Frå venstre; leiar av plan- og miljøutvalet Børge Haugetun, ordførar Tom Georg Indrevik, kommuneoverlege Stein Inge Stigen, smittevernoverlege og assisterande kommuneoverlege Bjørg Møllerløkken, kommunedirektør Johnny Breivik, lufthavndirektør Helge Eidsnes, sikkerheitssjef Avinor Gro Handeland, fagansvarleg ytre miljø Avinor Peter Holmkvist og operativ sjef flysikring Avinor Kent Sviggum

Folkemøtet vert i kultursalen på Øygarden rådhus på Straume onsdag 23. september kl. 18.00.

Avinor jobbar kontinuerleg med å redusera støy så mykje som mogleg. Samstundes vert både teknologi og helikoptertypar utvikla. Sikkerheitssjef Gro Handeland seier at Avinor jobbar løpande med å forbetra prosedyrane slik at dei fungerer best mogleg for helikopterselskapa også.

Test på ny trasé

Det vert gjennomført ein test på ny trasé. Testen går føre seg frå 1. mai til 1.september. I testperioden hentar Avinor inn erfaringar knytt mellom anna til:

• operativ gjennomførbarheit (flybarheit)
• samspel med andre gjeldande prosedyrar
• faktisk flymønster og trafikkfordeling ved bruk av denne metoden

- For bebuarar kan dette opplevast som at trafikken i periodar går over andre område enn før. Det betyr ikkje at dette er ei permanent løysing, men at vi prøver ut ei mogleg endring. I tillegg vil helikoptertrafikken alltid variera noko frå dag til dag. Det heng mellom anna saman med vér, vind, sikt og korleis trafikken elles går inn og ut frå Flesland, seier Gro Handeland.

Når testperioden er over, vil Avinor vurdera resultata før det vert eventuelt teke stilling til vegen vidare. Målet er å finna løysingar som samla sett gjev minst mogleg støybelastning.

Konstruktivt møte

Lufthavndirektør Helge Eidsnes opplevde møtet med kommuneleiinga i Øygarden som konstruktivt.

- Det er tradisjon for god dialog mellom Avinor og Øygarden kommune. På folkemøtet vil vi orientera om korleis vi jobbar med å få redusert støyen frå helikoptera. Vi vil lytta til dei innspela som kjem frå dei som er berørte av dette, seier lufthavndirektøren.

På møtet på fredag orienterte Avinor om korleis det kontinuerleg vert arbeidd med å redusera støy frå helikoptera. Det er krevjande å finna løysingar på korleis helikopterstøyen skal fordelast. Det er no tre helikopteraktørar i trafikken mellom Bergen lufthavn og installasjonane i Nordsjøen.

Ordførar Tom Georg Indrevik seier at kommunen har hatt og har godt samarbeid og dialog med Avinor om dette temaet. 

- I tillegg må vi ha god dialog med innbyggjarane. På folkemøtet i september kan vi få innspel om korleis dei bererøte innbyggjarane opplever helikopterstøyen. Vi er også spente på resultata av testinga av ny trasé, seier ordføraren.


Tekst og foto: Vigleik Brekke