Frå venstre; Johnny Breivik, Tom Georg Indrevik, Christine Meyer, Anita Garlid Johannessen og Richard Taule.Ordførar Tom Georg Indrevik hadde fire hovudpunkt på dagsorden for møtet. Det handla om felles utfordringar knytt til ungdomskriminalitet, ny godshamn for bergensområdet, byvekstavtalen/Miljøløftet og ei nysatsing i Øygarden, Framtidssamfunnet.
I tillegg til ordføraren, møtte varaordførar Anita Garlid Johannessen og kommunedirektør Johnny Breivik frå Øygarden kommune. Saman med byrådsleiaren i Bergen deltok politisk rådgjevar Kåre Martin Kleppe og seksjonssjef i staben til byrådsleiaren, Richard Taule.
- Vi opplevde dette som eit svært positivt og konstruktivt møte. Det er grunnlag for samarbeid med Bergen på mange område, seier ordførar Tom Georg Indrevik etter møtet.
Med Framtidssamfunnet skal næringslivet, akademia, det offentlege og det frivillige samarbeida om å finna nye innovative løysingar på morgondagens behov.
- Det er fint å samla kreftene, og det Øygarden arbeider med når det gjeld Framtidssamfunnet er som musikk i øyro mine. I dette prosjektet arbeider Øygarden svært likt korleis vi arbeider i Bergen. Kommunen kan ikkje takla dei framtidige utfordringane åleine. Dette må gjerast saman med næringslivet, akademia og det frivillige, seier Meyer.
Felles utfordringar
Det er kort avstand mellom senterområda i Øygarden og Bergen, og ungdomane vandrar. Leiinga i Øygarden og byrådsleiaren var tydelege på at dei to kommunane har mykje felles utfordringar når det gjeld ungdomsmiljøa og ungdomskriminalitet.
- Vi inviterer gjerne Øygarden til eit tettare samarbeid om utfordringane når det gjeld ungdomskriminalitet, sa Christine Meyer på møtet.
Øygarden kommune er oppteken av å få avklart korleis ein kan få realisert ei framtidsretta hamneløysing for bergensregionen. Allereie i 2015 samla ein seg om at det skal byggjast ei godshamn på Ågotnes.
- Vi treng ikkje mange nye planar og utgreiingar. Det vi har behov for er ei felles plattform. Her ute har vi aktørar som kan byggja ut på Ågotnes, sa ordførar Tom Georg Indrevik.
I samband med byvekstavtalen og Miljøløftet er det i handlingsprogrammet sett av 440 millionar kroner til investeringar i Øygarden i løpet av ein 10-årsperiode. Målet er at veksten i persontrafikken skal skje med kollektivtransport, sykling og gåing.
- Vi vil prioritera prosjekt som har høg måloppnåing. Vi står overfor store mobilitetsutfordringar, og vi har vedteke å få utgreidd etablering av eit eige transportselskap. Når det nye sotrasambandet er ferdig, er vi opptekne av at vi har gode direkteruter mellom Øygarden og Bergen utan bussbyte, sa ordføraren.
Tekst og foto: Vigleik Brekke