Jubilerte for Nordsjøfartmuseet

Rundt 90 inviterte gjester deltok på 25-årsjubileet for Nordsjøfartmuseet på onsdag denne veka. Onsdag var sjølve jubileumsdagen. Torsdag var det konsert med Real Ones.

Nokre av gjestene på jubileet. Frå venstre; Jim Young (Shetland Bus Friendship Society), Tom Georg Indrevik (ordførar) Jenny Heggvik (leiar Nordsjøfartmuseet) , Øyvind Stang (direktør Museum vest) Charles Grant (Shetland Bus Friendship Society/Scalloeay Museum) og Natalia Golis (fylkesvaraordførar).

Mellom gjestene var fylkesvaraordfører, ordførar og kulturleiarar frå Øygarden kommune, gjester fra Shetland, styreleiarar, direktør og kollegaer i Museum Vest, styreleiar i Stiftinga Nordsjøfartmuseet, samarbeidspartnarar, frivillige, Telavågfolk og arkitekten Paal Kahrs.

Onsdag 26. april var det kransnedlegging ved minnestøtta i Telavåg med ordførar i Øygarden, Tom Georg Indrevik, Jim Young og Charles Grant frå Shetland, Jenny Heggvik frå Nordsjøfartmuseet og elevar frå Spildepollen skule, Martha og Alexandra. Det vart lagt ned kransar frå Shetland, Øygarden kommune og på vegner av Lidice Memorial/Lezaky Memorial.

Sjølve jubileumsarrangementet starta på museet kl. 14.00. Jim Young frå Shetland Bus Friendship Society/Scalloway Museum hadde føredrag om Nordsjøfarten sett frå Shetland, og tale ved Charlie Grant, fra Shetland Bus Friendship Society/Scalloway Museum.

Deretter var det musikalsk innslag ved Sara Troland og Jørn Austbø.

Det var kransenedlegging ved minnestøtta i Telavåg. Frå venstre; Charles Grant, Jim Young, Jenny Heggvik, Tom Georg Indrevik, Martha Midttveit Kleve og Alexandra Busomoke.

Opning av utstillinga "Livet i eksil"

Ein del av jubileumsmarkeringa var offisiell opning av utstillinga Livet i eksil. Denne utstillinga handlar om nordmenn som flykta frå heimlandet under krigen og korleis dei opplevde eit nytt tilvære som krigarar i eksil.

Alle som flykta vart innlemma i den norske eksilstaten sin innsats i krigen, anten som soldatar eller som sivilt personell i støttefunksjonar. Nordmenn i eksil tenestegjorde i dei fleste delar av verda, som Amerika, Atlanterhavet, Stillehavet, Storbritannia og Europa. For mange var dette ei tid fylt av spenning og meistring, men det var òg farar, saknad, brutalitet og traume. Nokre blomstra i slike tilhøve, andre lengta mest heim.

Utstillinga inneheld bilete, gjenstandar og opplevingar frå fleire sider av eksiltilværet, både det militære og det sivile, frå barn og vaksne, kvinner og menn.

Utstillinga Livet i eksil vil vera open for alle frå sesongstart sundag 30. april kl. 12.00 .
Deretter var det jubileumsbuffet med talar ved ordførar, fylkesvaraordførar Natalia Golis, styreleiar i Museum Vest Børge Haugetun, direktør i Museum Vest Øyvind Stang og til sist major Harald Gåsø frå Bergenhus festningsmuseum.

Ordførar Tom Georg Indrevik sa at gjennom det tette samarbeidet med museet i Scalloway er bandet styrkt mellom Øygarden og Shetland.

- Diverre er museet meir aktuelt en nokon gong når vi no på nytt opplever krig i Europa. Sjølv om de fleste museum skal formidla noko historisk, så er det avgjerande å fornya seg utan av det går utover det tidsvitnet et slikt museum utgjer. Det har dei har ved museet klart å gjera på ein glimrande måte, sa ordføraren.

Frå utstillinga "Livet i eksil".

Til slutt var det snikpremiere på filmen "Englandsfarere" ved Sanden Media. Filmen skal visast på NRK til hausten.

Venskapsavtale

Ved 25-årsjubileet har det vore fokus på venskapsavtalen mellom Shetland og Øygarden kommune. Det har vore eige program over tre dagar for dei utanlandske gjestene med besøk til Fjell festning, Northern Ligtt i Øygarden med meir.