Opposisjonspartia drøftar skulesaka i felles gruppemøte.

Plan- og miljøutvalet hadde tilrådd at den nye skulen skulle ha plass til 200 elevar. Utvalet sendte saka til kommunestyret for å få avklart om føringane i tilrådinga frå utvalet ville utløysa moglege plankrav.

Fleirtalspartia (Høgre, Frp, Sotralista-TVØ, KrF, Venstre og Pensjonistpartiet) føreslo på kommunestyret at skulen skal byggjast for 150 elevar. Dette punktet vart vedteke samrøystes.

Vedtaket vidare vart gjort med røystene til fleirtalspartia. 

Der heiter det at det skal startast regulering av området for å kunna byggja fleirbrukshall og framtidig utviding av skulen på Skålvika til 450 elevar. Ved utlysing av konkurranse skal bygging av fleirbrukshall inngå som opsjon, slik at han raskt kan løysast ut når reguleringsplanen er godkjend.

Vedtaket inneber vidare at kommunedirektøren får fullmakt til å gå i forhandlingar om å kjøpa det tilstøytande tilleggsarealet som er nødvendig for prosjektet. 

Kommunestyret vedtok samrøystes at dersom totalkostnaden kjem over ramma på 200 millionar kroner, skal saka tilbake til kommunestyret for ny behandling. 

Mindretalet på 13 røyster (Arbeidarpartiet, SV, INP, Sp, MDG og Raudt) støtta elles innstillinga frå kommunedirektøren.

Kommunestyret slutta seg samrøystes til eit nytt punkt frå MDG der kommunestyret ber om ei avklaring om korleis finansieringa av ny skule på Skålevik vil påverka driftsbudsjettet i kommunen, særskild innan kommunalområde oppvekst.

Fleirtalspartia hadde også felles gruppemøte i skulesaka.

Opprettheld noverande opningstid i SFO

Kommunestyret vedtok eit alternativ i saka om ny organisering av SFO og ferie-SFO som mellom anna inneber å halda på dagens løysing med open SFO i 10 månader og at SFO følgjer skuleruta. Opningstida vert som i dag, mellom klokka 07.00 og 16.30.

Med dette alternativet vil opningstida i ferietida vera mellom klokka 07.30 og 16.00.

Etter sommaren skal administrasjonen koma tilbake med evaluering av ferie-SFO.

Vil endra opningstid for skjenking under fotball-VM

Regjeringa opnar for at kommunar, som ønskjer det, kan få skjenka alkohol seint om natta medan det går føre seg fotballkampar i USA, Canada og Mexico i juni/juli. 

Med 24 mot 19 røyster vedtok kommunestyret at kommunen ønskjer at skjenketida i Øygarden kommune vert endra i samsvar med endringsframlegget frå Helse- og omsorgsdepartementet og med atterhald om eit positivt vedtak i Stortinget. Endringsforslaget skal leggjast ut på høyring i to veker, før saka skal til sluttbehandling i kommunestyret 7. mai. 

Fleirtalet var samansett av Arbeidarpartiet, delar av Høgre og Frp.

Mindretalet (delar av Høgre, Venstre, KrF, INP, SV, Raudt, Sp, MDG og Pensjonistpartiet) støtta eit framlegg frå KrF og Venstre om at kommunen ikkje ønskjer å endra gjeldande alkoholpolitisk handlingsplan pkt. 7.3.1 og tilhøyrande lokale forskrift, i høve lovendringsforslaget for fotball-VM 2026.

Ingvild Kvalsnes Blom (KrF) var ein del av mindretalet i spørsmålet om skjenking under fotball-VM.

Skal samarbeida med Bergen kommune om barnevernsvakt

Kommunestyret vedtok at kommunen etablerer samarbeid med Bergen kommune om barnevernsvakt så snart som mogleg. Kommunedirektøren får fullmakt til å forhandla og inngå avtalen, og til å leggja til rette nødvendige rutinar for samarbeidet.

Meirkostnaden og eventuelle budsjettjusteringar skal førast inn i samband med behandling av andre kvartalsrapport. I saka er det også vurdert vertskommunesamarbeid med Askøy. Dette er ei justering av dagens barnevernsvaktordning. Kommunedirektøren har vurdert alternativet  med Bergen som vertskommune til å vera det mest robuste for Øygarden kommune.

Vil avklara arealformål om tidlegare barnehage

Kommunestyret har tidlegare vedteke å selja gamle Glesnes barnehage med atterhald om at ny arealdel i kommuneplanane opnar for bustadformål på tomta.

I etterkant har det vore dialog mellom administrasjonen og Øygarden bustadforvaltning KF (ØBF) om å rehabilitera og tilbakeføra bygga til bustader, både for å stansa vidare forfall og for å greia ut bruk som kommunale utleigebustader/pilot for generasjonsbustader.

Etter framlegg frå Høgre, Frp, KrF og Sotralista-TVØ, Venstre og Pensjonistpartiet vart det samrøystes vedteke at Øygarden bustadforvaltning KF får rett til å disponera gamle Glesnes barnehage for å ta bygget i bruk som bustad for grupper som har behov for det. For eigedomen må det eventuelt søkjast om mellombels endra bruk fram til vedtak av ny arealdel til kommuneplanen. Kva for grupper som nytta bustaden må gjerast i tett dialog med forvaltninga i kommunen.

Høyringsuttale om berekraftig kommunesektor

Kommunestyret sluttar seg til innstillinga frå kommunedirektøren og støttar hovudretninga i delrapport 1, med mindre statleg detaljstyring, meir rammestyring og større lokal handlefridom. 

Kommunestyret var samrøystes om dei fleste punkta i innstillinga frå kommunedirektøren. Det gjaldt mellom anna punktet om at kommunestyret støtta hovudretninga i delrapport 1, med mindre statleg detaljstyring, meir rammestyring og større lokal handlefridom.

Kommunestyret var delt i spørsmålet om lærarnorm. Fleire av partigruppene var også delte i dette spørsmålet. 

Med eit fleirtal på 24 røyster vart det vedteke ein uttale om at forslaga om å flytta lærarnorma til kommunenivå, fjerna lovfesta profesjonskrav og innlemma øyremerka tilskot kan gi betre grunnlag for lokale prioriteringar og meir berekraftig ressursbruk.

Mindretalet på 20 representantar røysta for ein uttale fremja av KrF, SV og Venstre om at det er viktig å halda fast ved nasjonale krav som sikrar kvalitet, føreseielegheit og fagleg forsvarlege tenester i oppvekst og helse. Lærarnorma på skulenivå bør vidareførast, fordi ho sikrar stabil minstebemanning, gjev betre grunnlag for planlegging og bidreg til ein trygg og god skulekvardag for elevane. Behovet for lokal fleksibilitet må i staden møtast med styrkja kommuneøkonomi, ikkje ved å opna for lågare lærartettleik.

Tilleggspunkt frå Raudt og INP fekk ikkje fleirtal.

Espen Stølsnes Harkestad (Ap) fekk kommunestyret med på eit forslag om å løyva lån til RAN.

Gjev lån til arbeid med reguleringsplan for moloprosjekt

RAN Seilforening har søkt om forskottering/forskotteringslån på inntil 105 tusen kroner for sluttføring av reguleringsplan for moloprosjekt. Foreininga har tidlegare fått 300 tusen kroner, og kommunedirektøren skriv at eit eventuelt tilskot må skje gjennom ordningar for lag og foreiningar. 

Arbeidarpartiet føreslo at Øygarden kommune gjev RAN seilforening eit rentefritt forskotteringslån på 105 tusen kroner til ferdigstilling av moloprosjektet. Lånet skal tilbakebetalast innan 10 år. 

Vedtaket vart gjort mot røystene til Framstegspartiet, Pensjonistpartiet og eín representant frå Høgre.

Kjøper aksjar i Stavanger2Bergen AS

Det vart vedteke med 32 mot 11 røyster (SV, MDG og Raudt) at Øygarden kommune kjøper eín aksje på 20 tusen kroner i Stavanger2Bergen AS. Mange kommunar i Vestland og Rogaland har kjøpt aksjar i dette selskapet som skal arbeida for å realisera E39 mellom Stavanger og Bergen. 

Mindretalet støtta eit framlegg frå Raudt om at Øygarden kommune ikkje kjøper aksjar i selskapet Stavanger2Bergen AS. Mindretalet var samansett av fleirtalet i Arbeidarpartiet, SV, MDG og Raudt.

Vert med i Vestland interkommunalt politisk råd 

Hausten 2025 vedtok fylkestinget å oppretta Forsvarsforum Vestland interkommunalt politisk råd (IPR). Formålet er å styrkja samhandlinga mellom fylkeskommunen, kommunane og andre relevante aktørar i saker som gjeld Forsvaret, totalforsvaret, beredskap og forsvarsrelatert næringsutvikling i Vestland.

Kommunestyret vedtok at kommunen vert medlem i forumet og sluttar seg til samarbeidsavtalen. Ordføraren vert representant i representantskapet, med varaordføraren som vara. Kommunedirektøren får ansvaret for den administrative oppfølginga.

Endrar budsjettprosessen

Kommunestyret vedtok å endra budsjettprosessen i samsvar med tilrådinga frå formannskapet. Den vedtekne budsjettprosessen byggjer på innstillinga frå kommunedirektøren.

Endringa inneber mellom anna at formannskapet i større grad skal gje kommunedirektøren innspel i budsjettprosessen. Råda får høve til å gje innspel i september slik det har vore fram til no. 

Budsjett- og økonomiplansaka vert ikkje sendt til plan- og miljøutvalet og levekårsutvalet som har vore praktisert fram til no. Formannskapet legg økonomiplan og budsjett ut på høyring, men det vert slutt på at formannskapet skal gje innstilling til budsjettet like før endeleg behandling i kommunestyret. 

Årsmeldingar

• Kommunestyret godkjende årsmeldingane for eldrerådet, ungdomsrådet og råd for personar med funksjonsnedsetjing.
• Årsmelding for kontrollutvalet for 2025 vart teken til orientering.

Andre saker

• Kommunestyret tok finansrapport pr. 31. desember 2025 til orientering.
• Fritak for politiske verv og suppleringsval
• Beate Bjelland (H) vart vald som medlem til styret i Visit Bergen for perioden 2026–2028
   

Her kan du lesa innkalling med saksdokument.

Her er opptak frå møtet på kommune-TV.

Tekst og foto: Vigleik Brekke