Mottaksanlegget i Øygarden

Klokka 15.30 vert dørene opna for publikum i eit telt med plass til tusen personar. Det vert enkel servering av mat og drikke og underhaldning fram til det offisielle programmet tek til.

Ein time seinare, klokka 16.30, er det klart for offisiell opning av Northern Lights Celebration: Ready for CO2. Der vil du mellom anna møta energiminister Terje Aasland, ordførar i Øygarden Tom Georg Indrevik, Kor i Øygarden, Øygarden kulturskulekor, artisten Daniel Kvammen og Rong Brass. Etter den offisielle opninga, kan du delta på omvising på anlegget.

Påmelding

Arrangøren har behov for å vita kor mange som kjem, og har laga ein nettstad som du enkelt kan registrera deg. Det kan du gjera her. 

- Når vi no opnar opp for at alle kan vera med og feira denne viktige milepålen for Øygarden og for verda, håpar me at mange har lyst til å ta turen til Northern Lights denne ettermiddagen. Øygardsfolket har tradisjon for å stilla opp når det skjer store hendingar i kommunen, og dette vert eit nytt avsnitt i minneboka! seier kommunikasjonsleiar Kjersti Nordøy i Equinor Kollsnes og Sture.

Også ordførar Tom Georg Indrevik håpar at folk nyttar høvet til å vera med på denne historiske hendinga.

-    Dette er noko som kan skrivast med feit skrift i historiebøkene. Her i Øygarden skal vi få vera med og markera starten på karbonfangst og lagring og synleggjera det grøne skiftet. Eg er stolt over at Øygarden skal få vera vertskap for dette. Eg håpar folk møter opp og bidreg til at dette verkeleg vert ein folkefest, seier ordføraren.
 

Benedicte Staalesen seier at Northern Lights ønskjer å visa takksemd til alle som har bidrege til at dette er vorte ein realitet. 

- Støtta frå politikarar, administrasjonen og innbyggjarane i Øygarden har vore viktige suksesskriterium, seier ho.
 

Transport

Det vil vere valfri busstransport til og frå tilstellinga. På nettsida for påmelding finn du meir detaljar om dette.

Tekst: Vigleik Brekke
Foto: Northern Lights