Ordførar i Øygarden Tom Georg Indrevik (til venstre) og finansbyråd i Bergen, Eirik Tenfjord
Vigleik Brekke
Målet er at den nye godshamna skal vera klar til å overta dagens aktivitet frå 1. januar 2028.
Avtalane som no ligg føre er avhengige av både styrebehandling i Bergen Havn AS og politisk godkjenning i begge kommunane.
Ordførar i Øygarden, Tom Georg Indrevik, gler seg over avtalane som no ligg på bordet.
- Desse avtalane og dette samarbeidet vil bidra til at vi kan få utvikla ei framtidsretta godshamn for heile regionen samstundes som Bergen kommune får høve til å gjennomføra byutvikling sentralt i byen, seier ordføraren.
Øygarden kommune tar ansvaret for å få etablert nødvendig hamne- og kai-infrastruktur og vidare syta for at næringslivet får eit tilbod som tilsvarar dagens tenester i Bergen. Partane er samde om at hamna skal utviklast på marknadsmessige vilkår og bidra til ein effektiv, sikker og miljøvennleg godshandtering for heile vestlandsregionen.
Begge kommunane er samde om at Greenport Services AS, som i dag betener dei fleste kundane på Dokken, får vidareføra verksemda si i ein overgangsperiode på Ågotnes. Dette skal bidra til stabil og føreseieleg drift til beste for næringslivet, dei tilsette og brukarane av hamna.
Industriområdet på Ågotnes
CCB
Godt samarbeid
Finansbyråd i Bergen kommune, Eirik Tenfjord, seier at dette er ein ein viktig milepåle for heile bergensregionen.
- Vi har over tid hatt eit godt og konstruktivt samarbeid med Øygarden kommune, og eg opplever at vi nå har kome fram til ei løysing som er både føreseieleg og gjev framtidsretta rammer for godshamna. Avtalane legg til rette for ein trygg overgang frå Dokken til Ågotnes, og vil sikra rolla regionen har som eit viktig logistikk- og transportknutepunkt på Vestlandet, seier Eirik Tenfjord.
Dersom den nye brua mellom fastlandet og Øygarden ikkje står ferdig til planlagt tidspunkt, vil flyttinga verta utsett tilsvarande.
Avtalane inneber også endringar i eigarskapet i Bergen Havn AS og Bergen Havn Ågotnes AS. Etter gjennomføringa vil Bergen kommune styrkja eigarskapen i Bergen Havn AS, medan Øygarden kommune vert majoritetseigar i Bergen Havn Ågotnes AS. Dette skal sikra lokal forankring og ei langsiktig utvikling av det totale hamnetilbodet i regionen.