Formannskapet drøftar saka den 26. august. Arkivfoto.

Denne saka er ei oppfølging av to tidlegare politiske saker om å byggja omsorgsbustader i samarbeid med private aktørar og tilbod om kjøp eller leige av omsorgsbustader til eldre på Ågotnes.

I tilrådinga vert det vist til behovet for å få realisert 40 omsorgsbustader for personar med vedtak om heildøgns omsorgsteneste innan 2028. I saka og tilrådinga går det fram at bustadene vert plasserte på Straume eller i eitt av kommunedelsentera og nær eksisterande institusjon eller heimesjukepleie. Konkurransen gjeld kjøp av nøkkelferdig prosjekt, med opsjon på leige i samsvar med krav til investeringstilskot og meirverdikompensasjon.

Prosjektet må utformast slik at det fyller vilkår for investeringstilskot frå Husbanken og legg til rette for effektiv drift og døgnkontinuerlege tenester. Det må ha infrastruktur for velferdsteknologi og nødvendige servicefunksjonar og lokaliserast nær andre relevante tenester. 

Det er venta at konkurransen vert lyst ut i januar 2026 og at bygga står ferdig i 2028.

I saka skriv kommunedirektøren at det står att å avklara kven som skal stå som eigar av bygget; kommunen eller Øygarden bustadutvikling KF. Dette vert vurdert når det er nærare avklart korleis den framtidige bustadforvaltinga i kommunen skal vera.

Formannskapet startar møtet den 26. august klokka 08.30 med eigarskapsdag. Det er venta at dei ordinære sakene startar i etterkant, om lag kl. 14.00.

Saka vert endeleg avgjort av kommunestyret.

Her kan du lesa innkalling med saksdokument.


Tekst og foto: Vigleik Brekke