Statsforvaltaren har gått gjennom kommuneopplegget for statsbudsjettet (PDF, 142 kB). Den pårekna veksten i frie inntekter for Vestland er på 4,5 prosent, medan veksten samla for landet er berekna til 4,7 prosent. Det er rekna med ein skatteauke for kommunane frå 2023 til 2024 på 5,8 prosent. Veksten i frie inntekter må mellom anna dekkja auka kostnader som følgje av befolkningsutviklinga og auka pensjonskostnader.
Den pårekna kostnadsveksten for i år er no redusert frå 5,2 prosent til 4,5 prosent. Den er samansett av lønsvekst (5,5 prosent) og prisvekst på kjøp av varer og tenester (3,2 prosent).
Maksimalprisen for barnehageplass er føreslått til to tusen kroner pr. månad. Dette er ein reduksjon på tusen kroner.
Endrar fordeling av havbruksfondet
Når det gjeld utbetaling frå havbruksfondet vil fylkeskommunane sin prosentdel av fondet auka frå 12,5 prosent til 20 prosent. Det inneber at delen til kommunane vert justert tilsvarande ned frå 87,5 prosent til 80 prosent. Neste ordinære auksjonsrunde finn stad hausten 2024. Grunnrenta vil variera frå år til år, mellom anna ut frå utviklinga i prisar og kostnader. Det er lagt opp til ei ekstraløyving til kommunesektoren i år når grunnrenta er høg.
2,6 milliardar til Langskip-prosjektet
Regjeringa føreslår å løyva 2,6 milliardar kroner i 2024 til framleis satsing på Langskip, fullskalaprosjektet for CO2-handtering i Noreg. Langskip omfattar CO2-fangst på sementfabrikken til Heidelberg Materials (tidlegare Norcem) i Brevik og på avfallsforbrenningsanlegget til Hafslund Oslo Celsio, og transport og lagring av CO2 på kontinentalsokkelen ved Northern Lights, eit samarbeid mellom Equinor, TotalEnergies og Shell. CO2 vert ført med skip til mottaksanlegget i Øygarden før klimagassen vert ført i røyr ut i Nordsjøen og lagra under havbotnen.
Sotrasambandet
Det er sett av 3,8 milliardar kroner til OPS-prosjekta rv. 555 Sotrasambandet i Bergen/Øygarden og E10/rv. 85 Tjeldsund–Gullesfjordbotn–Langvassbukt i Nordland og Troms i 2024.
Tabell inntekter til kommunane i Vestland. (PDF, 78 kB)
Tekst: Vigleik Brekke
Foto: NTB Kommunikasjon/Statsministerens kontor