Drøfting i pausen i saka om stenging av Gamle Straumsundet bru.

PMU var samla til møte på torsdag.

Vedtaket om å senda saka over til kommunestyret med notat frå administrasjonen om konsekvensane av ei eventuell stenging av brua, var samrøystes. Utvalet samla seg om dette etter drøfting i felles gruppemøte.

Utvalet tok dermed ikkje stilling til spørsmålet om å stengja Straumsundet bru. Sotra Link har førespurt Øygarden kommune om å nytta Gamle Straumsundet bru som mellombels trasé for mjuke trafikantar og samstundes stengja vegen for trafikk.

To køyrefelt og fortau over Gamle Straumsundet bru

Utvalet vedtok alternativ to som konsept for oppgradering av Bildøyvegen og Gamle Straumsundet bru. Dette inneber ny bru med to køyrefelt og fortau. Seglingsbreidda vert utvida til 24 meter og seglingshøgda vert auka til 3,7 meter.
Gamle Straumsundet bru og Bildøyvegen utgjer eit viktig samband mellom Straume og Bildøyna. Brua har i dag avgrensa bereevne og smal køyrebane utan trygge løysingar for gåande og syklande. Det er også behov for å betra trafikktryggleiken og framkomsten langs heile Bildøyvegen. Prosjektet utløyser derfor ikkje behov for kommunalt låneopptak, og vidare planlegging og gjennomføring vil skje innanfor den økonomiske ramma til Miljøløftet for perioden. 

Prosjekta kan vera ferdigstilt i 2029.

Vil godkjenna plan for Skulebakken, Knarrvika

PMU tilrår å godkjenna detaljregulering for Skulebakken, Knarrvika. Planområdet på om lag 25 dekar ligg like nord for Skjergardsvegen (riksveg 555) og Sotrabrua. 

Formålet med planarbeidet er å leggja til rette for 35 bustadeiningar med tilhøyrande vegar, gangvegar, parkeringsanlegg, uteopphaldsareal og leikeareal. Den nedlagde skulen skal takast vare på og gjerast om til leilegheiter, medan tidlegare Fjell gamleheim/arbeidarbustad i aust skal rivast for å kunna leggja til rette for eit leilegheitsbygg. Det ligg 10 eksisterande, frittliggjande bustadar og ein eksisterande fleirmannsbustad innanfor planområdet.

Saka går til endeleg behandling i kommunestyret.

Prinsippvedtak for utbyggingsavtalar

Utvalet tilrår å leggja ut forslag til prinsippvedtak om utbyggingsavtalar på høyring. Prinsippvedtaket omfattar geografisk avgrensing, innhald, kostnadsdeling, byggherreansvar, fullmakter om avtaleprosess og gebyr. 
Saka går til endeleg behandling i kommunestyret.

Prinsippvedtak om mva-avtalar

PMU tilrår at Øygarden kommune kan inngå avtaler om overføring av justeringsrett og justeringsplikt i samband med prosjekt på offentleg infrastruktur. Ein justeringsavtale med ein kommune er ein avtale der ein utbyggar overfører sin rett til å justera/få tilbake meirverdiavgift (mva) til kommunen ved overtaking, for infrastruktur (til dømes kommunal veg) eller andre offentlege tiltak.

Vil ikkje avslutta arbeidet med fastlandssamband

Plan- og miljøutvalet tilrår overfor kommunestyret at kommunen ikkje avsluttar arbeidet med eit mogleg fastlandssamband Lerøy/Bjelkarøy-Hjellestad, men skal ha dialog og aktiv tilnærming mot lokal og regional mynde dersom framtidig utvikling i saka gjev rom for dette.

Kommunedirektøren hadde tilrådd at det ikkje skulle arbeidast vidare med dette fastlandssambandet og at saka vart avslutta.

Saka går til endeleg behandling i kommunestyret.

Startar ikkje opp plan for hamn

PMU slutta seg til innstillinga frå kommunedirektøren om at det ikkje vert starta opp detaljreguleringsplan for Ågotnes hamn.

I saka skriv kommunedirektøren at Bleivasshaugane er regulert til næring og vil som del av plan for hamna verta regulert på ny. Det er i planprogrammet skildra tre alternativ som alle inneber store terrenginngrep og høg trafikkmengd. Kommunedirektøren tilrådde med bakgrunn i dette at det ikkje vert starta opp planprosess.

Legg ut plan til avgrensa høyring

Utvalet vedtok å leggja avgrensa høyring for områderegulering for Energiparken, Blom. Etter at planen har vore til offentleg ettersyn, er det kome inn 23 merknader. To innspel utfordrar byggjehøgda i to område. Dette gjeld direct air capture (DAC-anlegg) for Energiparken midt og flytande gasskraft-anlegg i Ljøsøysundet. Denne saka gjeld vurdering av desse to innspela. Høyringsperioden er tre veker.

Opprettheld stans for privat plan

PMU sluttar seg til innstillinga frå kommunedirektøren om stans av oppstart av planinitiativ for detaljregulering for Storavatnet, Foldnes. Planområdet er på 90 dekar. Området er regulert til føremålet LNFR, ligg i omsynssone grønstruktur, i tillegg ligg det i gjennomføringssone med krav om overordna plan for Nordre Litlesotra.

Kommunedirektøren konkluderte med å stansa planinitiativet før oppstartsmøte. Tiltakshavarane har stilt krav om å få planinitiativet lagt fram for plan- og miljøutvalet for endeleg avgjerd. Utvalet sluttar seg altså til innstillinga om å stansa planinitiativet.

Her kan du lesa innkalling med saksdokument.

Her er opptak frå møtet på kommune-TV.

Tekst og bilete: Vigleik Brekke