Frå synfaringa på Eide

Etter ei samling på rådhuset, var det synfaring i det aktuelle området på Eide.

Ordførar Tom Georg Indrevik opplevde møtet med statsorgana som nyttig og konstruktivt.

- Vi set pris på at fleire statlege organ møter oss på denne måten og ved synfaring får god kunnskap om planane for Eide, seier ordføraren.

Planområdet på Eide er på nærare 2 300 dekar og ligg 3,5 kilometer sør for Ågotnes. Formålet med planarbeidet er å leggja til rette for marin næring sør på Eide-halvøya, vidareføra dagens arealbruk nord på Eide og forbetra infrastrukturen. Førebelse analysar peikar i retning av at næringsområdet kan gje arbeidsplass til om lag 3 500 tilsette ved full utbygging.

Før synfaringa var det møte på rådhuset.

På møtet var det representantar frå Statsforvaltaren i Vestland, Kommunal- og distriktsdepartementet, Klima- og miljødepartementet, Miljødirektoratet, Direktoratet for samfunnstryggleik og beredskap (DSB) og Øygarden kommune.

Kommunestyret vedtok områdeplanen for Eide den 31. oktober 2024. Pr. dato står det igjen to uløyste motsegn. Det gjeld delvis manglande og tidvis mangelfulle ROS-vurderingar og dokumentasjon og negativ verknad for hubro sør for Langedalshaugen. 

For å løysa motsegna når det gjeld ROS, har kommunen mellom anna gjort følgjande plangrep:

• Føresegnene konkretiserer at verksemd skal vera marin næring og  innovasjon.
• Det er ytterlegare stilt krav til felles beredskapsplan for å samordna verksemd i nord og sør. Kravet slår inn ved første bruksløyve.
• Storulukkeverksemd er ikkje tillate.

Statsforvaltaren har konkludert med at leve- og funksjonsområda for den sterkt trua hubroen veg tyngre enn dei positive samfunnsmessige interessene ei utbygging på Eide representerer. Statsforvaltaren meiner at planen ikkje kan godkjennast. 

- Det er no opp til kommunal- og distriktsministeren å konkludera i plansaka, seier Nils Erling Yndesdal. 

Frå venstre; Nils erling Yndesdal, Tom Georg Indrevik og kommunalsjef for Samfunnsutvikling, Silje Haukedal.

Yndesdal seier etter møtet at representantane frå departementa og direktorata tydelegvis hadde sett seg inn i saka.

- Dei kom med mange relevante spørsmål til partane. Vi brukte såleis meir tid enn planlagt i møtet slik at kommunen og Statsforvaltaren på best mogleg måte kunne svara på spørsmåla, seier han.

Yndesdal orienterte generelt om dialogen Statsforvaltaren har med kommunane i Vestland i dei mest krevjande plansakene. Dei aller fleste sakene finn si løysing lokalt slik at kommunen som planstyresmakt sjølv kan eigengodkjenna planane sine. Det er berre ei til to plansaker frå Vestland som kvart år vert sende til avgjerd i departementet

Tekst: Vigleik Brekke
Foto: Ole-Karstein Midtgård og Vigleik Brekke