Torsdag 30. mars avslutta 14 polske byar og tettstadar eit 3-dagars besøk i Noreg med ein tur til Øygarden. 

Byar som Poznan, Tuchy, Wroclaw og Gdansk har utmerka seg i Polen med satsingar på bruk av data til å forbetre innbyggartenester, nyutvikling av tenester, tilgjengeleggjering av informasjon, med meir. I regi av den polske systerorganisasjonen til KS (Association of Polish Cities) var dei i Noreg for å utveksle erfaringar og sjå på tilsvarande initiativ. Alle som deltok hadde hatt prosjekt som hadde utmerka seg i Polen. 

Innbyggartorg og bibliotek på Straume var vertskap og arena for besøket. I løpet av ein fullspekka dag fekk delegasjonen innblikk i:

• Kommuneadministrasjonen sine erfaringar med bruk av digitale verktøy til bruk i innbyggardialog i planprosessar ved rådgjevar Sven Kallevik.
• Organisasjonen MOT sitt arbeid for å gjere ungdom robust og klar for vaksenlivet med leiar av MOT, Regine Oen Hatten. 
• Involvering av innbyggarar i arbeidet med den fyrste samfunnsplanen ved samfunnsplanleggarar Eli Fosso og Kristina Espeseth. 
• Korleis kommunen arbeidar med å gjere tilgjengeleg hallar, fasilitetar og utstyr til organisasjonar og innbyggararar ved frivilligkoordinator Julia Valeska Woehlert. 
• Korleis innbyggartorg og bibliotek legg til rette for offentlege diskusjonar og sosiale møteplassar ved leiar for innbyggartorg og bibliotek, Yngvild Wiese. 

I lunsjpausen var høgdepunktet ein kulturell godbit frå kulturskulen. Ole Vincent Sandvik (5. klasse) song Little People frå musikalen «Les Miserables.» 

Ordførar Tom Georg Indrevik og kommunedirektør Johnny Breivik helsa på besøket. I sine ord til gjestene, la Indrevik vekt på behovet for at Europa står samla, og at dialogen og erfaringsutvekslinga mellom landa fortset i eit godt spor. Spesielt i den krevjande situasjonen Europa no står i. 

Christian Larsen frå KS og Alicja Stachowiak frå Association of Polish Cities var nøgd med besøket til Øygarden. Dei framheva at spesielt satsing på, og involvering av ungdom var av stor interesse, også for framtidig samarbeid. Både KS og den polske systerorganisasjonen er med i det pågåande samarbeidet mellom Øygarden og den polske byen Krosno. Krosno var ikkje ein del av dette besøket, men tema både tema som å skapa robust ungdom, innbyggarinvolvering, leiing og utvikling vil vere  sentralt i dette framtidige partnerskapsarbeidet.

Tekst: Kenneth Sangolt, leiar for Service
Alle foto: Farshid Amini, Innbyggartorg og bibliotek.

Fotogalleri