På Sundheimen arbeider sjukepleiarar, vernepleiarar, ergoterapeut, fysioterapeut, helsefagarbeidarar, pleiemedarbeidere og servicemedarbeidere som i fellesskap bidreg til god og heilskapleg omsorg. I tillegg har vi til ein kvar tid lærlingar, elevar og studentar. 

Vi har tilsynslegar tilgjengeleg 5 dagar i veka for bebuararne våre.
På kveld og helg nyttar vi legevakta ved behov.

Hovudmåltida er lagt i desse tidsromma:

• Frukost: 08.30 – 10.00
• Lunsj: 12.30
• Middag: 15.30
• Kveldsmat: 18.30

Frukost og kvelds vert laga til ved kvart avdelingskjøkken. Det er kvar avdeling som bestiller inn mat til dette. 

Ved Sundheimen er det eige storkjøkken som produserer næringsrik, variert, sunn og fersk varmmat alle kvardagar. Dei har stort fokus på å tilpassa kosthaldet til kvar einskild, ut frå dei behov kvar bebuarar har. Det vera seg ekstra næring, dia, glutenfritt ol. 

Om du skulle verte svolten utanom måltida, vert det sjølvsagt laga noko på avdelinga og du vil få tilbod om mat. Om du av ulike årsaker ikkje fekk med deg eit måltid, vil dette verte lagt til sides og servert deg etterpå. 

Det vil alltid verta tilpassa den einskilde sin kapasitet og behov. Også ved natt.

Det er fellesmåltid til alle måltid rundt spisebordet på avdelingane, for dei som er i stand til det.

Dette er bebuar sin heim. På Sundheimen er det inga fast besøkstid. Familie og vener er alltid velkommen. Det er ønskeleg at besøkjande anten går på rommet/leiligheita til bebuar eller i kantina. Dersom det lar seg gjere, ønskjer vi å få beskjed om besøk på førehand. Dette med tanke på at dei tilsette kan forbereda bebuar på at det kjem besøk.

Vi vaskar kleda til bebuarane på avdelingane. Det vert ein del tøy som skal vaskast gjennom ei veke, og det kan difor ta tid frå noko vert lagt til vask til det tilbake på rommet til bebuar. Difor bør ein ha ein del klede i skapet til bebuar.

Vær venleg å merk alle klede og personlege eigedelar med namn. Sundheimen tek ikkje ansvar for klede som kjem vekk, når dei ikkje er merka.

Tøy av silke/ull og fin tøy som ikkje toler ordinervask, bør pårørande ta heim og vaske sjølve.

Vi stryk skjorter og div. når det er tid og høve for det. Men pårørande er velkommen til å stryke for sine

Ved høgtider eller andre merkedagar, set vi pris på om de har lagt fram klede som bebuar skal ha på seg (gjerne fleire moglegheiter). 

Omsorgsbolig med heildøgnsteneste

Bebuar må ha eiga vaskemaskin og system for skittentøysortering. Det er fint om bebuarane også har tørketrommel. Vi er takksam om de kan vaska klede når de er her, vi vaskar også klede. Innimellom blir dessverre klede øydelagt i vask. Dersom det er klede som treng spesiell handsaming, er det fint om pårørande tek dette med heim og vaskar sjølv. Innkjøp av nytt tøy, reparasjonar og stryking av klede må pårørande utføre.

Vi har autorisert fotterapeut som kan tingast ved behov. Sei frå til dei tilsette på avdelinga om du ønskjer å booke time. Det vert sendt faktura/vipps for betaling av dette i etterkant.

Det er mogleg å tinge frisør som kjem til Sundheimen. Sei frå til dei tilsette på avdelinga, som skriv deg opp på ei liste. Enkel frisering og klipp. Det vert sendt faktura/ vipps for betaling av dette i etterkant.

• At du seier i frå om kva som er viktig for deg, slik at vi kan hjelpa deg på best mogleg måte og gje god oppfølging.
• At du gir oss beskjed dersom du går fra avdelinga
• At du tek kontakt med leiinga ved Sundheimen dersom du har tilbakemeldingar eller forbetringsforslag. Vi er tilgjengeleg alle vekedagar på dagtid.
• Om du ønskjer å bidra til fellesskap og trivsel eller vera frivillig hos oss, er du hjarteleg velkomen til å ta kontakt på telefon 56 16 04 00

Det er ikkje lov å røykja inne eller på terrassar. Berre røyking på tilvist plass ute.

Opphald som ikkje er betalingspliktig:

• Opphald for akutt hjelp
• Avlastingsopphald (opphald gjeve som avlastning for pårørande)

Dersom akutt hjelp eller avlastingsopphald strekk seg over 60 døgn i løpet av kalenderåret, og du vert tildelt kort-/ eller langtidsopphald vil døgna med akutt hjelp eller avlastingsopphald telja med i de 60 døgna som gjeld Korttidsopphald over 60 døgn (sjå eige avsnitt).

Opphald som er betalingspliktig:

• Korttidsopphald
• Rehabiliteringsopphald
• Palliasjonsopphald

Korttidsopphald, rehabiliteringsopphald og palliasjonsopphald inntil 60 døgn har ein eigenbetaling på 205 kroner per døgn. Dette fakturerast ein månad på etterskot. Faktura er merka med månad og mengd dagar som det fakturerast for. 

Korttidsopphald over 60 døgn

Vi gjer merksam på at korttidsopphald over 60 døgn i kalender året betalast etter langtidsreglane. 

Korttidsopphold over 60 døgn har eigenbetaling etter inntekt.  Som inntekt reknast årets inntekter på grunnlag av pensjon, andre trygdeytingar, arbeidsinntekter, næringsinntekt, leigeinntekt, renter og anna avkastning av formue, etter frådrag av skatt og gjeldsrenter.

Har du ektefelle, sambuar eller born under 18 år, kan du få frådrag i grunnlaget for eigenandel.

Ved korttidsopphald over 60 døgn kan du få frådrag for faste og dokumenterte utgifter til bustad. Frådraget vert gjeven etter dokumenterte utgifter i inntil 6 månader. Om du får langtidssopphald i løpet av året fell frådraget vekk frå den dagen ein får langtidsopphald. Frådrag vert gjeven etter ei vurdering av dei økonomiske forholda dine. Husleige, kommunale avgifter, straum, hus- og innbuforsikring er utgifter du kan få frådrag for. 

Når du passerer grensa på 60 døgn, vil du få eit varsel om dette, som vil innehalda informasjon om moglegheit for å få frådrag. 

Eigenbetalingsberekninga gjeld frå den dagen det vert passert 60 døgn.

Pris

For inntekt opp til 1G minus fribeløp betalast det 75 prosent. 1G er folketrygdas grunnbeløp (per 01.06.2025) er denne 130 160 kroner. Fribeløpet er (per 01.01.2026) 10 950 kroner. Bebuar som vert lagt på dobbeltrom, utan å sjølv ønskje det, skal ved berekning få eit auka fribeløp på 52 950 kroner.

For inntekt ut over 1G kan det betalast opp til 85 prosent, avhengig av frådrag.

Maksimalsats

Ingen skal betala meir for ein institusjonsplass enn det den reelt kostar. For 2026 er maksimalsatsar i Øygarden kommune 84 000 kroner.

Faktura

Korttidsopphald over 60 døgn fakturerast ein månad på etterskott. Kommunen har tilgang til å ta ut den siste skattemeldinga som ligg føre og til å innhenta opplysningar frå NAV, men dei har ikkje tilgang til opplysningar om andre inntekter og utgifter. Det er difor viktig at dei får inn alle og rette opplysningar, slik at utrekninga og eigenbetalinga vert rett.

Kontaktinformasjon

Det er viktig at dei som sit med eigenbetalinga har rette kontakt opplysningar når det gjeld kven som skal motta økonomibrev for bebuarane. Gje beskjed til institusjonen eller send informasjon på e-post til eigenbetalingsgruppa.

Har du spørsmål retta til dette med eigenbetaling på institusjon, ta kontakt per e-post: egenbetaling@oygarden.kommune.no

Langtidsopphald har eigenbetaling etter inntekt. Som inntekt reknast årets inntekter på grunnlag av pensjon, andre trygdeytingar, arbeidsinntekter, næringsinntekt, leigeinntekt, renter og annan avkastning av formue, etter frådrag av skatt og gjeldsrenter.

Har du ektefelle, sambuar eller barn under 18 år, kan du få frådrag i grunnlaget for eigenandel.

Eigenbetalingsberekninga gjeld frå den dagen det vert gjort vedtak om langtidsopphald. Det gjeld sjølv om du er på Øygarden lokalmedisinske senter, der det opphavleg ikkje er langtidsplassar, men du venter på flytting til ein av sjukeheimane i kommunen.

Du betaler som hovudregel ikkje for den første månaden i langtidsopphald på institusjon. (Unntak: Om du har hatt opphald på institusjon i meir enn 60 døgn i same kalenderår, eller har hatt langtidsopphald ved ein annan institusjon)

Pris

For inntekt opp til 1G minus fribeløp betalast det 75 prosent. 1G er folketrygdas grunnbeløp, per 01.06.25 er denne 130 160 kroner. Fribeløpet er (per 01.01.2026) 10 950 kroner.  Bebuar som vert lagt på dobbeltrom, utan å sjølv ønskje det (med skriftleg informasjon om dette til institusjonen), skal ved berekning få eit auka fribeløp på 52 950 kroner.

For inntekt ut over 1G kan det betalast opp til 85 prosent, avhengig av frådrag.

Maksimalsats

Ingen skal betala meir for ein institusjonsplass enn det den reelt kostar. For 2026 er maksimalsatsar i Øygarden kommune 84 000 kroner.

Trekk frå pensjon/faktura

Langtidsopphald vert trekt direkte frå pensjonen via NAV, men berre for heile månader. Dersom du har fått tildelt langtidsplass midt i ein månad, vil vi senda faktura for dei dagane du har vore på institusjon den første månaden (fakturerast ein månad på etterskot). Nokre mottar faktura i tillegg til NAV trekk, dersom ytinga frå NAV etter skatt ikkje  dekker total eigenbetaling. 

Kommunen har tilgang til å ta ut den siste skattemeldinga som ligg føre og til å innhenta opplysningar frå NAV, men dei har ikkje tilgang til opplysningar om andre inntekter og utgifter. Det er difor viktig at dei får inn alle og rette opplysningar, slik at utrekninga og eigenbetalinga vert rett.

Etteroppgjer

Kvart år vert det gjort eit etteroppgjer der grunnlaget for eigendelberekningane vert samanlikna opp mot opplysningane i skattemeldinga for fjoråret. Heile årets inntekter og frådrag vert rekna med, uavhengig av vedtaksdato for langtidsopphaldet. Det skal likevel berre betalast for den mengd døgn opphaldet har vart. Berekning av etteroppgjeret viser om det er innbetalt for lite eller for mykje eigendel for fjoråret. Du vil motta eit vedtak om etteroppgjer. Ved for lite betalt får ein faktura frå kommunen. Ved for mykje betalt vert du spurt etter  kontonummer kommunen kan tilbakebetale til.

Sluttoppgjer ved flytting eller dødsfall

For å avslutte teneste for langtidsopphald hos Øygarden kommune må vi gjera eit sluttoppgjer. 

Sluttoppgjer er ei kontrollberekning for eit heilt år. Det vil sei alle døgna bebuaren har hatt på langtidsopphald på institusjon det aktuelle året. Sluttoppgjeret vert gjort året ETTER, når skattemeldinga for det aktuelle året før er tilgjengeleg. Eksempel: Sluttoppgjer for 2025 vert gjort når skattemeldinga for 2025 er tilgjengeleg i 2026.

Kontaktinformasjon

Det er viktig at dei som sit med eigenbetalinga har rette kontakt opplysningar når det gjeld kven som skal motta økonomibrev for bebuarane. Gje beskjed til institusjonen eller send informasjon på 
e-post til eigenbetalingsgruppa.

Har du spørsmål retta til dette med eigenbetaling på institusjon, ta kontakt per e-post: egenbetaling@oygarden.kommune.no

Pasientalarm (bebuarknapp)

Bebuarknappen, også kalla pasientalarm, er ei varslingseining som pasienten kan bruka for å tilkalla hjelp. Ho fungerer på same måte som ei tryggleiksalarm, men varselet går direkte til personalet på avdelinga. Bebuarknappen er utforma som ei klokke eller ei halssnor. De som er pårørande kan også bruka knappen dersom de treng hjelp frå personalet når de er på besøk. Vi programmerer bebuarknappen til rommet til pasienten. Slik veit personalet kven som har trykt på knappen og treng hjelp. Bebuarknappen/pasientalarmen er også ein trådlaus «nøkkel» som tilhøyrer romdøra til pasienten.

Besøkskort

Besøkskort på bebuarrom. På rommet til bebuaren er det ein knagg som er merka «RoomMate». Du kan henga eit besøkskort på denne knaggen når du er på besøk. Kortet viser personalet at det er nokon inne på rommet, og vi gjennomfører då ikkje digitale tilsyn så lenge kortet heng på knaggen. For at besøkskortet skal vera aktivert, må du henga det slik at sida med refleksen og teksten «RoomMate» vender ut. Ta kontakt med personalet dersom du treng å låna eit besøkskort.

Tilsynssensor (RoomMate)

RoomMate-tilsynssensor Alle pasientrom har ein RoomMate-tilsynssensor. Sensoren kan varsla dersom du fell eller treng hjelp. Han kan og gje anonymisert videostraum eller bilete frå situasjonen på rommet. Dette gjer at personalet kan kontrollera alarmar og gjera tilsyn utan å uroa pasienten eller gripa unødvendig inn i privatlivet.

RoomMate har fleire typar varsel som vi kan tilpassa til kvar brukar. Tilsette vurderer kva varsel som er aktuelle for bebuaren, og vi gjer dette ut frå samtykket til bebuaren.

Når alarm utløysast

Tilsette bruker telefonen for å ta imot og handtera alle typar varsel. Ved behov kan vi gjera eit anonymisert eller detaljert digitalt tilsyn. Vi kan gjera tilsyn på faste tidspunkt eller når noko skjer i rommet. Vi loggfører tilsynet, men vi lagrar ikkje bilete eller video. Det digitale tilsynet er eit tillegg til det fysiske tilsynet. Dersom ein tilsett eller ein pårørande er registrert som til stades i rommet, kan vi ikkje starta eit digitalt tilsyn.