Planen er eit offentleg privat samarbeid mellom Øygarden kommune og Marin Eide AS. Området i sør er på 364 dekar og er no utmark som i kommuneplanen er sett av til næringsformål og LNF.

Formålet med planen er å leggja til rette for marin næringsklynge på Eide. Etableringa av kaianlegg på vestsida vil gje kort veg til marine råvarer, medan det på land er plass for å etablera marin verksemd med produksjon, forsking og utvikling i nasjonal skala. Planframlegget er samansett av omfattande materiell med fleire rapportar og konsekvensutgreiingar.

Legg ut kommunedelplan for Knarrvika

Utvalet vedtok samrøystes å leggja ut kommunedelplan for Knarrvika ut til offentleg ettersyn. Formålet med planen er å sikra at det ikkje vert sett i gang ny nærings- og hamneverksemd i området som kan føra til auka risiko for samfunnskritisk infrastruktur i området utover det som allereie er identifisert i ROS-analysane.

Den samfunnskritiske infrastrukturen omfattar både dagens sotrabru og det nye sambandet i tillegg til vass- og straumforsyning. Dette vert gjort ved å oppretta omsynssoner. Planen gjeld i all hovudsak innføring av restriksjon- og faresoner. I saksutgreiinga skriv kommunedirektøren at planen legg til rette for at Knarrvika skal vera ein attraktiv industripark med føreseielege og framtidsretta næringsareal.

Avsluttar sak for Myrane
Utval for plan vedtok å avslutta sak som gjeld detaljreguleringsplan for Myrane, Spjeld. Formålet var å leggja til rette for oppføring av inntil 26 bueiningar. I grunngjevinga skriv kommunedirektøren at han ikkje ser grunnlag for å arbeida vidare med planen når tiltakshavar ikkje lenger ser ut til å stå bak planinitiativet.

Utvalet behandla 14 klagesaker.

Her kan du lesa saksdokumenta.

Tekst: Vigleik Brekke