Kommunedirektør Johnny Breivik presenterte budsjett og økonomiplan for kommunestyret den 2. november.I framlegget til budsjett vert det likevel understreka at sjølv om det økonomiske handlingsrommet er stramt dette året, er det likevel funne rom for å gjera fleire prioriteringar i tråd med samfunnsdelen til kommuneplanen.
Nøkkeltal
Det er i 2024 budsjettert med 3,47 milliardar kroner i inntekter og eit netto driftsresultat på 14,9 millionar kroner. Netto driftsresultat er i framlegget til økonomiplan gradvis auka til 86,7 millionar kroner i 2027.
Andre nøkkeltal:
- Frie inntekter (skatt og rammeoverføringar) 3,062 milliardar kroner
- Eigedomsskatt 175 millionar kroner
- Investeringar i 2024: 153 millionar kroner
Investereringar
Dei største investeringane i 2024 er rehabilitering av Fjell kyrkje, asfaltering, utbygging av Grønamyrvegen på Straume, ny ungdomsskule på Bildøyna, Chromebooks (skule), utbetring av Sund ungdomsskule, led-lys, uteområde på Foldnes skule og oppgradering av kultursalen i Øygarden rådhus.
I økonomiplanen (investering) er det lagt inn midlar til ny ungdomsskule på Bildøyna (ferdig i 2028) og ny skule på vestsida (oppstart i 2026). Fram mot 2027 er det lagt inn investeringar for 1,1 milliardar kroner.
Omstilling
I innleiinga til budsjettet skriv kommunedirektøren at endringar i verdssamfunnet med klimaendringar, konfliktar og ustabilitet i Europa påverkar samfunnet også her heime. Mange menneske er på flukt, auka energiprisar og behov for auka beredskap set sitt preg på budsjettet.
- Den demografiske utviklinga fører til behov for store omstillingar. Fleire eldre betyr eit større behov for helsetenester framover. Analysane viser at helse- og omsorgstenestene må styrkast vesentleg i åra som kjem, seier kommunedirektør Johnny Breivik.
Tilsvarande viser utviklinga motsett trend når det gjeld barn og unge. Færre barn vil ha behov for barnehageplass, og elevtalet i skulen minkar. Det er difor behov for ein heilskapleg gjennomgang av barnehage- og skulestrukturen for kommunen. I framlegget føreslår kommunedirektøren å ta ein gjennomgang av skule- og barnehagestrukturen med mål om å redusera driftsutgiftene i takt med barne- og elevtalet.
Kommunedirektør Johnny Breivik samtalte med fire kommunalsjefar om satsingsområde i budsjettet. Frå venstre sitjande; Anne-Merete Vabø Haugane (Organisasjon og samfunnssikkerheit), Line Barmen (Helse og velferd), Marius Sylta (Oppvekst) og Silje Haukedal (Kultur og samfunn).Tiltak
I framlegget frå kommunedirektøren er det lista opp ei rekkje tiltak. Samla innsparingstiltak i dei fem kommunalsjefområda utgjer totalt 64,5 millionar kroner i 2024.
Vedlikehald av bygg skal prioriterast. Løysinga er å utnytta arealet meir effektivt. Dette reduserer både vedlikehaldsbehovet og tal på bygg. Økonomiplanen føreset både redusert areal og bruk av færre bygg innan administrasjon og oppvekst.
Den nyleg iverksette vikarpoolen skal vidareutviklast til å verta kompetanse- og bemanningssenteret i kommunen.
- I ein situasjon der utviklinga medfører rekutteringsutfordringar i nokre tenester og overtalige i andre, vert det viktig å kvalifisera tilsette til nye oppgåver. Denne nye tenesta bør også kunna kvalifisera flyktningar raskare til kommunale jobbar, seier Johnny Breivik.
Andre prioriterte tiltak er ein nyskipa arena, Framtidssamfunnet, der ein skal ta ut potensialet i det grøne skiftet og utvikla heilskaplege og innovative helse- og velferdstenester og testa ut løysingar på andre kompliserte problemstillingar.
Kommunedirektøren vil også forsterka arbeidet mot skulevegring og ungt utanforskap. Det er mellom anna føreslått å løya midlar til ei diakonistilling i regi av Øygarden kyrkjelege fellesråd.
I Oppvekst er det mellom anna sett av 12 millionar kroner i økonomiplanperioden til skuleturar for 10. årstrinn. Her er også digital undervisning og språkarbeid prioritert.
Det er behov for fleire plassar med heildøgns omsorg for den eldre delen av befolkninga. Det er sett av totalt 235 millionar kroner til planlegging og bygging av nye omsorgsplassar i økonomiplanen samstundes som heimetenesta og bemanning i institusjonar skal styrkjast framover.
Budsjettet skal til sist vedtakast av kommunestyret den 21. desember.
Les framlegg til budsjett 2024 og økonomiplan 2024-2027 her.
Tekst og foto: Vigleik Brekke