Det gjekk som det måtte gå. Ordføraren måtte strekkja våpen. Men sant skal seiast; han gjorde ein respektabel innsats fram til han stod i sjakkmatt. Anna Ovidia tykte han gjorde det bra.
- Eg trenar minst ti timar i veka, og mykje av treninga skjer ved at eg møter mostandarar digitalt. Elles er eg aktiv i Sotra sjakklubb, seier Anna Ovidia som er den einaste frå Øygarden som har vore på landslaget i sjakk for ungdom. No går ho i 9. klasse på Fjell ungdomsskule.
Mykje trening
Dei tre siste åra har ho delteke på sjakktrening. Dette er eit digitalt tilbod med faste treningar to dagar i veka. Det er også fysiske treningar i Sotra sjakklubbungdom kvar torsdag i tillegg til trening og turnering med dei vaksne i klubben. Anna Ovidia deltek også i Flere mot Sjakktoppen som er eit prosjekt med mål om å produsera fleire sterke sjakkspelarar i Noreg. Der er det to fysiske og åtte digitale samlingar i året.
Konsentrasjonen er på topp.
I 2019 vann Anna Ovidia Young NM for jenter. I november reiser ho til sjakk-VM for ungdom i Italia. Der skal ho delta saman med tre andre frå Noreg i jenteklassen opp til 16 år. Det er ikkje økonomisk lukrativt å driva med sjakk. Kostnader med reis og opphald må ho og familien dekkja sjølv.
- Vi får litt støtte frå den lokale klubben og frå sponsorar, fortel mora Birte Marie Rine Young.
Då Anna Ovidia var sju-åtte år, vart ho spurt om ho skulle bli like flink som Magnus Carlsen.
- Nei, eg skal bli betre, var det kontante svaret, fortel Birte.
Ordførar Tom Georg Indrevik meiner at Anna Ovidia vil profetera på å driva med dette.
- Sjakkspeling krev mykje av hovudet. Dette vil også hjelpa deg i skulearbeidet, seier ordføraren.
Tekst og foto: Vigleik Brekke