Statsråd Kjersti Stenseng besøkte mellom anna Trigger på Straume.

Statsråden er oppteken av at tiltaka i kommunane legg til rette for at folk skal koma ut i ordinært arbeid. 

- Sjølv om vi har låg arbeidsløyse, står seks hundre tusen personar i yrkesaktiv alder i Noreg utan arbeid eller utdanning. Vi har eit stort utanforskap, men vi har også eit stort behov for arbeidskraft. Det vert gjort eit godt inkluderingsarbeid i Øygarden. Eg opplever at Vestland er spesielt god på inkludering, seier Kjersti Stenseng.

Arbeids- og inkluderingsministeren besøkte først avdelinga til Trigger på Søre Straume. Øygarden kommune har utvida eigenkapitalen gjennom kjøp av nye lokale. Dette har lagt grunnlag for ekspansjon og utvikling av tilbodet i Øygarden.
Trigger har mellom anna snikkarverkstad, jobbfrukt, vaskeri, matproduksjon og delmontering. Rundt 200 personar er dagleg i arbeid i Trigger som har hovudkontoret på Askøy. Trigger Jobb AS er eigd av Askøy kommune, Øygarden kommune og Askøy lang av NFU (Norsk Forbund for Utviklingshemmede).

Dagleg leiar Hege Elvestad sa at utfordringa er føreseielege rammer.

- Vi treng permanente plassar framfor mellombelse. Det er behov for betre retningslinjer for å få skuleelevar ut i arbeid. Vi har gode resultat, men det er potensiale for ein meir kostnadseffektiv veg til arbeidslivet. Vi brukar for mykje tid i skulesystemet før ungdomane kjem ut i arbeid, sa Elvestad som understreka at det er eit godt samarbeid med NAV.

Utanfor snikkarverkstaden. Frå venstre; gruppleiar Arbeidarpartiet Øygarden kommunestyre Marianne Sandahl Bjorøy, arbeids- og inkluderingsminister Kjersti Stenseng, dagleg leiar Trigger Hege Elvestad, ordførar Tom Georg Indrevik, dagleg leiar ØyVAR Bjarne Ulvestad og politikar i Bergen (Ap) Even O. Sørland.

Opnar ombruksbutikk i januar

Dagleg leiar i ØyVAR, Bjarne Elvestad, orienterte den nye ombruksbutikken som vert offisielt opna 2. januar 2026. Dette er eit samarbeid med Trigger.

- Trigger er svært god på arbeidstrening, sa Ulvestad.

Arbeids- og inkluderingsministeren besøkte også NAV Øygarden. Hovudtema her var korleis Helse og velferd i Øygarden kommune samarbeider med Nav om servicemedarbeidarar gjennom inkluderingsprosjektet Vår nye ressurs.

For  tida er 12 servicemedarbeidarar fordelte på seks institusjonar i kommunen. Ved å la servicemedarbeidarane ta seg av praktiske oppgåver, kan det faste helsepersonellet fokusera på pleie og medisinske oppgåver. Dette bidreg til ei meir effektiv og målretta bruk av ressursane ved institusjonane. 

Serhii Zhornyk frå Ukraina (til høgre) er servicemedarbeidar på Tednebakkane omsorgssenter på Rong. Frå venstre; ordførar Tom Georg Indrevik, statsråd Kjersti Stenseng, prosjektmedarbeidar prosjekt Ukraina Tetyana Omelyanyuk og Serhii Zhornyk.

Ein av servicemedarbeidarane er Serhii Zhornyk frå Ukraina. Han bur på Knappskog saman med kone og eitt av barna. Statsråden fekk ein prat med Serhii.

- De er viktige innbyggjarar og arbeidskraft for oss, sa Stenseng til ukrainaren. 

Serhii er glad for at han har jobb. På sikt har han ønskje om å bli sjukepleiar. 

- Eg har det godt både der eg bur og på Tednebakkane omsorgssenter der eg er servicemedarbeidar. Den største utfordringa er språket. Det er viktig å læra seg norsk når vi er i jobb, seier han.

Møte med leiinga i Oppvekst og Nav Øygarden.

Frigjer tid

Statsråden hadde samtale med leiinga i Helse og velferd og Nav Øygarden. Med dette prosjektet (Vår nye ressurs) er nettokostnaden svært liten for Øygarden kommune. Kommunen ønskjer å leggja til rette for at servicemedarbeidarane tek fagbrev. 

- Det er eit godt samarbeid mellom Helse og velferd og Nav. Det er søkt om forskingsmidlar for å få kartlagt kor mykje tid som vert frigjort ved bruk av servicemedarbeidarar og korleis dei frigjorte midlane vert brukt, sa prosjektleiar Monica Pedersen. Frå Helse og velferd deltok også kommunalsjef Line Barmen.

Leiar i Nav Øygarden, Nina Andersen, sa at fleire arbeidsgjevarar stiller opp og legg til rette for at medarbeidarane kan få fast jobb etter kvart.

- Med dette løyser ein eit faktisk arbeidskraftbehov, sa arbeids- og inkluderingsminister Kjersti Stenseng.

Her er fleire bilete:

Tekst og foto: Vigleik Brekke