Frå møtet i levekårsutvalet på onsdag. Frå venstre; kommunalsjef for Oppvekst Marius Sylta, nestleiar i utvalet Helge Nilsen som leia møtet og setjenestleiar Robert Kaupang Sæle.

KrF føreslo å seia nei til utvida skjenking og fekk støtte frå to medlemer frå Høgre, Sotralista, Sp og INP (seks medlemer).
Mindretalet på fem medlemer, samansett av Ap, to frå Høgre og Frp, støtta framlegget om å endra skjenketida i kommunen i samsvar med Helse- og omsorgsdepartementet sitt forslag om mellombels endring av alkohollova sine føresegner om maksimaltid for skjenking under fotball VM for herrar 2026. Det vert teke atterhald om eit positivt vedtak i Stortinget. 

Mindretalet sitt framlegg inneber at skjenketida vert utvida frå klokka 02.00 til kl. 06.00 for skjenke som viser direktesende kampar for gjester sine under fotball-VM for herrar 2026. Dette gjeld for alkoholgruppe 1 og 2 (frå 2,5 til 21 volumprosent alkohol).

Årleg folkehelse- og oppvekstprofilar

Levekårsutvalet tilrår å ta saka om årleg folkehelse- og oppvekstprofilar til orientering slik det går fram av behandlinga. Det vert vidare tilrådd, slik ungdomsrådet går inn for, å be kommunedirektøren vektlegga kunnskap om folkehelseutfordringar i arbeidet med budsjett- og økonomiplanen.

I saksutgreiinga går det fram at Øygarden jamt over skårar høgt på fleire sentrale levekårsindikatorar, mellom anna knytt til inntekt, bustadforhold og overordna levekår. 

Samstundes teiknar det seg, når folkehelse‑ og oppvekstprofilane vert lesne over tid, eit bilete av nokre vedvarande og samansette utfordringar innan læring, gjennomføring, psykisk helse og deltaking. Generelt er det ein samanheng mellom utdanningsnivå til foreldra og kva utfordringar barna har i barnehage og skule.

Tilrår forskrift til skulefritidsordning (SFO)

LKU tilrår framlegg til forskrift for skulefritidsordninga for dei kommunale skulane i Øygarden.
Denne saka er behandla tidlegare der ulike alternativ vart vurderte. På grunnlag av vedtak i kommunestyret skal det no vedtakast forskrift. 

Endringane med alternativ 3 inneber mellom anna at ein skal halda fram med dagens løysing med SFO-tilbod i 10 månader og at SFO følgjer skuleruta. Opningstida vert som i dag, mellom klokka 07.00 og 16.30. Talet på skular som har tilbod om SFO i skuleferiane vert auka frå seks til ni skular. Opningstida i ferien vert mellom klokka 07.30 og 16.00. 
Saka går til endeleg behandling i kommunestyret.

Tilstandsrapport barnevernstenesta 2025

LKU støtta tilrådinga frå ungdomsrådet om å ta tilstandsrapporten for 2025 frå Øygarden barnevernsteneste til orientering med innspel slik det går fram av behandlinga til vidare politisk behandling.

Det vert i saka vist til at tilsyn frå Statsforvaltaren viste alvorleg svikt, mellom anna knytt til meldingar, undersøkingar, tiltak og oppfølging av barna. Barnevernstenesta har arbeidd systematisk med forbetringar ved mellom anna å laga nye rutinar, gjort strukturelle endringar i tenesta og gjennomført internkontrollaktivitetar.

Tenesta har difor i 2025 særleg arbeidd med rekruttering av nye medarbeidarar, sett inn tiltak retta mot arbeidsmiljøet og tiltak for å letta på arbeidsbelastninga.

Saka vert endeleg behandla av kommunestyret.

Andre saker

• Høyring om integreringsstønad for nye flyktningar
• Spørsmål

Her kan du lesa innkalling med saksdokument.

Tekst og bilete: Vigleik Brekke