Christopher Meidell Bjerke (Sotra Link) og Lene Sælen Rivenes (Statens vegvesen) oirienterte formannskapet om status for Sotrasambandet.Ho understreka at det vert jobba for fullt i prosjektet.
- Det er ingen stans i arbeidet. Det er heller ingen isfront mellom partane. Det er godt samarbeid, og usemja går på plassering av risiko. Dette er lyfta opp på eit ganske høgt nivå. Samarbeidet går greitt dersom vi ser bort frå den eine usemja når det gjeld risikoplasseringa i kontrakten, sa Sælen Rivenes.
Opphavleg skulle sambandet offisielt opnast 1. juni 2027. Det er tidlegare kjent at prosjektet er forseinka. Pr. nå er opning av anlegget tidfesta til 4. kvartal 2027.
Pr. februar var ein ferdig med 65 prosent av arbeida i tunnelane. No handlar det om innreiing i tunnelane. Halvparten av veg i dagen er ferdig. 55 prosent av konstruksjonane er bygd, og 65 prosent av den nye hovudbrua er ferdig.
Marianne Sandahl Bjorøy (Ap) stilte spørsmål om påviste brot på reglane når det gjeld arbeidsmiljøet. Ho forventa at det vert rydda opp i.
Administrerande direktør i Sotra Link, Christopher Meidell Bjerke, sa at kritikken vert teken på alvor.
- Vi er heilt samde i at det er heilt uakseptabelt å bryta arbeidsmiljølova. Slik skal det ikkje vera. Vi er glade for dei kontrollane som vert gjennomførte. Dette vert det retta opp i, sa Meidell Bjerke.
Ordførar Tom Georg Indrevik sa at det viktigaste er å få ferdigstilt prosjektet. Etter møtet i formannskapet gjev han uttrykk for at han gler seg over at samarbeidsklimaet er godt og sakleg.
Han stilte spørsmål om korleis ein eventuell kostnadssprekk vil slå ut for bompengenivået.
- Vi har ei ramme å forholda oss til. Dersom ramma må aukast, må det opp i Stortinget, sa Lene Sælen Rivenes.
Her kan du lesa meir om Sotrasambandet (nettside Sotra Link).
Tekst og foto: Vigleik Brekke