Bilete syner tunnelmunninga mot aust i det søndre løpet av Kolltveittunnelen, mot Bildøyna.

Gjennomslaget i det nordlege løpet skjer eit lite halvår før fristen i OPS-kontrakten med Statens vegvesen. Prosjektsjef i Statens vegvesen Lene Sælen Rivenes er nøgd med å kunna markera gjennomslag allereie no.

— Det er stor stas å feira gjennomslag i den første av totalt fire vegtunnelar på nytt Sotrasamband. Sjølve gjennomslaget fekk vi onsdag føremiddag i 11.30-tida, men feiringa og kaka tok vi i dag.  Arbeidet med  å sprengja ut ny Kolltveittunnel har gått føre seg utan problem eller forseinkingar, noko vi er svært glade for, seier prosjektsjefen. 

Den første sprenginga for tunnelen vart gjennomført 23. juni i fjor. Ifølgje kontrakten med Statens vegvesen var fristen for gjennomslag 10. oktober i år.

— Driving av Kolltveittunnelen har gått etter planen, med godt samarbeid mellom Sotra Link Construction som hovudentreprenør, og LNS som underentreprenør. Vi synest det er moro å nå milepåle 2 nesten eit halvt år før tidsfristen sett av Statens vegvesen, seier Christopher M. Bjerke, prosjektleiar i OPS-selskapet Sotra Link på nettsida til Statens vegvesen og Sotra Link. 


Tekst: Vigleik Brekke
 Foto: Karoline Rage/Statens vegvesen Statens vegvesen