Mål og målgrupper for ordninga
Hovudmål med tilskotsordninga er å auka arbeids- og samfunnsdeltakinga blant personar med innvandrarbakgrunn. Målgruppa for ordninga er innvandrarar, norskfødde med innvandrarforeldre og andre i befolkninga elles.
Kven kan søkja?
Denne tilskotsordninga gjeld alle typar frivillige organisasjonar som ønskjer å setja fokus på integrering og har adresse i Øygarden kommune.
Organisasjonen må vera registrert i Frivilligheitsregisteret, og ha hovudandelen av sine medlemmar i Øygarden kommune.
Rapportering
Organisasjonar som får tilskot, skal senda inn sluttrapport og rekneskap etter at tiltaket er gjennomført. Rapporten skal visa korleis tilskotet har blitt brukt og korleis det har bidratt til å nå målet. Organisasjonar som får fleirårig tilskot, må senda inn delrapport kvart år. Rapportskjema vert sendt ut til alle mottakarar i januar 2026.
Tilskotet skal som hovudregel brukast og rekneskapsførast i 2025. Organisasjonar som er revisjonspliktige eller mottar støtte på 200 000 kroner eller meir, skal senda inn prosjektrekneskap. Dette skal vera revidert av statsautorisert eller registrert revisor.
Søknadsfrist
Søknadsfrist er 1. februar 2025.
Ordningar
Frivillige organisasjonar kan få støtte til aktivitetar og tiltak som fremjar integrering mellom majoritets- og minoritetsbefolkninga i kommunen, og som bidrar til å auka arbeids- og samfunnsdeltakinga blant innvandrarar og deira born. Det kan søkjast om tilskot for inntil tre år.
Fleirårig tilskot vert utbetalt eitt år om gangen, med forbehald om at ordninga består som før og prosjektet vert gjennomført etter plan.
Prosjekt/tiltaksstøtte kan ikkje brukast til generell drift av organisasjon. Organisasjonar som mottar støtte gjennom denne ordninga kan ikkje samtidig få kommunal støtte for same prosjekt.
Ein kan søkja støtte til prosjekt som oppfyller eitt eller fleire delmål:
Ordninga har tre delmål:
Delmål A
Prosjekt som bidrar til å auka mangfald, deltaking og fellesskap i lokalsamfunn og i det frivillige organisasjonslivet, mellom anna ved å motverka utanforskap, rasisme og diskriminering og bidrar til tillit og tilhøyrsle.
Det blir gitt støtte til prosjekt og tiltak som bidreg til auka frivillig aktivitet i lokalsamfunn, og til felles møteplassar mellom majoritetsbefolkninga og innvandrargrupper.
Vidare vert det gjeve støtte til aktivitetar, arrangement og møteplassar som bidreg til å til å motverka fordommar, hat, rasisme og diskriminering. Tiltak skal vera direkte retta mot målgruppa og stimulera til samarbeid og dialog på tvers av grupper og tru- og livssyn, og skapa fellesskap som gjer grobotn for respekt, kunnskap og forståing.
Delmål B
Prosjekt som bidrar til å auka kunnskapen om det norske samfunnet og styrker kvalifisering for deltaking i arbeid og utdanning mellom anna ved å bidra til betre norskferdigheiter og digitale ferdigheiter.
Dette kan vera gjennom norsktrening, arbeidsretta tiltak eller kunnskap om det norske samfunnet. Det kan bl.a. gis støtte til informasjonstiltak om lovar og reglar (rettigheiter og plikter i arbeidslivet, anskaffing av bustad m.m.), offentlege tenester (helse, barnevern, barnehage m.m.) og lokalt frivillig organisasjonsliv. Det kan også gis støtte til tiltak som styrkar den enkelte sine grunnleggjande språkferdigheiter, derunder munnlege ferdigheiter, å kunna skriva, å kunna lesa, å kunna rekna og digitale ferdigheiter.
Delmål C
Prosjekt som førebyggjer negativ sosial kontroll, æresrelatert vald, tvangsekteskap og kjønnslemlesting, og styrkar likestilling mellom kjønna.
Kor mykje kan ein søkja om?
Ein kan søkja om full eller delvis støtte til eit tiltak. Minimumssum per enkelttiltak er kr 10 000.
Foreininga kan søkja støtte til fleire prosjekt. Eitt prosjekt per søknad. For tildelingar over kr 100 000 til ein foreining, vert det krevd revisorrapport.
Søknadsskjema
Søknad om enkelttiltak/prosjekt til integreringsarbeid
Kommunen kan også gje støtte til drift av lokale innvandrarorganisasjonar. Organisasjonar som får tildelt tilskot må ha eksistert i minst eitt år på søknadstidspunktet og ha integreringsformål i vedtektene sine. Organisasjonar som får tildelt driftstilskot kan ikkje ta imot kommunal driftstilskot i tillegg.
Tildelinga av støtte baserar seg på kor mange betalande medlemmer organisasjonen hadde i 2024 som er busett i Øygarden kommune. Det vil sei medlemmar som har betalt medlemskontingent via bank til organisasjonen sin konto. Organisasjonane må leggja frem medlemsliste ved søknad. Kontoutskrift frå bank på betalande medlemmer vert kravd.
Det må vera minimum 20 medlemmar.
Satsar for tildeling av driftstilskot:
- Under 30 medlemmar: inntil 31 000 kroner.
- Mellom 30 og 60 medlemmar: inntil 40 000 kroner.
- Meir enn 60 medlemmar: inntil kr 63 000 kroner.
Basert på medlemstal frå 2024.
Søknadsskjema
Søknad om driftstilskot for innvandrarorganisasjonar til integreringsarbeid