Nokre av elevane saman med ordføraren og leiinga på skulen. Heilt til venstre står Laila Eidsheim Flaa. Rektor Andreas Evensen står som nr. tre frå høgre.Ordføraren presenterte kommunen og ikkje minst aktuelle fritids- og kulturtilbod som kan vera aktuelle for studentane å nytta seg av. Ordføraren fekk fleire spørsmål frå elevane.
- Kva er dei tre hjartesakene dine no?
I svaret avgrensa han seg til lokale forhold.
- Det eine er om vi klarer å omstilla oss. Det er vidare ei utfordring å få folk til å forstå at dette er krevjande uavhengig av politisk ståstad. For det tredje er eg oppteken av korleis vi skal lukkast betre som kommune, svara ordføraren.
Han minna også om at det gjerne er eit gap mellom forventningane til kommunen frå innbyggjarane og det som er realistisk å tilby av tenester.
Tom Georg Indrevik viste til store utbyggingsprosjekt som nytt sotrasamband og alt som skjer med karbonfangst og lagring. Olje- og gassnæringa er viktig for Øygarden.
- Alle her ute har eit forhold til nokon som jobbar i olje- og gassnæringa, sa han.
Det kom spørsmål om korleis studentane kan engasjera seg i det som skjer i kommunen.
- Då vil eg tilrå at de tek turen til Sartor Storsenter laurdag 27. september. På frivilligdagen vil du møta ei rekkje av laga og organisasjonane i kommunen som presenterer seg denne dagen, sa Tom Georg Indrevik.
Dette skuleåret er det 98 studentar på Bildøy bibelskole.Det er knapt to veker til stortings- og sametingsvalet. Ordføraren oppmoda alle studentane til å nytta seg av røysteretten og røysta på førehand om dei ikkje er heime i eigen kommune på valdagen.
- På Sartor Storsenter er det opne vallokale fram til klokka 21 på kvardagar (måndag-fredag). Ikkje vent for lenge. Bruk røysteretten. Det er viktig at slike som dykk brukar røysteretten, sa han.
Rektor på Bildøy bibelskole, Andreas Evensen, er glad for at ordføraren kjem til bibelskulen i starten av skuleåret.
- Vi ønskjer å bety noko for Øygarden kommune og utgjera ein forskjell, seier rektoren.
Tekst og bilete: Vigleik Brekke