Ungdomsdelegasjonen og vertskapet i Øygarden kommune samla utanfor rådhuset. Frå venstre; Tom Georg Indrevik, Joanna Frankiewicz, Kinga Prystasz, Jakub Kostycz, Stanintau Rozenbeiger, Kornelis Sysoí, Marta Bania, Aleksandra Guspiel-Kaspreyk, Elin Helland-Jooste og Anita Garlid Johannessen.

I februar reiste elevar frå Fjell ungdomsskule til Krosno, medan denne gongen var det elevar frå Krosno som kom til Øygarden. Elevane fekk møta ordførar og varaordførar onsdag morgon, og fekk høyra om korleis ungdomsrådet får påverka politikken i Øygarden.

Deretter bar det ut til omvising på BUA, der Julia Valeska Woehlert fortalte om korleis BUA bidreg til både sosial og miljømessig berekraft, og korleis lokalsamfunnet er med på å verne om tilbodet. 

Ungdomane besøkte BUA på Ågotnes. Til høgre; rådgjevar på kultur, Julia Valeska Woehlert.

Ungdomane fekk også oppleva båttur ut til Blom visningsanlegg, der guide Jørgen Viksund fortalte ungdomane om arbeidet med berekraftig havbruk. Ungdomane var engasjerte, og stilte mange gode spørsmål til guiden. Aller kjekkast var nok likevel turen i båt ut til visningsanlegget, i fint ver og høg fart. 

På veg til visningsanlegget til Blom Fiskeoppdrett.

Orientering på visningsanlegget.

Etter båtturen drog ungdomane vidare til Energiparken, og fekk grundig informasjon og omvising på Northern Lights av Elisabeth Haugen Algrøy. Gjengen frå Krosno var godt oppdaterte på energisituasjonen i Europa, og det vart ei fin drøfting om moglegheiter og utfordringar for å nå mål om reduserte klimagassutslepp. Som avslutning fekk ungdomane også høve til å klatra til toppen av tankane inne på anlegget – ei oppleving som gjorde inntrykk på fleire.  

Northern Lights

Kvelden vart avslutta med middag saman med ordføraren på Rong Senter, før dei drog vidare for å delta på MOT- ungdomsklubb på Øygarden ungdomsskule. Der fekk dei møta norske ungdomar og delteke på quiz. 

Klare for middag saman med ordførar Tom Georg Indrevik.

Torsdag morgon vart starta saman med 9. trinn på Sund ungdomsskule, der ungdomane frå Krosno fekk delteke på MOT-undervisninga. Her fekk dei øva på å ta modige val og å utfordra eigne grenser. 

Etter undervisinga bar det vidare til lunsj og tur i Glesvær, og deretter testing av Spildepollen sykkelpark.  

Spildepollen sykkelpark

Torsdag ettermiddag var ungdomane også innom Basecamp Repro, og fekk læra meir om korleis ungdomane kan få tilbod om alternativt undervisningsopplegg. Etter det bar turen vidare til innbyggartorget, der dei fekk møta fire representantar frå ungdomsrådet. Det vart gode og engasjerande drøftingar rundt korleis det er å vera ungdom både i Øygarden og Krosno, og korleis ein har høve til å påverka samfunnet rundt seg. Kvelden vart avslutta med felles middag på Egon, der også varaordførar deltok. 
Fredag var det avreise for ungdomane, og dei brukte morgonen på å vera turist i Bergen før returen tilbake til Krosno.

Tekst: Elin Helland-Jooste
Bilete: Elin Helland-Jooste Silvia Haugland og Jørgen Viksund