Fardawsa Dahir Mohamed (til venstre) og Nina Herman har funne seg godt til rette som servicemedarbeidarar på Kvednatunet.

Leiinga på Kvednatunet er tydelege på at institusjonen har eit stort behov for å styrkja kapasiteten og la servicemedarbeidarane gjennomføra oppgåver som avlastar andre medarbeidarar. Prosjektet “Vår nye ressurs” har ei lengde på to år.

- Dette fører til at til dømes helsefagarbeidarar/helsepersonell får meir tid til å gjera oppgåver dei har kompetanse på. Tilsette har fått seinka skuldrane og meir tid til brukarane, seier einingsleiar Ingrid-Alice Ingebrigtsen.

Oppvask er ei av oppgåvene for servicemedarbeidarane.

Og dei to servicemedarbeidarane har nok å gjera. Nina jobbar i bufellesskap 1 og 2, medan Fardawsa er knytt til bufellesskap 3 og 4.

- Dagane går fort. Eg lagar til lunsj, middag og kveldsmat til brukarane, vaskar opp og gjennomfører reinhald. Nokre av brukarane treng også hjelp når dei skal eta. Dei får gjerne vera med meg når eg skal ut på kjølerommet og henta mat. Når det er behov for meir mat, bestiller eg mat på kjøkenet, seier Fardawsa. 

Nina, som har hatt arbeidspraksis i Ukraina som butikkmedarbeidar, har tidlegare arbeidd på kantine etter at ho kom til Noreg for tre år sidan. Ho har nyleg teke kjøkenassistentkurs, og gjennomfører i stor grad dei same oppgåvene som Fardawsa.

- Eg likar å jobba med menneske. Det er eit svært godt kollegialt fellesskap her på Kvednatunet, seier Nina.

Frå venstre; Beate Lønningen, Bodil Giil, Nina Herman, Fardawsa Dahir Mohamed, Ingrid-Alice Ingebrigtsen og Vibeke Eide.

Samarbeid med Nav

Prosjektet er eit samarbeid med Nav, som har hjelpt til med å finna gode kandidatar til stillingane, og kommunen får lønstilskot for dei tilsette. Ved å la servicemedarbeidarane ta seg av praktiske oppgåver, kan det faste helsepersonellet fokusera på pleie og medisinske oppgåver. Dette bidreg til ei meir effektiv og målretta bruk av ressursane ved institusjonane.

Vibeke Eide er helsefagarbeidar og mellom dei medarbeidarane som har fått avlastning i dei daglege oppgåvene.

- Servicemedarbeidarane har teke over arbeidet med å leggja til rette for måltid og servering. Dei tek oppvasken, legg på nytt sengetøy, hentar matkontainaren og hjelper dei brukarane som treng ekstra hjelp under måltida. Fardawsa er ein kløppar til å steikja lappar, seier Vibeke. 

Einingsleiar Ingrid-Alice Ingebrigtsen seier at etter to månader ser ein meir og meir effekten av at institusjonen har to servicemedarbeidarar i staben.

- Implementeringa tar naturleg nok litt tid. Vi må samarbeida om kvar det er behov for avlastning. Vi kan trekkja ut personell til å gjennomføra faglege oppgåver og få spissa kompetansen til helsepersonellet. Medarbeidarane får meir tid til å verta kjende med brukarane, seier einingsleiaren.

Pliktoppfyllande

Avdelingsleiar Beate Lønningen seier at ordninga med servicemedarbeidarar har vore til svært god hjelp.

- Dei vert inkluderte i arbeidet og er svært pliktoppfyllande og er flinke til å spørja etter hjelp, seier ho.

Fardawsa hentar mat på kjølerommet.

Avdelingsleiar Bodil Giil tykkjer også at det svært kjekt å ha servicemedarbeidarane på Kvednatunet.

- I staden for å vaska opp, får vi tid til andre ting, som til dømes å gå på tur med brukarane. Det er viktig å vera medviten på kva ein brukar den frigjevne tida på, seier ho.

Dei tolv servicemedarbeidarane er tilsette ved Fjell sjukeheim, Straume bu- og servicesenter, Sundheimen, Øygarden lokalmedisinske senter, Kvednatunet og Tednebakkane omsorgssenter. 

I tillegg til å styrkja kapasiteten ved institusjonane, får kommunen også utvikla og prøva ut oppgåvedeling i praksis. Gjennom prosjektet får den einskilde arbeidserfaring som servicemedarbeidar og vil i samarbeid med Nav etter kvart få tilbod om pleieassistentkurs som skal verka kvalifiserande for vidare arbeid.

Les meir om prosjektet her.


Tekst og foto: Vigleik Brekke