Kvifor treng vi omstillingsprogrammet Øygarden pluss?
Øygarden er ein kommune i vekst og endring. I åra som kjem, får vi fleire eldre, fleire unge med store behov og færre hender til å gjera arbeidet. Samtidig vert økonomien strammare. Vi må leggja til rette for store investeringar i skular, helsebygg og bustader fordi folkesetnaden endrar seg. Dette krev at vi skapar økonomisk handlingsrom – ikkje gjennom tilfeldige kutt, men gjennom målretta utvikling og betre bruk av ressursane våre.
For at innbyggjarane skal få gode og trygge velferdstenester også i framtida, må vi redusera driftsnivået og arbeida på nye måtar. Dette handlar ikkje om å svekkja kommunen, men om å ta ansvar – saman – slik at vi kan levera tenester folk kan stola på om fem, ti og tjue år.
Vi må bruka pengane klokare, prioritera det som gir mest verdi, og utvikla løysingar som er meir berekraftige. Vi må arbeida smartare, innovera og styrkja samarbeidet mellom tenester, frivillig sektor og lokalsamfunn. Vi treng løysingar som gjer at fleire kjem i arbeid, at fleire får hjelp tidleg, og at vi effektiviserer drifta utan at kvaliteten går ned.
Øygarden pluss er svaret vårt på desse utfordringane. Programmet samlar dei viktigaste utviklings- og omstillingsprosjekta i eitt felles spor, slik at vi arbeider samla, systematisk og strategisk. Målet er betre tenester, ein betre arbeidskvardag, betre økonomi – og eit betre grunnlag for framtida.
Endringane vi gjer no, vil påverka kvardagen vår. Nokre ting kan bli annleis, men retninga er klar: Vi skal levera gode tenester innanfor dei ressursane vi har. Øygarden pluss handlar om å ta grep no, medan vi framleis kan styra utviklinga, i staden for å venta til utfordringane veks oss over hovudet.
Dette er ikkje eit prosjekt for å spara pengar berre for å spara.
Dette er eit prosjekt for å sikra eit sterkt velferdssamfunn – for alle som bur i Øygarden i dag, og for dei som kjem etter oss.
Ulike satsingsområde i omstillingsprogrammet
I omstillingsprogrammet er det valt ut sju satsingsområde. Det betyr at alle aktivitetar og prosjekt i omstillingsprogrammet handlar om omstilling og utvikling innafor desse fem satsingsområda. Satsingsområda er valt ut på bakgrunn av politiske føringar og samfunnstrendar som påverkar utviklinga vår.
I møte med utfordringsbilete framover er det avgjerande å styrka fokuset knytt til førebygging og mobilisering av innbyggjarar og deira eigne ressursar. Det handlar både om å sikra førebygging i eigne tenester, men også om å legga til rette for at innbyggjarane våre meistrar eigne liv lengst mogleg.
Prosjekt under tidleg innsats kan til dømes vera råd og rettleiing retta mot innbyggjarar for å meistra eigen helse- og bustadsituasjon, eller mobilisering av frivilligheit.
Eit viktig ledd i arbeidet med å omstilla og effektivisera helse- og velferdstenesta handlar om å ta i bruk tilgjengeleg og ny teknologi. Når vi omstiller ulike deler av tenesta vurderer vi alltid korleis teknologi kan bidra til høgare kvalitet og/eller meir effektiv drift av tenesta.
Prosjekt under dette satsingsområde kan til dømes vera meir bruk av teknologi i analyse- og planleggingsarbeid, innføring av ulike digitale hjelpemiddel og verktøy til innbyggjarane våre eller effektivisering av forvaltningsoppgåver.
Ei av hovudutfordringane for framtidig helse- og velferdstenester handlar om mangel på arbeidskraft. Framover vert det viktig å bruka dei ressursane vi har på best mogleg måte. Både tenester og arbeidsoppgåver må truleg organiserast på andre måtar enn i dag. Det kan til dømes handla om å reindyrka oppgåver som krev høgskuleutdanning og å unngå å binda opp helseressursar i oppgåver som ikkje krev dette.
Vidare vert det også nødvendig å ha fokus på heiltidskultur, ulike arbeidstidsordningar og tiltak for å rekruttera og behalda viktig arbeidskraft.
Prosjekt innanfor dette satsingsområde kan til dømes handla om korleis vi arbeidar for å sikra at vi bruker helsekompetansen der det er nødvendig.
For å lukkast i arbeidet med omstilling er det nødvendig å sikra kompetanse og kapasitet til dette arbeidet. Det handlar både om å frigjera tid til utvikling og innovasjon, sjølv i tider der driftsoppgåvene krev mykje fokus. Organisatoriske endringar og tydelege avklaringar av roller og oppgåver er viktig for å sikra ein mest mogleg effektiv organisasjon.
Både PwC-rapporten og Øygarden 2040 (langsiktig driftsanalyse og investeringsplan) peikar på behov for store investeringar framover innan helse- og omsorgsbygg. Det handlar både om å sikra kapasitet i heildøgns omsorgsplassar, kommunale utleigebustadar med meir.
Kva er eit omstillingsprogram?
Det å organisera omstillingsarbeidet i eit program er eit nytt grep i kommunen. Eit program er ein struktur som gjer det mogleg å koordinera og gjennomføra ei rekke prosjekt og tiltak som kan vera avhengig av kvarandre, og må virka saman for å oppnå store endringar.
Gjennom programmet skal vi sikra god oversikt over ulike aktivitetar og utviklingsarbeid som pågår. Vi skal prioritera tydeleg kva innvasjons- og utviklingsarbeid som vert sett i gong, slik at brukar tida våre på det som er mest viktig. Tydeleg prioritering er også viktig for at vi har nok gjennomføringskraft i dei uilke prosjekta våre, og at vi faktisk får til endring og omstilling.
Kva ønsker vi å oppnå?
Gjennom omstillingsprogrammet ønsker vi å prioritera prosjekt som bidreg til at vi når målsettinga om å:
- Oppnå ei berekraftig helse- og velferdsteneste i framtida
- Tilby tilpassa tenester med god kvalitet
- Vera ein attraktiv arbeidsgjevar
Organisering av programmet
Styringsgruppa består av kommunedirektøren og hans leiargruppa. Styringsgruppa har det overordna ansvaret for programmet.
Kommunalsjef for helse og velferd er programeigar. Det betyr at kommunalsjefen er ansvarleg for å levera gevinstar og effektar i programmet.
Programkontoret støttar og legg til rette for god program- og prosjektstyring. Det inneber å støtte og rettleia ulike prosjektleiarar, og sikra god planlegging og gjennomføring i dei enkelte prosjekta.
Prosjektleiar planlegg og gjennomfører ulike prosjekt.