Flyktningteamet i NAV. Frå venstre; Linn Raaheim Nordfonn (programrådgjevar), Catrhine Nicoline Livden Nøkling (fagleiar), Andreas Bauge (programrådgjevar) og Bendik Mongstad Bratland (programrådgjevar).

Øygarden kommune har i 2022 og 2023 totalt teke imot vel fire hundre flyktningar. Dette gjeld både overføringsflyktningar (kvoteflyktningar) og fordrivne frå Ukraina. Dette inneber at både NAV, vaksenopplæringa, prosjekt Ukraina, Helse og velferd og Oppvekst, Øygarden bustadutvikling KF og andre avdelingar har hatt travle tider dei siste par åra.

Cathrine Nicoline Livden Nøkling er fagleiar for avdeling for dei 13 tilsette i flyktningteamet i NAV. Teamet buset overføringsflyktningar, driv introduksjonsprogrammet for alle flyktningane, Jobbsjansen, Kvalifiseringsprogrammet, arbeidsretta oppfølging av flyktningar, familierettleiing og sosialfagleg oppfølging.

Introduksjonsprogrammet

Introduksjonsprogrammet skal førebu flyktningar på det norske arbeids- og samfunnslivet med mål om arbeid eller utdanning i løpet av programtida.  Øygarden vaksenopplæring har ansvar for samfunnsopplæringa for overføringsflyktningane, medan NAV har ansvaret for samfunnsfagleg opplæring for ukrainarane. 

Det vert teke inn nye deltakarar i programmet kvar månad. Programmet har individuell gruppeundervisning 3 x 2,5 timar i veka, arbeidsretta undervisning, språkkafé, munnleg norsktrening, jobbverkstad, marknadsdag og fysisk aktivitet. Det er individuelt tilpassa på tre nivå. 

- Dei fleste i dette programmet kjem frå Ukraina. Introduksjonsprogrammet for denne gruppa er på seks månader (for personar i alderen 18-55 år). Dei som kjem frå Ukraina har rett til introduksjonsprogrammet, seier Andreas Bauge. 

- Dei kan også forlengja dette programmet med seks nye månader dersom dei har progresjon og motivasjon og om det er sannsynleg at dei vil nå sluttmålet om å koma i arbeid, seier Cathrine Nicoline Livden Nøkling.

Det vert teke inn nye deltakarar i programmet kvar månad. Dette viser at det er eit stort behov for fleire arbeidsplassar og praksisplassar. Målet med praksisplassar er å få språk- og arbeidstrening utanfor klasserommet eín til fem dagar i veka i ein avtalt periode. Deltakarane får oppfølging frå programrådgjevar i praksisperioden.  Av dei ukrainske deltakarane som har avslutta introduksjonsprogrammet, har 74 % kome i arbeid (pr. primo november). NAV er takksame for det gode samarbeidet med arbeidsgjevarar. 

- Det er nødvendig å halda fram med det gode samarbeidet for at vi skal lukkast. Vi har eit felles ansvar for å lukkast med å få flyktningane ut i arbeid. Vi treng kontakt med arbeidsgjevarar, både offentlege og private, seier Andreas Bauge.

Kvalifiseringsprogrammet

Eitt av tiltaka i regi av NAV er kvalifiseringsprogrammet som er retta mot personar med nedsett arbeids- og inntektsevne. Linn Raaheim Nordfonn seier at dette programmet kan innehalda praksis og kurs og andre tiltak. 
Cathrine Nicoline Livden Nøkling seier at målet er at deltakarane skal koma ut i arbeid. 

- Vi har 40 deltakarar i dette programmet. Ein del har vore utan arbeid over tid. I dette programmet arbeider vi med mange forskjellige tiltak tilpassa den enkelte. Det handlar mellom anna om å koma inn i gode rutinar, seier ho.

Jobbsjansen

Formålet med Jobbsjansen er å kvalifisera heimeverande innvandrarkvinner som ikkje har rett på andre ordningar. Prosjektet er finansiert med 80 prosent frå Integrerings- og mangfaldsdirektoratet (IMDi) og 20 prosent frå Øygarden kommune. Dei siste åra har det vore 25 ulike nasjonalitetar som har vore deltakarar i Jobbsjansen. I 2022 avslutta 75 prosent av deltakarane til jobb eller utdanning. Så langt i 2023 har 90 prosent avslutta til løna arbeid. Deltakarane har fått jobb som personalrådgjevar, saksbehandlar, butikkmedarbeidar, barneahageassistent, assistent på eldresenter, kantineassistent, hotellmedarbeidar, grunnskulelærar og servitør. 

- Vi har eit felles ansvar for å lukkast med å få flyktningane ut i arbeid. Vi treng kontakt med arbeidsgjevarar, både offentlege og private, seier Andreas Bauge.

Andre tiltak

Ukrainarar som er klare for jobb har jamleg marknadsdagar der dei oppsøkjer arbeidsgjevarar med førespurnad om praksis og arbeid. Dei har med seg CV og informasjon om kontaktperson i flyktningteamet. 

På nyåret skal det i samarbeid med Øygarden vaksenopplæring startast opp ei ny ordning der norskopplæringa og praksisen vert meir føreseieleg og får eit sterkare fokus på bransjenorsk. Denne ordninga vekslar mellom praksis og norskkurs.


Tekst og foto: Vigleik Brekke