Ny kulvert i Idrettsvegen er det første fullførte prosjektet i Øygarden i regi av Miljøløftet. Biletet er frå opninga 3. mai 2023.

Haldningsundersøkinga er gjort kvart år sidan 2018 i Bergen. Frå 2021, etter at fire nye kommunar kom med i byvekstavtalen, er også Alver, Askøy, Bjørnafjorden og Øygarden med i undersøkinga.

Undersøkinga viser også at innbyggjarane i Øygarden i mindre grad har høyrt om Miljøløftet enn dei andre kommunane som er med i byvekstavtalen. Øygarden er også mellom dei kommunane som er mest positiv til privatbilisme og negativ til bompengar. I Øygarden er forholdsvis fleire positive til snøggbåt mellom Bergen og Øygarden og at køyrefelt vert omdisponerte til kollektivfelt på innfartsårene til Bergen slik at bussen kjem raskare fram.

Målgruppa for undersøkinga er personar 18 år og eldre i Bergen, Alver, Askøy, Bjørnafjorden og Øygarden kommunar.

Her er nokre av resultata i undersøkinga:

• 64 prosent har høyrt om Miljøløftet, av dei er 69 prosent positive
• Kjennskapen til Miljøløftet blant dei mellom 20 og 29 år  har auka frå 37 til 58 prosent
• 81 prosent av innbyggarane i Bergen er positive til Bybanen (77 prosent i heile Miljøløftet-området)
• 50 prosent i Bergen er ganske eller svært positive til bompengar (44 prosent i heile Miljøløftet-området)
• 82 prosent er positive til kollektivprioriterte køyrefelt
• Det er høg positivitet til hurtigbåt mellom omlandskommunar og Bergen

Her er nokre av resultata for Øygarden

• Høyrt om Miljøløftet? Alle: 64 prosent (3 prosentpoeng meir enn 2022). Øygarden: 58 prosent (minst av alle kommunane)
• Haldning til bompengar: Øygarden har flest som er ganske negativ eller svært negativ (65 prosent) til bompengar. Totalt: 57 prosent ganske negativ eller svært negativ.
• 60 prosent i Øygarden er ganske negativ eller svært negativ til å bruka bompengar til andre transporttiltak enn veg (t.d bybane eller annan høgkvalitets kollektivutbygging)
• 88 prosent i Øygarden er svært positiv eller ganske positiv til privatbilisme. Alle: 74 prosent
• Haldninga til Miljøløftet i Øygarden er litt meir positiv enn til dømes Bjørnafjorden, Askøy og Alver
• 80 prosent av dei frå Øygarden er svært positive eller ganske positive til at køyrefelt vert omdisponert til kollektivfelt på innfartsårene til Bergen slik at bussen kjem raskare fram. Det er litt høgare skår enn dei andre nabokommunane til Bergen.
• 79 prosent i Øygarden er svært positiv eller ganske positiv til snøggbåt mellom Bergen sentrum og Øygarden.
• 24 prosent  i Øygarden har høyrt om byvekstavtalen. Øygarden og Bergen skårar lågast på dette.
   

Les fleire detaljar i undersøkinga her. (PDF, 869 kB)

Tekst og foto: Vigleik Brekke