Rundt 40 personar deltok på innspelsmøtet for næringslivet

Tellevik ser stor nytte av ei samling som dette.

- Vi skal gje innspel til planprogrammet med strategiar. Med nytt sotrasamband vil det liggja godt til rette for arealutnytting i Øygarden. Eg reknar med at veksten her ute vert større enn dei prognosane som laga. Vi er opptekne av næring, industri og bustad. Det er grunn til å gje ros til Øygarden kommune for dette arbeidet, seier Atle Tellevik.

Kommunestyret har vedteke å leggja ut planprogram med strategiar på høyring fram til 7. desember. Etter at planprogrammet er vedteke i slutten av januar 2026, vert det opna for arealinnspel.

No vert innbyggjarane og andre interesserte inviterte til å koma med innspel knytt til strategiane og den planlagde prosessen. Planprogrammet har fem tema; utvikling for framtida, sentera i Øygarden, leva og bu i heile kommunen, aktivitet i strandsona og næringsutvikling. Det er utarbeidd ei rekkje strategiar for kvart tema.

I forkant av møtet med næringslivet på torsdag, hadde kommuneleiinga møte med Statsforvaltaren og Vestland fylkeskommune der nettopp arealdelen til kommuneplanen var tema. Leiar av kommuneplanutvalet, Svein Otto Jacobsen (Frp), er godt nøgd både med oppmøtet i kultursalen og møtet i forkant.

- Vi er kjempenøgde med oppmøtet i samlinga med næringslivet. På møtet med Statsforvaltaren og fylkeskommunen fekk vi skryt av det arbeidet vi gjer og at vi på ein god måte følgjer opp samfunnsdelen til kommuneplanen, seier Jacobsen.

Atle Tellevik (til venstre) og Svein Otto Jacobsen

Har prosjekt på gang

To av dei som deltok på innspelsmøtet på torsdag, var dagleg leiar Vibecke Kleppe og rådgjevar May-Linn Askeland i Hilleren Prosjektering. Dette arkitektfirmaet har tidlegare også hatt kontor i Øygarden/gamle Fjell, men no er alt samla på Hilleren i Bergen. 

- Vi har både småkundar og større prosjekt på gang her i Øygarden. Det er viktig for oss å følgja med på dette og gje råd til kundande våre. Vi er godt kjende med eksisterande arealplan, men vi er meir usikre på den nye planen. Vi er særleg opptekne av bustadstrategien, og vi reknar med at vi kjem til å gje innspel til planprogrammet, seier Vibecke Kleppe som håpar den nye planen får ein god balanse mellom vern og utvikling av areala.

Hilleren Prosjektering er oppteken av at planen opnar for nytenking.

- Døme på dette er bruken av arealet i sjø. Det kan opplevast som vanskeleg å leggja til rette for flytande bustader. Her oppmodar vi kommunen til å vera framoverlent og tenkja nytt, seier May-Linn Askeland.

Frå venstre; Svein Otto Jacobsen, May-Linn Askeland og Vibecke Kleppe

Omfattande prosess

I innleiinga av møtet orienterte samfunnsplanleggjarane i kommunen om prosessen med planprogrammet. Etter at samfunnsdelen til kommuneplanen vart vedteken i 2022 er det etter ein omfattande prosess utarbeidd eit kunnskapsgrunnlag. 

Tidleg medverknad har gjeve kommunen oversikt over verdiar og kva som er viktig for innbyggjarane.

På grunnlag av kunnskapsgrunnlaget er det laga utkast til strategiar for arealbruk i framtida i Øygarden. Strategiane i planprogrammet skal saman med samfunnsdelen vera lokale føringar for framtidas arealbruk. I planprogrammet er det også skildring av resten av planprosessen fram til endeleg vedtak i 2027.

Etter at planprogrammet er vedteke i januar 2026, vert det invitert til å koma med innspel til kva areal vi bør utvikla og kva som bør vernast. Første utkast til arealdel for Øygarden kommune vert presentert hausten 2026. Målet er at innan juni 2027 er det vedteke ein arealdel for heile Øygarden kommune.

Her finn du oversikt over arbeidet med arealdelen til kommuneplanen 2027-2039.

Her er meir informasjon om planprogrammet og korleis du kan koma med innspel. 
 

Tekst og foto: Vigleik Brekke