Frå kontordagen i Skogsskiftet. Frå venstre; Tone Kyrkjeeide Åsebø (plan), Jarle Sælensminde, Lisbeth Selstø (plan) og Svein Otto Jacobsen (plan- og miljøutvalet).

Leiar i kommuneplanutvalet Svein Otto Jacobsen (Frp) og medlem i utvalet, Elizabeth Toft Erichsen (V) var på plass saman med fleire frå plan for å hjelpa innbyggjarar og andre som hadde konkrete spørsmål og innspel til arealdelen til kommuneplanen 2026-2039.

I sist veke vedtok kommunestyret planprogrammet til kommuneplanen. Fram til 8. mars 2026 er det mogleg å gje arealinnspel til kommuneplanen. Det er kontormøte på innbyggartorga og biblioteka på Straume tysdag 3. februar og på Rong torsdag 5. februar, begge dagar klokka 12.00 – 18.00.

Den 12. februar vert det invitert til kontordag for næringslivet på innbyggartorget på Straume kl. 10.00 – 16.00.

Svein Otto Jacobsen seier at det var åtte-ti personar utanfor innbyggartorget og biblioteket i Skogsskiftet klokka 12 på torsdag.

- Vi er svært godt nøgde med oppmøtet, og vi fekk gode tilbakemeldingar på dette opplegget frå dei som møtte opp, seier utvalsleiaren.

Frå venstre; Tone Kyrkjeeide Åsebø, Lisbeth Selstø og Elizabeth Toft Erichsen

Kontordag fungerte godt

Jarle Sælensminde var ein av dei som fekk hjelp på torsdag. Han er tidlegare lokalpolitikar og oppteken av at Klokkarvik skal vera ei levande bygd. 

- Det fungerte godt med kontordag. Dette er noko som burde vore fast, gjerne ein gong i månaden. Eg fekk svar på mange av mine spørsmål. Eg opplevde at dei forstod kva eg meinte, seier han.

Men det betyr ikkje at han er like godt nøgd med alt. Det lokale kystlaget har bygd eit sjøaktivitetssenter og ønskjer no å byggja nokre mindre flyttbare buer på seks kvadratmeter like ved senteret. Han er ikkje sikker på om kystlaget får løyve.

- Vi har betalt fem tusen kroner for førehandskonferanse. Vi må søkja om dispensasjon frå 100-metersbeltet og dispensasjon ettersom området er definert som hamn. Det betyr totalt 40 tusen kroner i gebyr på to dispensasjonssøknader som kanskje ikkje vert godkjende. Vi er ikkje sikker på om vi kan ta sjansen på dette, seier Jarle Sælensminde.

Les meir om arealdelen til kommuneplanen her. 

Tekst og foto: Vigleik Brekke