Frå venstre; Anne Hilde Flindt, Christel Borge Bersaas-Nesse, Lisbeth Hjortland, Veronika Lyngve (vararepresentant), Ingvild Skaar, Christian Daae Hansen, Renate Toft, Rune Kobbeltvedt og Stine Waagsbø Lillbø.Ingvild Skaar er vararepresentant i kommunestyret for Arbeidarpartiet. Daae-Hansen er representant i kommunestyret for Framstegspartiet.
Ønskjer streng handheving av forskrift om elsparkesyklar
Rådet behandla forskrift om utleige av små elektriske køyretøy (elsparkesyklar) på offentleg grunn.
RFF ønskjer å peika på kor viktig framkomst er for alle innbyggjarar og streng handheving av reglementet, særleg § 6 h om fjerning, flytting og rydding der det lyder slik: “Utleigar skal på eige initiativ fortløpande, og seinast innan eitt døgn, fjerna, flytta og rydda små elektriske køyretøy”. RFF meiner eitt døger er for lang tid og ber om at kommunestyret vurderer at denne tida vert redusert i forskrifta.
Rådet tilrår kommunestyret å vurdera behovet for strengare krav til geogjerde og henstillingsplass og bruksområde (for eksempel at sykkelen ikkje kan køyra inn på Sartor Storsenter eller over Sotrabrua), særleg i sentrumsområde. Andre kommunar har for eksempel følgjande formulering i sine forskrifter: “Syklane skal vera utstyrte med teknologi for å kunna avgrensa bruken av syklane geografisk (geofencing), for eksempel i parkar og gågater.”
Elles sluttar RFF seg til framlegget frå kommunedirektøren om ei ramme på 325 elsparkesyklar i Øygarden. I tilrådinga til forskrift om utleige av små elektriske køyretøy på offentleg grunn er maksgrensa for syklar i dei ulike sonene fordelt slik:
- Straume-området 200 syklar
- Rong-området 35 syklar
- Ågotnes-området 50 syklar
- Skogsskiftet-området 40 syklar
Det er føreslått å gje løyve på inntil to tilbydarar i inntil tre år. Tal og plassering kan vurderast på nytt etter ein prøveperiode på tre månader.
Saka skulle etter planen behandlast i kommunestyret den 20. desember. Men det vart då vedteke å senda saka tilbake til administrasjonen slik at råda (eldrerådet, ungdomsrådet og RFF) skulle få gje uttale i saka).
Saka om forskrift går til endeleg behandling i kommunestyret.
Gav innspel til planstrategi
Rådet gav innspel til planstrategi for Øygarden kommune 2024-2027. Der heiter det at RFF ønskjer at arbeid med pårørandestrategi skal takast inn i planstrategien. Ein slik plan skal ivareta arbeidet kommunen har knytt til pårørande og avlastning, med fokus på å sjå pårørande som ein ressurs og at denne ressursen ikkje må brennast ut. Sjå gjerne til kvalitetsnorm for pårørandesamarbeid.
Alle områda er aktuelle for gruppene vi (RFF) representerer. Det som er viktig er tilrettelegging og universell utforming på alle arenaer og i alle livsfasar. RFF ser også at alle områda heng saman, men vil peika at dei demografiske endringane, sosial ulikskap og utanforskap og næringsutvikling, sysselsetjing og inkluderande arbeidsliv er særs viktige for gruppa rådet representerer.
- For å imøtekoma dei demografiske endringane må kommunen sjå på korleis flest mogleg kan inkluderast i arbeidslivet og restarbeidsevna til innbyggjarane kan utnyttast. RFF ber om å bli tatt med når planane skal utarbeidast, heiter det frå RFF.
Tekst og bilete: Vigleik Brekke