Bakgrunnen for saka er auka bruk av elsparkesyklar, særleg blant ungdom. I juli 2022 plasserte utleigeaktøren Geton AS ut 30 elsparkesyklar for utleige i Straume sentrum. Øygarden kommune har pr. dato ikkje lokal forskrift som regulerer slike små elektriske køyretøy.
- Det er viktig at vi får ei forskrift som dette. Det er ei svært positiv sak når vi no får kontroll over dette transporttilbodet, sa utvalsleiar Andreas Kallekleiv.
Det er føreslått å ha ei øvre grense for utleige av slike køyretøy til 168 fordelt på fire område; Straume (100), Rong (14), Ågotnes (40) og Skogsskiftet/Skogsvåg (14). Det er føreslått å gje løyve til inntil to tilbydarar i inntil tre år.
Det er føreslått at framlegget til forskrift vert lagt ut på offentleg høyring i seks veker. Saka går til endeleg behandling i kommunestyret den 21. juni.
Innfartsparkering - status og vidare utvikling
Utvalet tilrår overfor kommunestyret å støttar oppsummeringspunkta i ei sak om innfartsparkering. Dersom kommunestyret sluttar seg til tilrådinga, inneber det at ein skal arbeida vidare med etablering innfartsparkering på Ågotnes på kommunal grunn rett nord for dagens innfartsparkering ved kollektivterminalen. Tiltaket vert finansiert ved å omdisponera 2,4 millionar kroner i belønningsmidlar frå prosjektet «bysyklar i regionsenter Straume».
I saksutgreiinga går det fram at det er registrert om lag 450 parkeringsplassar for innfartsparkering ni stader i kommunen. Det er best kapasitet for slik parkering i straumeområdet og ågotnesområdet.
Tilrådinga vart gjort mot eí røyst (Folkets parti FNB).
Sluttrapport parallelloppdrag Straume
Utval for samfunnsutvikling tilrår å ta sluttrapporten for parallelloppdrag Straume til orientering. Dei 10 råda som går fram av sluttrapporten vert lagt til grunn for det vidare arbeidet med utviklinga av regionsenteret.
Utvalet slutta seg til eit framlegg frå Arbeidarpartiet om ei tilleggsformulering på eitt av dei 10 råda. Dette punktet vert då slik: Sats på grøn mobilitet og mjuke trafikantar, med særleg fokus på tilgjenge også for grupper med fysisk og psykisk funksjonsnedsetjing (tillegget i kursiv. Her kan du lesa alle dei 10 råda. (PDF, 84 kB)
I tilrådinga heiter det vidare at kommunedirektøren vert beden om å koma tilbake med ei sak hausten 2023, som vil konkretisera dette arbeidet, og som vil gje kommunestyret høve til å ta stilling til vegval og gjera nødvendige prioriteringar.
Saka går til endeleg behandling i kommunestyret.
Tre saker knytt til Miljøløftet
Utvalet behandla tre saker som gjaldt Miljøløftet. Når det gjeld innspel til handlingsprogrammet til Miljøløftet for 2025-2028, vart det tilrådd ei tilleggsformulering, føreslått av Arbeidarpartiet, om at kollektivaksen vert vidareført frå Ågotnes til kommunedelsenteret til Rong. Det vart elles tilrådd å arbeida med prosjekt inn mot handlingsprogram 2025-2028 slik det går fram av oppsummeringa av saka. Tilrådinga vart gjort mot eí røyst (Folkets parti FNB).
Med same røystefordeling vart det tilrådd å slutta seg til handlingsprogrammet for Miljøløftet slik det låg føre som vedlegg til saka og å ta årsmelding for Miljøløftet for 2022 til orientering.
Uttale til Nasjonal transportplan NTP 2025-2036
I uttalen til Nasjonal transportplan tilrår utval for samfunnsutvikling å støtta opp under Statens vegvesen si vurdering av Kollsnes/Sture som samfunnskritiske nasjonale funksjonar og meiner at strekninga Kolltveit til Kollsnes/Sture må verta omklassifisert til riksveg. I NTP 2025-2036 må det øyremerkast midlar til oppgradering og beredskap for denne strekninga. Dersom regjeringa berre vel å omklassifisera til riksveg fram til Ågotnes, må likevel utbetring av Dale bru sikrast i NTP gjennom øyremerkte midlar til Vestland fylke.
I tilrådinga heiter det vidare at kommunestyret er positiv til ei forlenging av byvekstavtalen utover 2029 og meiner regjeringa må sjå bort frå lågaste økonomiske ramme som eit alternativ til vidare finansiering av avtalen.
Høgre føreslå eit tillegg i tilrådinga som fekk seks røyster (Høgre, Frp, Sotralista og KrF) om at det vil vera positivt for kommunen og regionen vår at følgjande tiltak kjem inn i NTP:
- Realisering av K5 alternativet Bergen-Voss
- Hordfast
- Ringveg aust
- Nyborgtunnelen
Arbeidarpartiet, uavhengig, Raudt og Folkets Parti FNB røyta imot dette tillegget. Saka går til endeleg behandling i kommunestyret.
Offentleg ettersyn av framlegg til Renovasjonsteknisk norm for Øygarden kommune
Utval for Samfunnsutvikling vedtok å leggja framlegg til Renovasjonsteknisk norm til offentleg ettersyn. Høyringsperioden vert sett til fire veker frå kunngjeringsdato
Tilrår to oppstartsvedtak
Utvalet tilrår å gje kommunedirektøren fullmakt til å gjera oppstartsvedtak for ombygging av Grønamyrvegen innafor gjeldande budsjettrammer. Det vart også tilrådd å gje kommunedirektøren fullmakt til oppstart av tiltaket fiskerilager i Porsvika dersom det er innafor vedtatt budsjettramme.
Vidaresender sak om avhending av kommunale bygg
Utval for samfunnsutvikling vedtok å vidaresenda sak om avhending av kommunale bygg til formannskapet utan innstilling.
Her kan du lesa saksdokumenta.
Tekst og foto: Vigleik Brekke