Frå landstinget på Stord i 2021. Biletet viser ordførarane som deltok. Heilt til venstre; ordførar Tom Georg Indrevik. Framme står styreleiar Sama Hamre Sekkingstad.

Landstinget vert arrangert annakvart år. Styreleiar er ordførar i Alver kommune, Sara Hamre Sekkingstad. 

Dagleg leiar i Nynorskkommunane (LNK), Svein Olav B. Langåker, seier at målet med landstinget er å laga ein framtidsverkstad for nynorsk i kommunane.

– Me gler oss til å arrangera landstinget vårt i verdas mest folkerike nynorskkommune, Øygarden.

Landstinget er ope for alle interesserte og samlar både folkevalde, kommuneleiing og tilsette frå dei 85 kommunane og tre fylkeskommunane som er medlemmer i LNK , i tillegg til fleire regionråd og interkommunale føretak. 

Språkstyrking

Eit aktuelt tema for konferansedelen av programmet blir korleis ein kan styrkja nynorsk som eit bruksspråk i alle delane av kommunen, frå barnehage og skule til bibliotek, vaksenopplæringa og kommuneadministrasjonen.

– Øygarden kommune har tatt fleire grep for å styrkja arbeidet med nynorsk, og har utvist stor vilje til å få landstinget til kommunen. Eg ser fram til å samarbeida med Øygarden kommune om å laga til eit spennande og aktuelt program for landstinget til neste år, seier Langåker.

Svein Olav B. Langåker

Fungerande ordførar Anita Garlid Johannessen gler seg stort over at landstinget vert arrangert i Øygarden.

- Vi set svært stor pris på dette. Øygarden er ein bynær kommune som opplever at nynorsken er under press. Difor er det så viktig for Øygarden kommune å følgja opp språkbruksplanen med gode språktiltak. Dette gjeld både administrativt og ikkje minst i skule og barnehage. Eit landsting med godt fagleg påfyll er viktig og til inspirasjon for språkarbeidet i kommunen, seier Johannessen som tidlegare har engasjert seg i lokalt språkarbeid gjennom Sotra Mållag.

LNK er ein landsdekkjande organisasjon som skal arbeida for å skapa positive haldningar til nynorsk språk og kultur og for at kommunane og styresmaktene tek desse sakene opp gjennom sine planverk. LNK tek på seg å vera talerøyr for medlemene og spreia informasjon som styrkjer dialektane, nynorsk skriftspråk og dei kulturtradisjonane dette står for.

På dagtid dei to dagane i juni vert det aktuelle seminar og føredrag som er aktuelle for kommunal tilsette, politikarar og andre som er opptekne av språktema i det offentlege rom.


Tekst og foto: Vigleik Brekke