Frå vestre; Ingrid Skjold (ungdommens kommunestyre), Anette Henden (SLT-koordinator), Hege Gundersen (einingsleiar barnevernet), Marius Sylta (kommunalsjef for Oppvekst), Ernst Einarsen (leiar i levekårsutvalet), Tom Georg Indrevik (ordførar), Sven Erik Midthjell (konstituert politistasjonssjef), Morten Ørn (politileiar for Bergen, Askøy og Øygarden) og Kjell Ivar Sletten (fagleiar for førebyggande arbeid Askøy og Øygarden). SLT: samordningsmodell for lokale, førebyggjande tiltak mot rus- og kriminalitet.

Til vanleg er det to politirådsmøte i året der Øygarden og Askøy kommunar møter politiet. Av praktiske årsaker var møtet denne gongen mellom politiet og Øygarden kommune. 

Saker som var til drøfting var trafikale konsekvensar av bygging av nytt sotrasamband, informasjon frå ulike arbeidsfelt i Øygarden kommune, informasjon frå politiet om kriminalitetsbiletet, satsingsområde, ressurssituasjonen og samhandling. 

Ordførar Tom Georg Indrevik seier at politiet er ein viktig arena for dialog om felles utfordringar. 

-    Gjennom disse møta set vi fokus på korleis samhandlinga kan verta endå betre. I dag deltok også ein representant frå ungdommens kommunestyre for første gong, seier ordføraren.

Politileiar Morten Ørn seier at politirådsmøta bidreg til at ein får forankra satsingsområda på høgaste nivå.

- Dette gjer det lettare for å samhandla på utøvande nivå og verta samde om strategiske satsingsområde. Eg opplever samarbeidet med kommunane som godt. Dei har gode innspel i politirådet, seier Ørn.

Politirådet er eit formalisert samarbeid mellom den øvste leiinga i kommunen og lokalt politi. Rådet skal vera eit strategisk organ for det lokale kriminalitetsførebyggjande arbeidet, og sikra utveksling av kunnskap og erfaring mellom politi og kommune. Ein sentral tanke bak politiråda er at kunnskap om lokale problem skal omsetjast til samordna innsats.

Les meir om politirådet her.


Tekst og foto: Vigleik Brekke