Frå møtet i formannskapet på tysdag. På talarstolen; varaordførar Anita Garlid Johannessen (Frp).Det vert tilrådd at meirkostnaden og eventuelle budsjettjusteringar skal førast inn i samband med behandling av andre kvartalsrapport.
I saka er det også vurdert vertskommunesamarbeid med Askøy. Dette er ei justering av dagens barnevernsvaktordning. Dette alternativet vert av kommunedirektøren vurdert til å vera sårbart fordi barnevernsleiaren må forvalta mynde i to kommunar kveld, natt og helg. I tillegg vert tilbodet frå Askøy vurdert å vera meir sårbart ved eventuelt fråvær som sjukdom eller ved ferieavvikling.
Akuttberedskap i barnevernet er ei lovpålagt oppgåve og gjeld barn som treng hjelp raskt utanfor ordinær arbeidstid mellom kl. 08.00 -15.30. Erfaringa viser at det er vanskeleg å kombinera planlagt og strukturert arbeid samtidig med akuttarbeid. Slik situasjonen er pr. no i barneverntenesta, er det behov for større kapasitet i det kontinuerlege og systematiske arbeidet som i hovudsak skal skje i ordinær arbeidstid.
Saka går til endeleg behandling i kommunestyret.
Usemje om høyringsuttale om berekraftig kommunesektor
Formannskapet er delt om kva høyringsuttale kommunen skal gje i saka om ein berekraftig kommunesektor. Det var semje om dei fleste punkta i innstillinga frå kommunedirektøren.
På to av punkta var det ikkje samrøystes tilråding.
Eit fleirtal på åtte medlemer støttar punkt to om at å flytta lærarnorma til kommunenivå, fjerna lovfesta profesjonskrav og innlemma øyremerka tilskot kan gje betre grunnlag for lokale prioriteringar og meir berekraftig ressursbruk.
Eit mindretal på tre medlemer (SV, INP og KrF) støtta eit alternativ punkt to om at «forslaga om å flytte lærarnorma til kommunenivå ikkje vil betra situasjonen i skulen, og ynskjer heller å halda ved norma for å syta for gode arbeidshøve for både lærarane og elevane.
Jonas Foldnes (SV) fremja forslag om å halda fast på lærarnorma som i dag.INP fekk si eiga røyst på eit forslag om at grunnskuletilskotet må behaldast. Fleirtalet støttar innstillinga frå kommunedirektøren om at grunnskoletilskotet bør avviklast for å sikra nøytrale og faglege vurderingar av skulestruktur.
Saka går til endeleg behandling i kommunestyret.
Tilrår å avslå søknad med støtte til moloprosjekt
RAN Seilforening har søkt om forskottering/forskotteringslån på inntil 105 tusen kroner for sluttføring av reguleringsplan for moloprosjekt. Foreininga har tidlegare fått 300 tusen kroner, og kommunedirektøren skriv at eit eventuelt tilskot må skje gjennom ordningar for lag og foreiningar.
Kommunedirektøren har difor tilrådd å avslå søknaden. Formannskapet slutta seg til dette. Saka går til endeleg behandling i kommunestyret.
Vil kjøpa aksjar i Stavanger2Bergen AS
Formannskapet tilrår med ni mot to røyster (SV og eítt medlem frå Ap) overfor kommunestyret at Øygarden kommune kjøper eín aksje på 20 tusen kroner. Mange kommunar i Vestland og Rogaland har kjøpt aksjar i dette selskapet som skal arbeida for å realisera E39 mellom Stavanger og Bergen.
I saka skriv kommunedirektøren at Øygarden kommune ikkje ligg ikkje i traseen til E39, men likevel så nær at det er viktig for næringslivet i kommunen. Difor er det tilrådd å kjøpa eín aksje på 20 tusen kroner.
Tilrår å vera med i Vestland interkommunalt politisk råd
Hausten 2025 vedtok fylkestinget å oppretta Forsvarsforum Vestland interkommunalt politisk råd (IPR). Formålet er å styrkja samhandlinga mellom fylkeskommunen, kommunane og andre relevante aktørar i saker som gjeld Forsvaret, totalforsvaret, beredskap og forsvarsrelatert næringsutvikling i Vestland.
Formannskapet tilrår at kommunen vert medlem i forumet og sluttar seg til samarbeidsavtalen. Ordføraren vert representant i representantskapet, med varaordføraren som vara. Kommunedirektøren får ansvaret for den administrative oppfølginga.
Saka går til endeleg behandling i kommunestyret.
Evaluering av budsjettprosessen
Kommunedirektøren har tilrådd å gjera nokre endringar i budsjettprosessen. Ordførar Tom Georg Indrevik fremja eit endringsframlegg som fekk samrøystes tilslutnad. Det vart likevel signalisert at endringsframlegget kan verta justert fram mot endeleg behandling i kommunestyret.
Finansrapport
Formannskapet tilrår å ta finansrapport pr. 31. desember 2025 til orientering.
Her kan du lesa innkalling med saksdokument.
Tekst og foto: Vigleik Brekke