Kommunedirektør Johnny Breivik

Klagen er knytt til måten Statsforvaltaren har utøvd tilsynsrolla og saksbehandlinga i ei konkret tilsynssak. Kommunen vurderer det slik at tilsynsrolla og saksbehandlinga er i strid med grunnleggjande krav til forsvarleg saksbehandling.

I klagebrevet, som er underteikna av kommunedirektør Johnny Breivik, ber kommunen om at departementet vurderer om praksisen til Statsforvaltaren er i samsvar med gjeldande regelverk og interne retningslinjer, og om det bør setjast i verk tiltak for å sikra forsvarleg og tillitsskapande tilsyn framover.

Den 6. februar 2025, valde Statsforvaltaren å melda kommunen til politiet for brot på kommunelova § 25. I mars la politiet saka vekk fordi det ikkje kom fram opplysningar som gav grunnlag for vidare etterforsking.

- Med klagen ønskjer vi å bidra til at ressursane vert nytta målretta til å utvikla best mogleg tenester, ikkje til kompetansestrid mellom kommune og stat. Kommunen legg vekt på positiv utvikling av barneverntenesta. Då må Statsforvaltaren vera ein aktiv medspelar, ikkje motspelar, seier kommunedirektør Johnny Breivik. 

Han etterlyser eit tilsyn som vektlegg dialog, rettleiing og som legg til rette for utvikling av tenesta gjennom faglege drøftingar. 

- Samstundes utfordrar vi ei tilsynsrolle som truar med sanksjonar og politimelding om vi ikkje gjer som tilsynet seier. Øygarden kommune har gjort feil og kjem også til å gjera feil i framtida. Ingen er feilfrie, heller ikkje vi. Difor er det viktig at vi finn betre måtar å handtera framtidige saker på, seier kommunedirektøren.

Klagen som er sendt til Digitaliserings- og forvaltningsdepartementet. (PDF, 369 kB)


Tekst og foto: Vigleik Brekke