Vedtak i plan- og miljøutvalet

Plan- og miljøutvalet i Øygarden kommune har i møte den 05.06.25, i sak 060/25, gjort vedtak om at forslag til områderegulering Energiparken, planID 20220003, vert lagt ut til høyring og offentleg ettersyn etter plan- og bygningsloven §§ 5-2 og 12-10. Vedtak følgjer under:

1. Plan- og miljøutvalet fremjar saka og legg områderegulering Energiparken, planID 20220003, ut til høyring og offentleg ettersyn etter plan- og bygningsloven §§ 5-2 og 12-10. 
    
2. Ved endeleg vedtak av områderegulering for Energiparken, planID 20220003, vil følgjande planar bli erstatta og oppheva: 
   - detaljregulering for Northern Lights II, planID 20210011 
   - detaljregulering for Energiparken Vest, planID 20210002 
   - detaljregulering for Oksneset, planID 125920190005 
   - detaljregulering for Naturgassparken, planID 125920150002 
   - reguleringsplan for Kollsnes næringspark, planID 125019970002
    
3. Ved endeleg vedtak av områderegulering for Energiparken, planID 20220003, vil planen overstyre følgjande planar for dei områder planen gjeld: 
   - detaljregulering for Northern Lights I, planID 125920180001 
   - detaljregulering for Blomenuten bustadfelt, planID 125920120011 
   - reguleringsplan for Blom bustadfelt, planID 125920080001 
   - reguleringsplan for Gassrøyrleidning Kollsnes-Mongstad, planID 125920060011
   - reguleringsplan for 300kv jordkabel, planID 125919970001
    
4. Ved endeleg vedtak av områderegulering for Energiparken, planID 20220003, vil følgjande planarbeid avsluttast:
   - detaljregulering Energiparken, planID 20210006 
   - detaljregulering Naturgassparken, planID 125920150002».

Kort om planen

Norconsult har på vegne av tiltakshavar Naturgassparken Vest AS utarbeidd framlegg til områderegulering Energiparken. Områdereguleringa er eit samarbeid mellom Naturgassparken Vest og Øygarden kommune. Øygarden kommune deltek i samarbeidet som planmynde. Rolleforhold er avklart i samarbeidsavtale om områderegulering Energiparken.

Planen var til handsaming om oppstart i UFP 08.12.2022 og det var sendt ut varsel om oppstart og offentleg ettersyn av planprogram 04.01.2023. Opprinneleg planprogram vart vedteken 20.12.2023. I etterkant av dette var det vedteke å starta opp ein revisjon av planprogrammet som var sendt på avgrensa høyring 20.11.2024. Revidert planprogram vart vedteke i kommunestyret, sak 051/25, 05.05.2025.

Formålet med Energiparken er å leggja til rette for grøne etableringar for å bidra til dei nasjonale og internasjonale klimamåla. Parken er difor ein av Vestland fylke sine grøne hub’ar, område der ein har særleg potensiale for å kunna ta ut grøne synergiar og få ut symbiose-effektar. Parken inneheld blant anna prosjektet Northern Lights. Northern Lights-prosjektet er ein del av Langskip, den største nasjonale klimatiltaksinvesteringa nokosinne. Prosjektet omfattar mottak, transport, og permanent lagring av CO2, via røyrleidning til i eit undersjøisk reservoar i Nordsjøen utanfor Øygarden. Northern Lights-anlegget opna i 2024.

Føremålet med utvidinga av det allereie regulerte arealet er å kunna leggja til rette for areal til etablering av petrokjemisk industri med karbonfangst- og lagring og andre grøne næringar som kan bidra til å redusera CO2-utslepp, optimalisera energibruk og skapa positive synergieffektar. Det er óg ønskjeleg å legga til rette for ein ny kai for Energiparken der ein kan skipa ut det som vert produsert. Området er ideell for petrokjemisk industri med karbonfangst og lagring fordi ein kan henta naturgass (i røyr) frå Kollsnes prosessanlegg. Naturgassen kan så omdannast til utsleppsfrie energiberarar som hydrogen og ammoniakk. I prosessen kan ein fanga CO2 og senda gassen (i røyr) til Northern Lights for lagring under havbotn i Nordsjøen. I tillegg ligg området sentralt lokalisert ved Hjeltefjorden slik at det ligg godt til rette for uttransport med skip av det som vert produsert. Då ein legg til rette for CO2-fangst i området er óg prosessar som produksjon av metanol frå CO2 aktuelle.

Det er ønskjeleg med ein heilskapleg plan for heile Energiparken, slik at ein kan vurdera og leggja til rette for ulike fellesbehov slik som kai, fellesfunksjonar, felles infrastruktur, beredskap, felles massehandtering m.m.

Dokument i saka

Plandokument er tilgjengeleg i det offentlege planregisteret til kommunen. Dokumenta ligg under fanekortet «Planbehandlinger» og under behandlingstype «1. gangs behandling».

Plankart

Plankart for Energiparken

Saksgang

Grunneigarar, naboar og andre interesserte vert i denne fasen invitert til å koma med merknadar og innspel til planforslaget. Kommunen og forslagsstillar vil vurdera alle merknadar som kjem inn i høyringsperioden. Etter gjennomgang av merknadane, og eventuell omarbeiding av planforslaget, vert saka teke opp til politisk behandling for endeleg vedtak. Heile planprosessen kan følgjast via postlista til Øygarden kommune. Søk etter saks nr. 22/6642.

Har du merknadar til planarbeidet?

Har du merknadar til planarbeidet? Eventuelle merknadar og innspel kan sendast til kommunen: 

• elektronisk høyringsinnspel 
• e-post til postmottak@oygarden.kommune.no 
• brevpost til Øygarden kommune, v/Areal og samfunnsplan, Ternholmvegen 2, 5337 Rong 

Frist for å koma med merknad er sett til: 15.08.2025.

Generelle opplysningar 

Merknadar som kjem inn er kommunen sitt grunnlag for å vurdera eventuelle endringar i planforslaget, og vert vurdert og referert for politisk myndigheit. Vi svarar difor ikkje på merknadar enkeltvis. Minner óg om at merknadar er å rekna som offentlege dokument, og kjem på postlistene til kommunen. Vi ber om at de ved all kontakt med oss gjev opp saka sitt saks nr. 22/6642.