Som barnehagemynde kan kommunen gje pålegg om retting av ulovlege eller uforsvarlege forhold ved godkjente eller godkjenningspliktige verksemder. Å sikra at regelverk vert følgt fører med seg både ein aktivitet for å vurdera risiko for brot på barnehagelova med forskrifter, og ei plikt til å bruka verkemidla slik at barnehageeigar sin praksis er i tråd med regelverket.
Du kan lesa meir om kommunen si rolle som barnehagemynde her:
Krav til likebehandling og upartiskheit
Det er eit krav at kommunen skal organisera oppgåvene som lokal barnehagemynde adskilt frå oppgåvene som barnehageeigar:
«Kommunene skal likebehandle private og kommunale barnehager når den utfører oppgaver som barnehagemyndighet. Kommunen skal organisere oppgavene den har som barnehagemyndighet adskilt fra oppgavene den har som barnehageeier når dette er egnet til å ivareta kommunens upartiskhet som barnehagemyndighet» (Barnehagelova §11).
For å sikra rettstryggleiken til alle barnehageeigarar i Øygarden kommune, er rolla som barnehageeigar skilt frå rolla som barnehagemynde.
I Øygarden kommune er det stab under einingsleiar for HR, forvaltning og kvalitet som utøver rolla som barnehagemynde, og som utfører lokalt tilsyn etter barnehagelova med forskrifter. Målet med å føra tilsyn er å sikra at barna i kommunen får eit barnehagetilbod av god kvalitet og at barnehagane følgjer gjeldande lover og forskrifter.
Det er barnehageeigar som er ansvarleg for at krav i regelverk vert følgt.
Rettleiing
Som barnehagemynde har kommunen eit ansvar for å, gjennom aktiv rettleiing, sjå til at barnehagane vert drivne i tråd med dei krava som er fastsett i barnehagelova med tilhøyrande forskrifter. Aktiv og god rettleiing er eit viktig verkemiddel for å ha gode barnehagar. Med utgangspunkt i dei opplysningane kommunen får kjennskap til, skal barnehagemynde rettleia barnehageeigar til å følgja regelverket. Gjennom risikovurdering skal ein bestemma kor tid rettleiing er føremålstenleg. Dersom rettleiing ikkje fører til endring, er det naudsynt å bruka tilsyn som verkemiddel. Tilsyn kan óg gjennomførast utan at det først har vore gitt tilbod om rettleiing.
Tilsyn med barnehagar
Øygarden kommune har utarbeida ein plan for systematisk tilsyn med barnehagane, basert på risikovurdering. Det vert skilt mellom stadlege tilsyn og dokumentbaserte tilsyn. Stadlege tilsyn er som regel varsla på førehand, men kommunen har også høve til å gjennomføra umeldte tilsyn. Umeldte tilsyn vil først og framst verta nytta i høve der det er usikkert om kommunen vil kunna avdekka ulovlege og/eller uforsvarlege forhold ved eit meldt tilsyn.
Det er formelle rutinar for korleis eit tilsyn skal gå føre seg, korleis det skal gjennomførast og korleis kommunen skal gi tilbakemelding etter eit tilsyn. Barnehageeigar får skriftleg melding om tilsyn (sett bort ifrå ved umeldte tilsyn) og vil i etterkant av tilsynet få tilsendt tilsynsrapport og evnt eit skriftleg varsel om pålegg om retting dersom det er funne forhold som må rettast. Eit slikt varsel om pålegg om retting skal alltid ha ein frist for tilbakemelding for barnehageeigar.
Om dei ulike tilsyna
Varsla, stadleg tilsyn
Dette er den vanlegaste formen for tilsyn. Tema for tilsyn vert fastsett av barnehagemynde, og er basert på risikovurderingar. Barnehageeigar vert varsla om tilsynet og har høve til å førebu uttale om tilsynstema knytt til barnehagelova og rammeplanen.
Hendingsbasert tilsyn
er basert på hendingar eller forhold som kan oppstå i ein barnehage. Denne typen tilsyn er ofte utløyst av klager eller meldingar om bekymring frå føresette, tilsette eller andre. Hendingsbasert tilsyn kan vera meldt eller umeldt og skal avdekka eit her-og-no forhold.
Er du bekymra for noko i barnehagen bør du først ta dette opp med styrar/dagleg leiar i barnehagen. Dersom du framleis er uroa for om barnehageeigar oppfyller lover og forskrifter, kan du nytta skjema som ligg under barnehage; «er du ikkje nøgd med tilbodet i barnehagen», eller ta kontakt med barnehagemynde: barnehagemynde@oygarden.kommune.no
Digitalt tilsyn
Øygarden kommune utfører kvart år elektroniske tilsyn, basert på risikovurderingar. I det elektroniske tilsynet er det fleire dokumentasjonskrav som skal synleggjera at barnehagen sin struktur (til dømes tal barn, pedagogdekning og grunnbemanning) og innhaldskvalitet er i tråd med lovkrava. Dersom tilsynet avdekker forhold som avvik frå Lov om barnehagar, vert dette rapportert tilbake til barnehagen gjennom tilsynsrapport, med tidsfrist for retting.
Kontroll av årsmeldinga
til alle barnehagane i kommunen kvart år. Denne rapporteringa gir tilsynsmynda grunnlag for å vurdera om bhg følgjer krav om til dømes pedagognorm og norm for grunnbemanning mm. Kan føra til stadleg tilsyn.
Godkjenning av barnehagar
Det er Øygarden kommune som har hovudansvaret for at barnehagar som vert etablert oppfyller krava i regelverket, og sikrar barna eit likeverdig pedagogisk tilbod av god kvalitet.
Barnehagar skal vera godkjent av kommunen før verksemda kan starta.
Kommunen skal i etableringsfasen sjå til at barnehagelova sine krav vert følgt, og at det blir lagt opp til ei forsvarleg verksemd.
Dersom ein godkjent barnehage gjer endringar av eit visst omfang, må barnehageeigar melde dette til Øygarden kommune som barnehagemynde.
Lov og regelverk
Anna regelverk som er relevant for tilsyn med barnehagar
Har du spørsmål?
Ta kontakt med barnehagemynde
E-post: barnehagemynde@oygarden.kommune.no
Telefon: 56 16 16 45 eller 56 16 16 26