Kommunen har ikkje plikt til å halde barna med lærebøker eller anna undervisningsmateriell når dei mottek heimeundervisning. Foreldra har heller ikkje rett på økonomisk kompensasjon frå kommunen, dersom dei underviser eigne barn heime.

Retten til spesialundervisning, og/ eller individuell vurdering (karakterar) gjelder ikkje for barn som blir undervist heime.

Barn som blir undervist heime får ikkje vitnemål med karakterar.

Privat heimeundervisning krev ikkje godkjenning på førehand og det er ikkje naudsynt å søke om dette. Foreldra må melde frå til skulen i god tid før dei startar opp med undervisning av eigne barn. Det er fordi det er viktig å planlegge det faglege innhaldet og tilsynet før heimeundervisninga startar.

Melding om privat heimeundervisning vert å sende til nærskulen til eleven. 

Der foreldre har felles foreldreansvar, må begge samtykke i val av heimeundervisning. Dersom dei ikkje er einige, skal barnet gå på offentleg grunnskule. Barn som har fylt 15 år, kan sjølv avgjere val av utdanning, og privat heimeundervisning kan berre gjennomførast med samtykke frå barnet.

Rektor ved nærskulen har delegert ansvar for å føre tilsyn med privat heimeundervisning. Det betyr at ein som er tilsett ved skulen kjem heim til familien, for å sjå og vurdere korleis heimeundervisninga går føre seg (2-4 gangar per år).

Tilsynet kan innehalde:

• Kartleggingsprøver
• Samtale/munnlege prøver
• Skriftlege prøver i aktuelle fag/fagområde
• Vurdering av ulike elevarbeid
• Samtale med foreldre og elev
• Innkalling til særskilte prøver

Skulen skriv rapport frå tilsynet med kopi til foreldra.

Heimeundervisning og tilsyn krev eit godt samarbeid. Dersom skulen ikkje får gjennomført tilsyn på ein forsvarleg måte, eller kjem fram til at heimeundervisninga ikkje oppfyller vilkåra for undervisninga, skal det fattast vedtak om at barnet skal gå i ordinær skule.

1. Oppstart av heimeundervisning

Foreldra melder skriftleg frå til nærskulen til barnet at dei vil ta eleven ut av skulen og starte med heimeundervisning. Rektor meldar frå til rådgjevar for kommunalsjef Oppvekst om at eleven får heimeundervisning.

Skulen sender ut eit svarbrev og inviterer foreldra til ein samtale. I samtalen vert det gitt informasjon om kommunen sin plikt til å føre tilsyn. Det vert og informert om at foreldre kan gjere om på valet, men at det er viktig at skulen vert varsla i god tid slik at skulen kan førebu seg til å ta imot barnet.  Dette er særskilt viktig dersom barnet kan ha behov for spesialundervisning.

2. Tilsyn

Rektor oppnemner ein tilsynslærar som er tilsette på nærskulen til barnet. Tilsynslæraren skal ha god kjennskap til aldersgruppa barnet tilhøyrar, ha kjennskap til mål i læreplanen og kva som er forventa utvikling for aldersgruppa.  Tilsynslæraren skal kunne vurdere arbeidet barnet gjer sett opp mot alder, og skal ved behov vurdere og gjennomføre eigna særskilte prøver. Tilsynet skal skje i samarbeid med foreldra.

Rektor og tilsynslærar utarbeider plan for tilsyn. Tilsyn skal skje ein til to gangar per termin. Utkast av planen for tilsyn vert å sende til foreldra for eventuelle innspel. For elevar som oppheld seg i utlandet i tre månadar eller mindre kan tilsyn skje via telefon og nettbaserte tenester, til dømes e-post og Teams. 

Tilsynslærar gjennomfører tilsyn i høve planen. Tilsynet skal vurdere om barnet får tilsvarande og tilfredsstillande opplæring i høve. § 2-13 i opplæringslova. Det inneber å sjå til at:

• Heimeundervisninga har ei viss grad av struktur.
• Det er ei viss grad av plan i undervisninga
• At undervisninga omfattar dei mest sentrale emna for klassetrinnet i kjernefaga
• At vilkåra for heimeundervisning er til stades

Tilsynslærar har ikkje rettleiingsansvar. Dette er ikkje til hinder for at tilsynslærar på fritt grunnlag kan rettleie foreldra i deira arbeid med heimeundervisning.

Tilsynslærar utarbeider ein rapport etter kvart tilsynsbesøk der alle punkta som er nemnd over vert omtala. Dersom tilsynslærar og rektor er i tvil om at heimeundervisninga er tilfredsstillande, kan rektoren kalle barnet inn til særskilte prøver. Rektor godkjenner rapporten og sender den til foreldra med kopi til rådgjevar for kommunalsjef Oppvekst. 

3. Dersom heimeundervisninga ikkje er tilfredsstillande

Dersom tilsynslærar og rektor vurderer at opplæringa i heimen ikkje er i samsvar med den grunnskuleopplæringa som blir gitt i ordinære skular, skal kommunen v/rektor fatte eit enkeltvedtak som krev at barnet startar på skulen. Foreldra skal få høve til å uttale seg før vedtak vert fatta. Rådgjevar for kommunalsjef Oppvekst skal ha kopi av vedtaket. Dersom barnet ikkje møter på skulen, kan foreldra verte straffa med bøter, jf. opplæringslova § 2-1, siste ledd.

4. Registrering og oppfølging av rutinar for heimeundervisning.

Alle elevar som mottek heimeundervisning vert registrert og informasjon vert sendt til rådgjevar for kommunalsjef Oppvekst. Ved oppstart av nytt skuleår sender rådgjevar ut førespurnad til skulane om dei har elevar som mottek heimeundervisning og om det vert ført tilsyn med desse. Dersom det vert avdekka  at elevar som har heimeundervisning ikkje er registeret eller vert ført tilsyn med, vert det sett inn tiltak straks.