Rådgjevar på plan, Ole-Karsten Midtgård orienterte om Smeaheiaprosjektet.

Equinor vart i 2022 tildelt lisens for lagring av CO2 i det geologiske reservoaret Smeaheia under Nordsjøen. Det er planlagt å lagra opp til 20 millionar tonn CO2 i året. Lokalisering av landanlegget står mellom Stura i Øygarden og Mongstad i Alver. Equinor startar planprosessar både i Øygarden og Alver før det vert gjort endeleg val av lokalisering i løpet av mars månad.

Konsept for transport av CO2 er todelt: 

• Ta imot CO2 med skip, mellomlagring på land og vidaresending i røyr for permanent lagring i reservoaret. 
• Frakt av CO2 gjennom røyrleidningar direkte til Smeaheia frå Europa.
   

I vedtaket varslar også PMU mogleg oppheving av tre reguleringsplanar i området.

Til hausten er det oppstart av karbonfangsanlegget i Energiparken i regi av Northern Lights. 

Mogleheitsstudie for nyskapande anlegg på Ågotnes

Plan- og miljøutvalet vedtok å be administrasjonen å arbeida vidare med innhaldet i ei sak om moglegheitsstudie for å etablera eit lågterskeltilbod for fysisk aktivitet på Ågotnes. 

Aktivitetsanlegget skal skapa ein møteplass som særleg treffer dei som ikkje allereie er i organisert aktivitet og er eit tiltak for å møte utfordringar i ungdomsmiljøet på Ågotnes. Prosjektet skal kartleggja korleis ein kan aktivisera dei ulike gruppene og føreslå innhaldet i eit nytt bygg. 

Bygget er tenkt oppført i tilknyting til Ågotnes barneskule og vil fungera som ei erstatning for Frihuset. Studien er finansiert gjennom Vestland fylkeskommune og er venta ferdigstilt til sommaren 2024. Finansiering av vidare prosjekt, investering og drift ligg ikkje føre og må avklarast på eit seinare tidspunkt.

Strategisk designar Glenn Sæstad orienterte om moglegheitsstudie for nyskapande anlegg på Ågotnes.

Detaljregulering for Nordre Maimyra, Brattholmen

Utvalet vedtok å leggja forslag til detaljregulering for Nordre Maimyra, Straume, ut til offentleg ettersyn. Planområdet er på om lag åtte dekar og ligg om lag 200 meter vest for Brattholmen skule. I forslaget er det lagt til rette for 13 bustadeiningar i rekkje, med leike- og uteopphaldsareal og teknisk infrastruktur.

Ja til å starta planarbeid for Ebbesvikgavlen

Plan- og miljøutvalet vedtok med åtte mot tre røyster med heimel i plan- og bygningslova at planarbeid med detaljregulering for Ebbesvikgavlen kan halda fram i samsvar med tidlegare planinitiativ.

Mindretalet (Ap og SV) røysta for innstillinga frå kommunedirektøren om at ein no ikkje skal starta opp planarbeid med detaljregulering for Ebbesvikgavlen, Ebbesvika.

På vegner av Soli Eigedom AS har sivilingeniør Helge Hopen utarbeidd trafikkanalyse med tre alternativ for løysing av trygg skuleveg til Brattholmen skule. 

Frårår å overta fylkesvegstrekningar

Plan og miljøutvalet slutta seg til tilrådinga frå kommunedirektøren og ønskjer primært ikkje å overta eigarskap til fem fylkesvegstrekningar frå Vestland fylkeskommune. 

Dette er ei høyring, og det er fylkesutvalet som gjer vedtak i saka. Det er totalt 7,3 kilometer fylkesveg det er aktuelt å overta.

I tilrådinga frå PMU heiter det også at dersom Vestland fylkeskommune vedtek ei omklassifisering, skal vegstrekningane minst oppgraderast til den standarden rundskriv 97/13 krev før kommunal overtaking.

I saka skriv kommunedirektøren at forventa driftskostnader med dei fem vegstrekninga vil utgjera om lag 1,8 millionar kroner i driftsutgifter i året. Midlar som fylkeskommunen får overført til vedlikehald av fylkesvegar, vert ikkje vidareført til kommunen ved kommunalt eigarskap.

Saka går til endeleg behandling i kommunestyret.

Her kan du lesa innkalling med saksdokument,

Her kan du sjå opptak frå møtet.


Tekst: Vigleik Brekke
Foto:: Kjell Andersland