Frå venstre; Anita Garlid Johannessen, Cecilie Hammersland, Reidun Stavland, Tom Georg Indrevik, Helge Nilsen og Line Barmen.Saman med nestleiar Cecilie Hammersland møtte ho Øygarden kommune ved ordførar Tom Georg Indrevik, varaordførar Anita Garlid Johannessen, nestleiar i utval for levekår, Helge Nilsen, og kommunalsjef for Helse og velferd, Line Barmen.
Tema på møtet var mellom anna rekruttering til helsesektoren, kompetanse og at pasientane er sjukare når dei vert utskrivne frå sjukehus no enn tidlegare. NSF viste mellom anna til at vikarbruken har auka dramatisk frå 2022 til 2023 og at dette også gjeld Øygarden.
Reidun Stavland seier etter møtet at ho opplevde at både kommunen og NSF erkjenner at det er utfordringar innan helsetenesta og at dette vil forsterka seg i åra som kjem. Ho sa at både kommuneøkonomi og rekruttering av sjukepleiarar og anna helsepersonell kan føra til manglande kompetanse og kan få følgjer for oppfølging av pasientar og brukarar i kommunen.
- NSF Vestland opplever at Øygarden kommune har gjort fleire grep for å imøtekoma desse problemstillingane, men at fleire grep må setjast i verk, både i eigen kommune, men og for samarbeidspartar i spesialisthelsetenesta. Det same gjeld i utdanningsinstitusjonane, seier ho.
Stavland seier at NSF Vestland opplevde møtet som konstruktivt. Vi oppfatta at representantane frå kommunen var interesserte og lydhøyre til bodskapen frå NSF.
Ordførar Tom Georg Indrevik seier at dialogen med sjukepleiarforbundet er viktig ettersom dette er ei yrkesgruppe det vert mangel på i framtida.
- Gjennom dette møtet fekk vi idear og innspel begge vegar på korleis vi kan sikra at Øygarden får tilgang til ressursar innanfor dette feltet, seier ordføraren.
Tekst og foto: Vigleik Brekke