Deltakarane på møtet mellom Øygarden kommune og Thon Gruppen. Frå venstre; utviklingssjef Kristin Stålerød Ødegård (Thon Gruppen), konsernsjef i Thon Gruppen, Kjetil Nilsen, direktør for kjøpesenter Øyvind Tronier Halvorsen (Thon Gruppen), ordførar Tom Georg Indrevik, næringssjef i Øygarden kommune Marianne Furheim, varaordførar Anita Garlid Johannessen, kommunalsjef for Samfunnsutvikling Øygarden kommune Silje Haukedal og senterdirektør i Sartor Storsenter, Thomas Skålnes.

Thon Gruppen er størst innan eigedom (Thon Eigedom) og hotell (Thon Hotels). Gruppa eig vel 60 senter og over 70 hotell. Thon Eigedom kjøpte opp Sartor Storsenter i september. På nyåret vil senteret på Straume ha namnet Thon Senter Sartor. Våren 2025 var det offisiell opning for Thon Partner Hotel Straume.

- Vi kan seia enkelt at det la seg til rette for at vi kunne investera her ute med hotell og senter. Vi er også interessert i å engasjera oss i bustadutvikling, seier konsernsjef Kjetil Nilsen.

Konsernsjefen hadde også med seg direktør for kjøpesenter Øyvind Tronier Halvorsen og utviklingssjef Kristin Stålerød Ødegård. Også senterdirektør Thomas Skålnes i Sartor Storsenter var med på møtet. 

Nilsen fortel at Olav Thon Stiftelsen deler ut inntil 100 millionar kroner i året til forsking og små og store allmennyttige formål.

Konsernsjef Kjetil Nilsen

Kjetil Nilsen opplevde møtet med Øygarden kommune som positivt og at kommunen ønskjer eit godt samarbeid også med den nye eigaren av senteret.

- Vi er opptekne av lokal drivkraft. Det har det vore her ute, og det byggjer vi vidare på i utviklinga av Straume. Dette er eit stort senter, men elles hadde Olav Thon alltid ein visjon om å så frø også på mindre stader for å skapa utvikling, seier han.

Ordførar Tom Georg Indrevik er glad for at kommuneleiinga fekk møta konsernleiinga i Thon på denne måten.

- Thon Gruppen er avgjerande for utviklinga av regionsenteret på Straume. Det er gledeleg at gruppa har felles interesse for å utvikla området. Det var også inspirerande korleis Thon Gruppen tar sosialt ansvar og deler ut store summar til veldedelege formål, seier ordføraren.


Tekst og foto: Vigleik Brekke