Frå formannskapsmøtet 26. august. På talarstolen Jan Utkilen (Sotralista - TVØ)Denne saka er ei oppfølging av to tidlegare politiske saker om å byggja omsorgsbustader i samarbeid med private aktørar og tilbod om kjøp eller leige av omsorgsbustader til eldre på Ågotnes.
I tilrådinga vert det vist til behovet for å få realisert 40 omsorgsbustader for personar med vedtak om heildøgns omsorgsteneste innan 2028. I saka og tilrådinga går det fram at bustadene vert plasserte på Straume eller i eitt av kommunedelsentera og nær eksisterande institusjon eller heimesjukepleie. Konkurransen gjeld kjøp av nøkkelferdig prosjekt, med opsjon på leige i samsvar med krav til investeringstilskot og meirverdikompensasjon.
Prosjektet må utformast slik at det fyller vilkår for investeringstilskot frå Husbanken og legg til rette for effektiv drift og døgnkontinuerlege tenester. Det må ha infrastruktur for velferdsteknologi og nødvendige servicefunksjonar og lokaliserast nær andre relevante tenester.
Det er venta at konkurransen vert lyst ut i januar 2026 og at bygga står ferdig i 2028.
I saka skriv kommunedirektøren at det står att å avklara kven som skal stå som eigar av bygget, kommunen eller Øygarden bustadutvikling KF. Dette vert vurdert når det er nærare avklart korleis den framtidige bustadforvaltinga i kommunen skal vera.
I debatten vart det drøfta om kor tydeleg ein skal vera i spørsmålet om lokalisering av omsorgsbustadene. Ordførar Tom Georg Indrevik sa at det kan verta aktuelt å konkretisera dette fram mot endeleg behandling i kommunestyret.
Saka vert også sendt til dei tre råda (eldrerådet, råd for personar med funksjonsnedsetjing og ungdomsrådet) før endeleg behandling i kommunestyret.
Finansrapport
Formannskapet tok finansrapport for 2. kvartal 2025 til orientering.
Klagesaker
Formannskapet behandla to klagesaker. I den eine saka klaga Algrøy historielag på at laget ikkje vart tildelt kulturvernmidlar. Historielaget hadde søkt om inntil 30 tusen kroner i støtte. Formannskapet sluttar seg til tilrådinga frå klagesekretariatet om at vedtaket om fordeling av kulturvernmidlar i mai står ved lag.
Den andre klagesaka gjaldt klage på gebyr til vatn og avlaup. Formannskapet vedtok å stadfesta vedtaket om vatn og avlaupsgebyr i februar 2025.
Eigarskapsdag
I forkant av behandling av sakene hadde formannskapet eigarskapsdag. Det var mellom anna informasjon frå ØyVAR AS, Trigger AS, Øygarden bustadforvaltning og Bustadstiftinga.
Her kan du lesa innkalling med saksdokument.
Tekst og foto: Vigleik Brekke