

Etter forslag frå fleirtalspartia (Høgre, Sotralista-TVØ, KrF, Venstre og Pensjonistpartiet) vart det vedteke eit tillegg om at administrasjonen har dialog med dei ulike bygdene før den enkelte bustad vert teken i bruk.

INP fremja eit tillegg om å ta med Ekrhovda og Skjenet som alternative tomter. Dette forslaget fekk fem røyster (INP og MDG) og vart ikkje vedteke.

Ernst Einarsen (H) og Tom Georg Indrevik (H)

Vil ikkje ha eige kommunalt mobilitetsselskap

Kommunestyret slutta seg til innstillinga frå kommunedirektøren og vedtok at Øygarden kommune skal arbeida vidare med mobilitetsløysingar i kommunen som eit prosjekt i Framtidssamfunnet.

Etter framlegg frå fleirtalspartia vart det vedteke eit tillegg om at prosjektet også skal greia ut mogelegheitene for å gjennomføra ei prøveordning med bestillingsteneste i samsvar med prosjekt andre stader i landet. 

Førebyggjande arbeid for barn og unge 

Kommunestyret vedtok plan for førebygging av omsorgssvikt og utvikling av åtferdsvanskar for Øygarden kommune 2025 – 2029 slik han ligg føre med nokre endringar slik tilrådinga var frå levekårsutvalet.

Der heiter det at planen bør i tillegg omtale følgjande forhold:

• Korleis kartleggja risikoutsette  foreldre til dei minste barna?
• For å møta endringane i ungdomskriminaliteten, må det lagast rutinar for rapportering, om dei endringane som skjer på dette området slik at  innsatsen kan setjast inn der det er mest krevjande.
• Fokus på vald utført av barn mot vaksne og, kva rutinar skal følgjast i slike høve .
   

Innsatspunkta i handlingsplanen må formulerast slik at det i undervegs og i ettertid er mogeleg å måla resultat av tiltaka.

Forskotterer spelemidlar

Kommunestyret vedtok å forskottera 1,3 millionar kroner til skateboardområde og lagerbygg ved Spilepollen skule.
I vedtaket heiter det også at kommunedirektøren får fullmakt til å utforma og inngå avtale med Glesnes ungdoms- og idrettslag og Øygarden kommune.

I saksutgreiinga understrekar kommunedirektøren at kommunen er i ein krevjande økonomisk situasjon og bør prinsipielt ikkje forskottera spelemidlar. I denne saka er det allereie løyvd 1,3 millionar kroner, og det er nødvendig å forskottera midlar for at ungdoms- og idrettslaget skal kunna realisera prosjektet. Difor tilrådde kommunedirektøren å gjera eit unnatak i denne saka.

Debatthefte KS 2025

Kommunestyret drøfta innspel frå KS (fellesorganisasjon for kommunane) om Debatthefte KS 2025. Debatthefte 2025 gjev grunnlag for debattar i kommunestyra og fylkestinga og gjev svar tilbake til KS som er avgjerande for standpunkt og politikk.

Det vart vedteke å gje uttale til debattheftet i samsvar med svara som går fram av saksutgreiinga.

I tillegg vart det med 33 røyster vedteke følgjande tillegg etter framlegg frå fleirtalspartia:

Korleis kan de som folkevalde bidra til å skapa forståing i befolkninga og lokalsamfunnet for at ressursane er avgrensa og at dette tvingar frem tøffare prioriteringar og alternative løysingar?

Svar: Her er det ein god del ein kan gjere. Nokre viktige punkt me kan gjere som folkevalde er:

1.    Leggja til rette for god innbyggjarmedverknad i saker der det er hensiktsmessig.
2.    Det er viktig at vi har god debattkultur i dei folkevalde organa, slik at store avgjersler ein tek er godt debattert og argumentert for, og på den måten godt forklart ut til innbyggjarane og media.
3.    Gje rett og god informasjon om dei økonomiske og demografiske realitetane når ein er i kontakt med innbyggjarane.

Dette må gjelda anten det er i valkamp eller om det er på andre arena der ein møter innbyggjarar.

Arbeidarpartiet fremja eit eige framlegg som fekk 12 røyster (Ap,  SV, Sp, Raudt og MDG). Her kan du lesa framlegget. (PDF, 100 kB)

Møtet vart halde på Panorama Hotell & Resort

Endrar forskrift til politivedtekter 

Kommunestyret vedtok å endra ny forskrift i politivedtektene paragraf 9-3

Får ikkje fremja innbyggjarforslag 

Kommunestyret vedtok å ta ein klage på avvising av innbyggjarforslag om framleis drift av Terna barnehage til følgje og oppheva vedtaket frå kommunestyret 18. desember. Bakgrunnen er at det er sendt inn eit innbyggjarforslag til kommunen i november 2024. Innbyggjarforslaget omhandla framleis drift av Terna barnehage, etter at det vart føreslått å leggja ned Terna barnehage i saka om barnehage- og skulebruksplan 2024-2040. 

Kommunestyret avviste innbyggarforslaget i møtet den 18. desember, med grunngjeving om det ikkje kan fremjast innbyggjarinitiativ med same innhald som i sak som er til behandling. Kommunedirektøren har kome til at avvisinga av innbyggarforslaget i kommunestyret var i strid med kommunelova §12-1, 3. ledd ettersom barnehage- og skulebruksplanen på det tidspunktet ikkje var vedteken. Barnehage- og skulebruksplanen vart vedteke i saka etter innbyggarforslaget.

Når det i barnehageplanen no er vedteke å leggja ned Terna barnehage, er det ifølgje kommunelova ikkje lova å ta opp saker som har vore til behandling i kommunestyret i same periode. Kommunestyret vedtok på torsdag difor at innbyggjarforslaget ikkje vert fremja.

Ap., SV, Sp, MDG, INP og Raudt hadde protokollmerknad til vedtaket.

Møte over to dagar

Kommunestyret er denne gongen samla til møte over to dagar. I tillegg til behandling av kommunestyresaker i går, var det presentasjon av prosessar knytt til regionsenteret på Straume. Fredag handla om arealdelen til kommuneplanen. Det vart mellom anna presentert kunnskapsgrunnlag og strategiar.

Her er fleire bilete: 

Tekst:  Vigleik Brekke
Foto: Kjell Andersland og Vigleik Brekke