Ein stor flokk var med på den første runden.

Ifølgje Conradi er dette det største Stafett til livet-arrangementet i Noreg dette året.

- Det er utruleg inspirerande å sjå det engasjementet de viser her i Øygarden, sa Conradi og nemnde Hans Jarle Einarsen, Sartor Storsenter og Benjamin Torsvik som døme på dette. Han takka også Øygarden kommune.

Ordførar Tom Georg Indrevik var også blant deltakarane. Han talte til folket og sa at sjølv om vi er 40 tusen innbyggjarar i Øygarden er vi framleis ei bygd der vi vil ta vare på kvarandre, stilla opp for kvarandre og hjelpa kvarandre.

- Vi kjenner alle nokre som har alle har vore ramma av kreft. Vi veit at dette er ein kamp som påverkar alle rundt; familie, barn, ektefelle og vener. Det betyr også at vi som er rundt må dela denne kampen. Vi må bidra med det vi kan og visa at vi stiller opp og bryr oss. Som ordførar vert eg rørt når eg ser at så mange stiller opp, sa ordføraren og takka arrangøren og alle som bidreg frivillig.

Tom Georg Indrevik og Lena Christina Knutsen Leigre

Konsulent på HR, Lena Christina Knutsen Leigre, er sjef for rådhuslaget og har skaffa deltakarar til å springa rundt bana heile døgeret fram til sundag klokka 12.00. Ho er sjølv ramma av kreft og veit kor krevjande dette er. Ho har vore gjennom åtte cellegiftbehandlingar og 23 strålebehandlingar i tillegg til operasjon.

- Eg fekk brystkreft i 2021/2022 og har vore kreftfri sidan 2022. Det var eit forferdeleg år både fysisk og psykisk. Eg er blant dei heldige. Eg leverte kroppen frå meg til Haukeland og fekk han tilbake.

- Kvifor engasjerer du deg i dette?

- Kreftforeningen gjer mykje for dei kreftramma både under og etter kreftperioden. Det gjeld også for dei pårørande. Eg må seia tårene rann ved starten i dag. Eg veit at inntektene til dette har ført til at eg har fått ei god behandling, seier Lena.

Stafett for livet vil gå føre seg fram til sundag klokka 12.00. Det vert konsertar og andre markeringar til over midnatt og frå klokka 09.30 på sundag. 

Her er fleire bilete:

Tekst: Vigleik Brekke
Foto: Privat og Vigleik Brekke