Kristin Børve Jacobsen (Frp) røysta imot å busetja flyktningar i 2026, medan Espen Cornell Jacobsen (Ap) slutta seg til innstillinga frå kommunedirektøren om å ta imot 50 flyktningar.

Dette var ei av sakene levekårsutvalet behandla på møtet onsdag denne veka.

I tilrådinga heter det også at Øygarden kommune kan ta imot einslege mindreårige med følgjeperson som del av kvoten. Utover dette kan kommunen ta imot to einslege mindreårige i alderen 13-16 år og to einslege mindreårige i alderen 16-18 år i tillegg til kvoten. Dersom behovet for busetjing aukar i løpet av 2026, vil kommunen koma tilbake dette i samband med ei eventuell ny oppmoding i løpet av våren 2026.

Frp fremja forslag om å ikkje busetja flyktningar i 2026, så lenge dette ikkje er fullfinansiert frå staten/styresmaktene. Forslaget fekk to røyster (Frp og Sotralista-TVØ) og fall.

Kommunedirektøren har grunngjeve innstillinga på 50 flyktningar med at kommunen har teke imot svært mange flyktningar dei siste åra og må no i større grad ivareta dei som allereie er busette. Tilgang på eigna bustader er også ei utfordring. Kommunedirektøren vurderer det slik at eit flyktningmottak på 50 flyktningar vil vera i samsvar med det tenesteapparatet kan handtera.

Saka går til endeleg behandling i kommunestyret.

Budsjett og økonomiplan

Levekårsutvalet hadde også budsjett 2026 og økonomiplan 2026-2029 på sakskartet. Utvalet tok budsjettframlegget frå kommunedirektøren til orientering.

Framtidig organisering av helse- og velferd 

Kommunestyret har bedt om ei heilskapleg vurdering av kvaliteten i helse- og omsorgstenestene som grunnlag for framtidig organisering (svar på verbalpunkt i budsjett 2025). Saka gjev eit samla bilete av status og utfordringar innan kompetanse, leiing, sjukefråvær, bygningsmasse, velferdsteknologi og brukartilfredsheit i helse- og velferdstenestene.
Levekårsutvalet tok saka til orientering. 

Sotralista-TVØ fremja tilrådinga frå eldrerådet om at det primært vert arbeid vidare med èi omstilling av helse og velferd i samsvar med føringane i rapporten om evaluering av drifta i helse- og velferd, Øygarden kommune, gjennomført av PWC Consulting i 2023. 

Forslaget fekk eí røyst og fall.

Frå møtet i levekårsutvalet onsdag. Frå venstreEspen Cornell Jacobsen, Line Barmen (kommunalsjef for Helse og velferd) og Ernst Einarsen (utvalsleiar, H).

Nye tiltak retta mot veteranar

Levekårsutvalet tilrår at det vert vedteke nye tiltak i 2026 og 2027 for oppfølging av veteranplanen. Kommunedirektøren får fullmakt til å oppdatera den gjeldande veteranplanen, slik det går fram av saka. 

Utvalet slutta seg til eit alternativ forslag til punkt tre i innstillinga frå kommunedirektøren. Der heiter det at planen skal evaluerast årleg, og ei skriftleg oppsummering av evalueringa skal leggjast fram for Levekårsutvalet. Dersom det i evalueringa vert klart at det er behov for å endra sjølve planen, skal det fremjast eiga sak om dette.

Dette erstattar det tredje punktet i innstillinga frå kommunedirektøren om at planen årleg skal evaluerast administrativt og at dersom ein etter evaluering ser behov for å endra sjølve veteranplanen, vert den lagt fram for politisk behandling.

Kommunen har i dag om lag 300 innbyggjarar som har deltatt i internasjonale militære oppdrag. Veteranplanen har som mål å sikra god ivaretaking, anerkjenning og oppfølging av veteranar og familiane deira.

Etter evaluering av tiltaka, er det lista opp prioriterte tiltak for 2026 og 2027. Det er at det skal peikast ut veterankontakt, markering av veterandagen 8. mai (kvart år), kompetanseheving for tilsette, opplæring av helsepersonell og etablering av årlege dialogmøte med veteranorganisasjonar.

Prioriterer spelemidlar

Utvalet slutta seg til innstillinga frå kommunedirektøren om fordeling av spelemidlar til ordinære anlegg og nærmiljøanlegg. Straume idrettspark med rehabilitering av kunstgrasbane, klubbhus Skogsvåg stadion og rullepark med lys på Grønatorget (Solsio) står på dei tre øvste plassane på prioriteringslista over ordinære anlegg. På dei tre første plassane på nærmiljøanlegg står multibane på Ågotnes skule, nærmiljøpark/trimpark på Møvika og Skoge og parkouranlegg på Hjelteryggen skule. 

Det er Vestland fylke som fordeler midlane.

Evaluering av verknadene av ein meir praktisk skule

Levekårsutvalet slutta seg til tilrådinga frå kommunedirektøren om å ta saka om verknadane av ein meir praktisk skule til orientering.

Levekårsutvalet slutta seg til eit framlegg frå leiar Ernst Einarsen om at evalueringa viser at det er stor strekk i korleis ein har nytta dei kommunalt tildelte midlane som var øyremerkt utstyr/verktøy for praktiske fag. Tilbakemeldingane frå rektorane viser at ved nokre skular står midlane ubrukt, medan det kan sjå ut som at ein ved andre skular har nytta ekstratilskotet til materiell som burde vore dekka av ordinære driftsmidlar. Tilbakemeldingane frå rektorane viser også at det er stor uvisse knytt til om elevane sitt læringsutbytte har forbetra seg som følgje av tiltaka, noko som i seg sjølv er grunn for ytterlegare oppfølging. 

Levekårsutvalet ber difor om at evalueringa snarast blir følgd opp av administrativ skuleeigar for å sikra at midlane vert brukte i samsvar med vedtaket i kommunestyret.

Bakgrunn for saka er verbalvedtaket i kommunestyret 19.12.2024 der det blei bedt om at det vart lagt fram ei sak som evaluerer verknadane av ein meir praktisk skule.  

Kommunestyret løyvde 500 tusen kroner til utstyr/verktøy for praktiske fag i skulane i driftsbudsjettet for 2024. Dette vart følgt opp i driftsbudsjettet for 2025, der kommunestyret løyvde eín million kroner til oppgradering av utstyrspark for praktisk undervisning i skulen.

Erfaringane viser at samla sett bidreg dei lokale midlane kommunestyret løyver og dei nasjonale midlane vi får tilført, til utvida aktivitet, utvikling og tilrettelegging av opplæringa for alle elevane i skulane i Øygarden.
I saksutgreiinga skriv kommunedirektøren at skulane held fram satsinga på praktisk og variert undervisning og at kommunestyret vurderer løyvingar til dette føremålet i samband med fastsetjinga av driftsbudsjettet for 2026.

Andre saker

• Endring av retningslinjer for tilskot til kulturvern
• Høyringsuttale - Forskrift om tilskot til bygging og rehabilitering av anlegg for 
  idrett og fysisk aktivitet 
• Endring i forskrift om skule- og feriedagar (skulerute) - Øygarden kommune
• Høyringsinnspel til NOU 2025: 8 Folkehelse - verdiar, kunnskap og 
  prioritering
   

Her kan du lesa innkalling med saksdokument.


Tekst og foto: Vigleik Brekke