Oleksii Volkov viser stolt fram utstyret han har fått lånt på BUA.

I løpet av januar og fram til 24. februar er det registrert 480 lånarar. I heile 2025 var det 499 som lånte utstyr på BUA som er lokalisert i Frihuset på Ågotnes. Rådgjevar i kultur, Julia Valeska Woehlert opplyser at det er lånt 3 516 ting (utstyr) på BUA så langt i år. Halvparten av lånarane dette året kom til BUA for første gong. Alt utlån på BUA er gratis.

På dagen fire år etter at Russland starta fullskala invasjon av Ukraina møter vi Oleksii Volk som kjem frå Cherkasske i Donetsk fylke i Ukraina. No bur han på Foldnes og jobbar som ringevikar i barnehage. I tillegg har han fått 20 prosent stilling på Kiwi på Skjenet.

Det var eitt par slalåmski til disposisjon då vi var innom tysdag ettermiddag. Redninga er at det jamt og trutt kjem folk og leverer inn utstyr.

Han er elles profesjonell dansar og har gått på internasjonalt danseakademi.

- Eg vil gjerne jobba endå meir, seier Oleksii.

Då han kom til bua tysdag ettermiddag var det tilgjengelege skisko, men ikkje høvelege ski. Etter nokre minutt kom det inn eit par ski som passa godt. Oleksii kunne jubla.

No skal han til Geilo og stå på ski for første gong saman med tre vener. Han ha fått vener gjennom engasjementet sitt i Raudekrossen. Oleksii er naturleg nok spent på korleis det vil gå å ha ski på beina for første gong. 

- Eg har høyrt at nordmennene er fødd med ski på beina. I Ukraina er det luksus å gå på ski. Eg får starta med å læra å stå på skia heilt i ro, seier han.

Stine Sanden prøver å rettleia Oleksii i korleis utstyret skal brukast. Det er fort gjort å misforstå bruken.....

Oleksii kan neppe reknast som særleg skjermavhengig. Han klarer seg utan datamaskin og held seg truast til Nokia-telefonen sin. Han går på innbyggartorget og biblioteket for å lesa e-post.

Oleksii klarer seg med Nokia-telefon

Julia Valeska Woehlert seier at det har vore svært travelt dei to første månadene i 2026. Det er ein god del flyktningar og familiar som kjem til BUA, men lånarane av utstyr kjem eigentleg frå alle samfunnslag. 

Det kalde véret i januar førte til at BUA hadde altfor få skeiser.

- Vi kunne lånt ut firedobbelt med skeiser om vi hadde hatt nok på lager. Eg vil elles seia at folk er svært flinke med å gje oss kvalitetsutstyr. Det er mange som gjerne går på ski eller skeiser ein gong eller to i løpet av vinteren. Då er det eit godt alternativ å låna ustyr på BUA, seier ho.


Tekst og foto: Vigleik Brekke